1 ፓርሳዋቱዋፐ ግዴዳ ካፑዋ ንቆድሞሳ ጌተትያ እት ብታኒ ደኤ። 2 ንቆድሞስ ቃማ የሱሳኮ ዪደ፥ "ታማርስያዎ፥ ኔን ኑና ታማርሳና ማላ ጾሳይ ኪቴዳ ግድያዋ ኑን ኤሬቶ፤ አያዉ ጎፐ፥ ጾሳይ አናና ደእያ አሳፐ አትን፥ ሀ ኔን ኦያ ዎልቃማ ማላታቱዋ ኦናዉ ዳንዳይያ አሳይ ባዋ" ያጌዳ።

3 የሱስ ዛሪደ፥ "ታን ነዉ ቱሙዋ ኦዳይ፤ አሳይ ላኤንዋ የለታና ዮፐ፥ ጾሳ ካዉተ በአናዉ ዳንዳየና" ያጌዳ።

4 ንቆድሞስ፥ "ጭማ አሳይ ዋኒደ ላኤንዋ የለታናዉ ዳንዳዪ? ባረ ዳይ ኡሉዋ ስም ገሊደ፥ ላኤንዋ የለታናዉ አሳይ ዳንዳዪ?" ያጌዳ።

5 የሱስ ዛሪደ፥ "ታን ነዉ ቱሙዋ ኦዳይ፤ አሳይ ሃፐነ ጌሻ አያናፐ የለታና ዮፐ፥ ጾሳ ካዉተ ገላናዉ ዳንዳየና። 6 አሳይ አሹዋን አሳፐ የለቴ፤ ሽን አሳይ አያናን ጌሻ አያናፐ የለቴ፤ 7 ‘ህንተንቱ ላኤንዋ የለታናዉ በሴ’ ጋደ ታን ኦዴዳ ድራዉ፥ ማላለቶፓ። 8 ጫርኩ ባረ ኮዬዳሳ ጫርኬ። ኔን አ ኮሹንቻ ስሳሳ፤ ሽን እ ሀቃፐ ይንቶ ዎይ ሀቃ ብንቶ ኤራካ። ጌሻ አያናፐ የለቴዳ ኡባይ ሄዋ ማላ" ያጌዳ።

9 ንቆድሞስ፥ "ሀዌ ዋኒደ ሀናናዉ ዳንዳዪ?" ያጊደ ኦቼዳ።

10 የሱስ ዛሪደ፥ "ኔን እስራኤላቱዋ ታማርስያዋ ግዳደ ሀዋ ኤርኪ? 11 ታን ነዉ ቱሙዋ ኦዳይ፤ ኑን ኤርያዋ ሃሳዬቶነ በኤዳዋ ማርካቴቶ፤ ሽን ኑን ማርካትያዋ ህንተንቱ አክክታ። 12 ታን ህንተንቶ ሳኣባ ኦድና፥ አማነናዋንታ ግዶፐ፥ ሳሉዋባ ኦድና ዋን አማናንቴ? 13 ሳሉዋፐ ዎዳ ታፐ አትን፥ ሳሉዋ ከሴዳዌ ኦንነ ባዋ፤ ሳሉዋን ደእያ አሳ ናአይ ታና።

14,15 "ሙሴ ዎራን ጻንቂማሉዋ ሾሻ ሱሌዳዋዳን፥ ታና አማኔዳ ኡባይ መና ደኡዋ አካና ማላ፥ ታን አሳ ናአይ ማስቃልያ ቦላ ፑደ ደንዳና በሴ።✝

16 "ጾሳ ናኣ አማንያ ኡባይ መና ደኡዋ አካናፐ አትን፥ የና ማላ፥ ጾሳይ ሀ አላምያ አሳ ሎይ ሲቄዳ ድራዉ፥ ባረ መጽ እት ናኣ እሜዳ። 17 አያዉ ጎፐ፥ ጾሳይ ባረ ናኣ ሀ አላምያ አሳ ፕርዳናዉ ኪትቤና፤ ሽን ኡንቱንታ አ ባጋና አሻናዉ ኪቴዳ።

18 "አ ናኣ አማንያ ኦንነ ፕርደተና፤ ሽን ናኣን አማነና ኦንነ፥ ጾሳ ናኣ እቱዋ አማንቤና ድራዉ፥ ሀእካ ፕርደት ኡቴዳ። 19 አሳ ቦላ ይያ ፕርዳይ ሀዋ: ፖኡ ሀ አላምያ ዬዳ፤ ሽን አሳ ኪታይ ኢታ ግድያ ድራዉ፥ ፖኡዋፐ አደ፥ ማ ሲቄዳ። 20 ኢታባ ኦያ ኦንነ ፖኡዋ እጼ፤ አያዉ ጎፐ፥ ባረ ኪታይ ቆንጨና ማላ፥ ፖኡዋኮ ሺቀና። 21 ሽን ቱሙዋ ኦያ ኦንነ ጾሳይ አዛዜዳዋዳን፥ እ ኦዳዋ ፖኡ ቆንጭሳና ማላ፥ ፖኡዋኮ ሺቄ" ያጌዳ።

22 ሄዋፐ ጉይያን፥ የሱስነ አ ካልያዋንቱ ይሁዳ ጋድያ ቤድኖ፤ የሱስ ሄ ጋድያን ኡንቱንቱና አማሬዳ ዎድያ ኡቲደ፥ አሳ ጻማቂደ ደኤ።

23 ቃይ ዮሃንስ ሳሌመ ማታን ደእያ ሄኖና ግያ ሳን ዎጋ ሃይ ደእያ ድራዉ፥ አሳይ አኮ ዪና ጻማቄ። 24 ሄዌ ሀኔዳዌ ዮሃንስ ቃሸታናፐ ካሰና።

25 ሄዋፐ ጉይያን፥ ዮሃንሳ ካልያዋንቱና አማሬዳ አይሁዳቱዋ ሜቻ ዎጋባ* ፓሉመቴድኖ። 26 ኡንቱንቱ ዮሃንሳኮ ቢደ፥ "ታማርስያዎ፥ ዮርዳኖሳ ሻፋፐ ሄፍንን ኔናና ደእያዌ፥ ኔን አባ ማርካቶዌ፥ በአ ሀእ ጻማቄ፤ አሳይ ኡባይካ አኮ ቤ" ያጌድኖ።

27 ዮሃንስ ዛሪደ፥ "ጾሳይ እማና ዮፐ፥ አሳይ አይነ አካናዉ ዳንዳየና። 28 ‘ታን ክርስቶሳ ግድከ፤ ሽን ታን አፐ ስንዉ ኪተታድ’ ጌዳዎ ህንተ ህንተንቱ ሁጰዉ ማርካ። 29 ምሽራ ማጫዉና ደእያ ኡራይ እካ ምሽራ፤ ሄ ምሽራ ምያታይ ኤቂደ፥ እ ግያዋ ስስያዌ አ ሃሳያን ዳሮ ናሸቴ። ሄዋ ድራዉ፥ ሀዌ ታ ናሸቻይ ፖለቴዳ። 30 እ ዳርና ታ ጉጻና በሴ" ያጌዳ።

31 ቦላፐ ይያዌ ኡባፐ ቦላ። ሳኣፐ ቤቴዳዌ ሳኣሳ። እካ ሳኣባ ሃሳዬ። ሳሉዋፐ ይያዌ ኡባፐ ቦላ። 32 እ ባረ በኤዳባነ ስሴዳባ ማርካቴ፤ ሽን አ ማርካተ አክያዌ ባዋ። 33 አ ማርካተ አክያ ኦንነ ጾሳይ ቱማንቻ ግድያዋ ሄዋን ማርካቴ። 34 ጾሳይ ኪቴዳዌ ጾሳ ቃላ ኦዴ፤ አያዉ ጎፐ፥ ጾሳይ ባረ ጌሻ አያና ፓላህሲደ እሜ። 35 ጾሳይ ባረ ናኣ ሲቂደ ኡባባ አ ኩሽያን ዎዳ። 36 ናኣ አማንያ ኡራዉ መና ደኡ ደኤ፤ ሽን ናኣ አማነናዋ ቦላ ጾሳ ሀንቁ ደአናዋፐ አትን፥ እ ደኡዋ በኤና።