1 ሄዋፐ ጉይያን፥ የሱስ ጽብርያዶሳ ጌተትያ አባ ጋጻን ባረ ካልያዋንቶ ላኤንዋ ቤቴዳ። እ ኡንቱንቶ ሀዋዳን ቤቴዳ። 2 ስሞን ጰጽሮስነ ማንትያ ጌተትያ ቶማስ፥ ቃና ጋሊላፐ ዬዳ ናትናኤል፥ ዛብድዮሳ ናናይነ*21:2 ዛብድዮሳ ናና፦ እሻቱዋ ግዴዳ ያቆባነ ዮሃንሳ። የሱሳ ካልያዋንቱፐ ሀራ ላአቱ እትፐ ደኢኖ።

3 ስሞን ጰጽሮሰ ኡንቱንቶ፥ "ታን ሞልያ ኦይቃናዉ ባይ" ያጌዳ።

ኡንቱንቱ፥ "ኑንካ ኔናና ባና" ያጊደ፥ ከሲደ ዎንግርያ ግዶ ገሌድኖ፤ ሽን ኡንቱንቱ ሄ ጋላስ ቃማ ሞልያ አይነ ኦይቂበይክኖ።

4 ዎንትያ ዎደ አዋይ ከሳናፐ ካሰ፥ የሱስ አባ ጋጻን ኤቄዳ፤ ሽን አ ካልያዋንቱ የሱሳ ግዴዳዋ ኤርበይክኖ። 5 የሱስ ኡንቱንታ፥ "ናቶ፥ ሞልያ ኦይቂበይክቴየ?" ያጌዳ።

ኡንቱንቱ ዛሪደ፥ "አይነ ኦይቂበይኮ" ያጌድኖ።

6 እ ዛሪደ፥ "ህንተንቱ ዳባ ዎንግርያፐ ኡሸቻ ባጋኮ የግተ፤ አማሬዳዋ ህንተንቱ ኦይቃና" ያጌዳ። ሄዋ ድራዉ፥ ዳባ ኡሸቻ ባጋኮ የግና፥ ሞሊ ዳሬዳ ድራዉ፥ ጎች ከሳናዌ ኡንቱንታ ጾኔዳ።

7 የሱስ ሲቅያ አ ካልያዌ ጰጽሮሳ፥ "ሀዌ ጎዳተኔ!" ያጌዳ። ስሞን ጰጽሮሰ ጎዳ እ ግዴዳዋ ስሴዳ ዎደ፥ ካሎ ደእያ ድራዉ፥ ባረ ማዩዋ ማዪደ፥ አባ ግዶ ጉፕ ገሌዳ። 8 ሽን የኮ ካልያዋንቱ ሞሊ ኩም ኡቴዳ ዳባ ጎቺደ፥ ዎንግርያን አባፐ ጋጻ ከሴድኖ፤ ኡንቱንቱ አባፐ ላኡ ጼቱ ዋ ኬና ሃኪደ ደኢኖፐ አትን፥ ሎይ ሃኪደ ደእክኖ። 9 ኡንቱንቱ አባፐ ጋጻ ከሴዳ ዎደ፥ ጺጹን ቦንቁዋን ሞሊ ደእያዋነ ኡክ በኤድኖ።

10 የሱስ ኡንቱንታ፥ "ሀእ ህንተንቱ ኦይቄዳ ሞልያፐ አማሬዳዋ ሃምተ" ያጌዳ።

11 ስሞን ጰጽሮሰ ዎንግርያን ገሊደ፥ ጼታነ እሻታማነ ሄዙ ዎጋ ሞለቱ ኩም ኡቴዳ ዳባ ጎቺደ፥ አባፐ ጋጻ ከሴዳ፤ ሞሊ ሄዋ ኬና ዳሮ ግድናካ ዳባይ ዳከትቤና።

12 የሱስ ኡንቱንታ፥ "ሀ ዪደ፥ ቃንእያ ቃንእተ" ያጌዳ። የሱሳ ካልያዋንቱፐ እቱነ፥ "ኔን ኦኔ?" ጊደ አ ኦቻናዉ ጻልቤና፤ አያዉ ጎፐ፥ ጎዳ እ ግዴዳዋ ኡንቱንቱ ኤሬድኖ። 13 የሱስ ዪደ፥ ኡክ አኪደ፥ ኡንቱንቶ እሜዳ፤ ሞልያካ ሄዋዳን እሜዳ።

14 የሱስ ሀይቁዋፐ ደንዴዳዋፐ ጉይያን፥ ባረ ካልያዋንቶ ቤትሽን ሀዌ ሄዘንዋ።

15 ኡንቱንቱ ቁማ ሜዳዋፐ ጉይያን፥ የሱስ ስሞን ጰጽሮሳ፥ "ዮሃንሳ ናኣ ስሞና፥ ታና ሀዋንቱፐ አደ ሲቃይ?"*21:15 "ታና ሀዋንቱፐ አደ ሲቃይ?" ሀዋ ጉሳይ፥ "ታና ሀ የዋቱዋ ሲቅያዋፐ አደ ሲቃይ?" ጉሳ። ያጌዳ።

ስሞን ጰጽሮሰ፥ "ኤ ጎዳዉ፥ ታን ኔና ዶስያዋ ኔን ኤራሳ" ያጌዳ።

የሱስ አ፥ "ታ ዶርሳ ማራቱዋ ሄማ" ያጌዳ።

16 የሱስ ቃይካ፥ "ዮሃንሳ ናኣ ስሞና፥ ታና ሲቃይ?" ያጌዳ።

ስሞን ጰጽሮሰ፥ "ኤ ጎዳዉ፥ ታን ኔና ዶስያዋ ኔን ኤራሳ" ያጌዳ።

የሱስ፥ "ታ ዶርሳቱዋ ሄማ" ያጌዳ።

17 የሱስ ሄዘንዋ፥ "ዮሃንሳ ናኣ ስሞና፥ ታና ዶሳይ?" ያጌዳ።

የሱስ ሄዘንዋ ስሞን ጰጽሮሳ፥ "ታና ዶሳይ?" ያጊደ ኦቼዳ ድራዉ፥ ጰጽሮሰ ካዮቲደ፥ "ጎዳዉ፥ ኔን ኡባባ ኤራሳ፤ ታን ኔና ዶስያዋ ኔን ኤራሳ" ያጌዳ።

የሱስ፥ "ታ ዶርሳቱዋ ሄማ። 18 ታን ነዉ ቱሙዋ ኦዳይ፤ ኔን ዎዳላተን ደእያ ዎደ፥ ነ ጼሳን ሳቂያ ኔረካ ዳንጫደ፥ ኔን ኮዬዳሳ ባሳ። ሽን ጭሜዳዋፐ ጉይያን፥ ነ ኩሽያ ምጫ በሳሳ። ኔና ሀራ ኡራይ ዳንጭሳናዋ፤ ኔን ዶሰናሳካ አፌ" ያጌዳ። 19 የሱስ ሄዋ ጰጽሮሰ አይ ማላ ሀይቁዋ ሀይቂደ፥ ጾሳ ቦንችሳነንቶነ ኤርሳናዉ ጌዳ፤ ቃይ ሄዋ ጌዳዋፐ ጉይያን፥ የሱስ ጰጽሮሳ፥ "ታና ካላ" ያጌዳ።

20 ጰጽሮሰ ጉየ ስሚደ፥ የሱስ ሲቅያ ካልያዌ ባረፐ ጉየና ይያዋ በኤዳ፤ ሄ ካልያዌ ካዉዋ ምያ ሳኣን የሱሳኮ ሺቂደ አ፥ "ጎዳዉ፥ ኔና አ እማናዌ ኦኔ?" ያጌዳዋ። 21 ጰጽሮሰ ሄ ካልያዋ በኢደ የሱሳ፥ "ጎዳዉ፥ ሀ ብታኒ ቃይ ዋናኔ?" ያጌዳ።

22 የሱስ አ፥ "ታን ያና ጋካናዉ እ ደአና ማላ ታን ኮዮፐ፥ ሄዌ ኔና አያ መቲ? ኔን ታና ካላ" ያጌዳ።

23 ሄዋ ድራዉ፥ ሄ ካልያዌ ሀይቀና ግያ ሃሳያይ እሻቱዋ ኡባኮ ጋኬዳ፤ ሽን የሱስ፥ "ታን ያና ጋካናዉ፥ እ ደአና ማላ፥ ታን ኮዮፐ፥ ኔና አያ መቲ?" ጌዳዋፐ አትን፥ "ሀይቀና" ግቤና።

24 ሄ የዉዋባ ማርካቴዳዌነ ቃይ ሄዋ ጻፌዳዌ ሄ ካልያዋ አ ማርካተይ ቱማ ግድያዋ ኑን ኤሬቶ።

25 የሱስ ኦዳ ሀራ ዳሮባይካ ደኤ፤ ኡባባይ ሁጲያን ሁጲያን ጻፈትንቶ፥ ጻፈትያ ማጻፋቶ ሀ ሙለ አላሚ ግዳናዋ ታዉ ማላተና።