1 ሄዋፐ ጉይያን፥ የሱስ አይሁዳቱ ቦንችያ ባላዉ የሩሳላመ ቤዳ። 2 የሩሳላመን ዶርሳ ፐንግያ ማታን እብራይስጸ ቃላን ቤተሳይዳ ጌተትያ ዳጋት ኡቴዳ ሃይ ደኤ፤ ሄ ዳጋት ኡቴዳ ሃ ዩይ አዳ እቼሹ ካሻይ ደኤ። 3 ሄዋን ጮራ ሀርጋንቻቱ፥ ቆቃቱ፥ ዎባቱነ ስሌዳዋንቱ ግሴድኖ። [ሃይ ቃጽያዋ ናጊኖ። 4 አያዉ ጎፐ፥ እት እት ገደ ጎዳ ኪታንቻይ ሄ ዳጋቴዳ ሃኮ ገሊደ፥ ሃ ቃ፤ ሃይ ቃጼዳዋፐ ጉይያን፥ ኮይሮ ገሌዳ ኡራይ ባረና ኦይቄዳ አይ ሀርግያፐካ ፓጼ።]* 5 ሄዋን ሀታማነ ሆስፑን ላይ ሳከቴዳ እት ብታኒ ደኤ። 6 ሄ ብታኒ ሄዋን ግሴዳዋ የሱስ በኢደ፥ ዳሮ ዎድያ ሳከቴዳዋካ ኤሪደ ብታንያ፥ "ፓጻናዉ ኮያይ?" ያጌዳ።

7 ሳከትያ ብታኒ ዛሪደ፥ "ጎዳዉ፥ ሃይ ቃጽያ ዎደ፥ ታና ሃን የግያ አሳይ ዬዳ፤ ታን ገላና ሀንያ ዎደ፥ ሀራ ኡራይ ታፐ ካሰቲደ ገል አጌ" ያጌዳ።

8 የሱስ አ፥ "ደንዳ ኤቃ፤ ኔን ግሶዋ ቶካደ ባ" ያጌዳ። 9 ብታኒ ኤለካ ፓጽ አጌዳ፤ ባረ ግሱዋ ቶኪደ ቤዳ።

ሄዌ ሀኔዳዌ ሳምባታ ጋላሳና። 10 ሄዋ ድራዉ፥ አይሁዳቱ ፓጼዳ ብታንያ፥ "ሀቼ ሳአይ ሳምባታ፤ ኔን ነ ግሱዋ ቶካ ብያዌ ዎጋ ግደና" ያጌድኖ።✝

11 ሽን ብታኒ፥ "ታና ፓዳዌ፥ ‘ነ ግሱዋ ቶካደ ባ’ ያጌዳ" ጊደ ኡንቱንቶ ዛሬዳ።

12 ኡንቱንቱ አ፥ "ኔና፥ ‘ነ ግሱዋ ቶካደ ባ’ ጌዳዌ እ ኦኔ?" ጊደ ኦቼድኖ።

13 ሽን ሄዋን ጮራ አሳይ ደእያ ድራዉነ፥ የሱስካ ጌመቴዳ ድራዉ፥ ብታኒ ባረና ፓዳዌ ኦነንቶ ኤረና። 14 የሱስ ጉየፐ ሄ ብታንያ ጌሻ ጎልያን ደሚደ፥ "በአ፥ ኔን ሀእ ፓጻዳ፤ ሀዋፐካ ኢታባይ ኔና ጋከና ማላ፥ ላኤን ናጋራ ኦፓ" ያጌዳ። 15 ሄዋፐ ጉይያን፥ ብታኒ ቢደ፥ ባረና ፓዳዌ የሱሳ ግድያዋ አይሁዳ አሳ ካፓቶ ኦዴዳ።

16 የሱስ ሀዋ ሳምባታን ኦዳ ድራዉ፥ ኡንቱንቱ የሱሳ የደሳን ዋይሱዋ ዶሜድኖ። 17 የሱስ ዛሪደ ኡንቱንቶ፥ "ታ አቡ ኡባ ዎደ ኦ፤ ታንካ ኦናዉ በሴ" ያጌዳ።

18 ሄዋ ድራዉ፥ የሱስ ሳምባታ ጋላሳ ቦንቼና ድራ ጻላላሳ ግደናን፥ ባረና ጾሳና ቃራዪደ፥ "ጾሳይ ታ አባ" ጌዳ ድራዉ፥ አይሁዳ አሳ ካፓቱ አ ዎናዉ ካሰዋፐ ምንሲደ ኮዪኖ።

19 የሱስ ዛሪደ ኡንቱንቶ፥ "ታን ህንተንቶ ቱሙዋ ኦዳይ፤ ናአይ ባረካ አይነ ኦና። እ ባረ አቡ ኦሽን በእያዋ ጻላላ ኦ፤ አዉ ኦያዋ ናአይካ ኦ። 20 አያዉ ጎፐ፥ አዉ ባረ ናኣ ሲቄ፤ ቃይ እ ኦያ ኦሱዋ ኡባባ ባረ ናኣ በሴ። ኡባ ህንተንቱ ማላለታና ጋካናዉ፥ እ ሀዋፐ አያ ኦሱዋካ ባረ ናኣ በሳናዋ። 21 ጋሱኔ፥ አዉ ሀይቄዳዋንታ ሀይቁዋፐ ደንደ ሸምፑዋና ዎያዋዳን፥ ናአይካ ቃይ ባረ ኮዮዋንታ ሸምፑዋና ዎ። 22,23 አሳይ ኡባይ አዉዋ ቦንችያዋዳን፥ ናኣካ ቦንቻና ማላ፥ አዉ ፕርዳ ኡባ ናአዉ እሜዳዋፐ አትን፥ እ ኦናነ ፕርደና፤ ናኣ ቦንቼና ኡራይ፥ አ ኪቴዳ አዉዋካ ቦንቼና።

24 "ታን ህንተንቶ ቱሙዋ ኦዳይ፤ ታ ቃላ ስስያዎነ ታና ኪቴዳዋን አማንያዎ መና ደኡ ደኤ። ሀይቁዋፐ ደኦ እ ፕኔዳዋፐ አትን፥ ፕርደተና። 25 ታን ህንተንቶ ቱሙዋ ኦዳይ፤ ሀይቄዳ አሳይ ጾሳ ናኣ ኮሻ ስስያ ዎዲ ያናዋ፤ ሄዌኔካ ሀአ። ሄ ኮሻ ስስያዋንቱ ሸምፑዋና ደአና። 26 አያዉ ጎፐ፥ አዎ ደኡዋ እምያ ዎልቃይ ደእያዋዳን፥ ደኡዋ እምያ ሄ ዎልቃ ባረ ናአዉካ እሜዳ። 27 ጾሳ አዉ ባረ ናአዉ ፕርድያ ማታ እሜዳ፤ አያዉ ጎፐ፥ ናአይ አሳ ናኣ።

28 "ሀዋን ማላለቶፕተ፤ አያዉ ጎፐ፥ ዱፉዋን ደእያዋንቱ አ ኮሻ ስስያ ዎዲ ዬ። 29 ስሲደ ኡንቱንቱ ዱፉዋፐ ጋጻ ከሳና፤ ሎኦባ ኦዳዋንቱ ደኡዋን ደአናዉ ደንዳና፤ ቃይ ኢታባ ኦዳዋንቱ ፕርደታናዉ ደንዳናዋንታ።✝

30 "ታን ታፐ አይነ ኦናዉ ዳንዳይከ፤ ጾሳይ ታዉ ኦዴዳዋዳን ፕርዳይ። ታ ፕርዳይ ቱማ፤ አያዉ ጎፐ፥ ታን ታና ኪቴዳዋ ሸንያ ፖልያዋፐ አትን፥ ታን ዶስያዋ ኦከ።

31 "ታን ታ ሁጰዉ ታባ ማርካቶፐ፥ ታ ማርካተይ ቱማ ግደና። 32 ታባ ማርካትያዌ ሀራይ ደኤ፤ እ ታባ ማርካትያዌ ቱማ ግድያዋ ታን ኤራይ።

33 "ህንተንቱ ዮሃንሳኮ አሳ ኪትና፥ እ ኡንቱንቶ ቱሙዋ ማርካቴዳ። 34 ታን ሄዋ ህንተንታ አትኖ ጋደ ግያዋፐ አትን፥ አሳ ማርካተይ ታዉ ኮሽና ግደና። 35 ዮሃንስ ሙቃዳዳን፥ ኤጼዳነ ፖእሴዳ፤ ህንተንቱካ አማሬዳ ዎድያ አ ፖኡዋን ናሸታናዉ ኮዬድታ።

36 "ሽን ታዉ ዮሃንሳዋፐ አያ ማርካተይ ደኤ፤ አያዉ ጎፐ፥ ታን ዉርሳናዉ ታ አቡ ታዉ እሜዳ ኪታይ፥ ሀ ታን ኦያዌ፥ እ ታና ኪቴዳዋ ግድያዋ ማርካቴ።

37 "ቃይ ታና ኪቴዳ ታ አቡ ባረ ሁጰዉ ታባ ማርካቴ። ህንተንቱ አ ኮሻ አይነ ስስበይክታ፤ አ ማላካ በእበይክታ። 38 እ ኪቴዳዋ አማነና ድራዉ፥ አ ቃላይ ህንተንቱ ዎዛናን ባዋ።

39 "ጾሳ ማጻፋቱዋፐ መና ደኡዋ ደምያዋ ህንተዉ ማላትና፥ ኡንቱንታ ብዲታ፤ ኡንቱንቱካ ታባ ማርካትያዋንታ። 40 ሽን ደኡዋ ደማናዉ ታኮ ይያዋ ህንተንቱ ኮይክታ።

41 "ታን አሳፐ ቦንቹዋ ኮይከ። 42 ሽን ታን ህንተንቱ ዎዛናን ጾሳ ሲቁ ባይናዋ ኤራይ። 43 ታን ታ አቡ ሱንን ያድ፤ ሽን ታና አክበይክታ። ሽን ሀራ አሳይ ባረ ሱንን ይያ ዎደ፥ አ አኪታ። 44 ህንተንቱ እቱ እቱዋ ቦንቺታ፤ ሽን እት ጾሳፐ ይያ ቦንቹዋ ኮይክታ። ያትና፥ ዋኒደ አማናናዉ ዳንዳዪተ?

45 "ታን ታ አቡ ስንን ህንተንታ ሞትያዋ ህንተዉ ማላቶፖ፤ ህንተንታ ሞትያዌ፥ ህንተ ህዶታ ዎያ ሙሳ። 46 ህንተንቱ ሙሳ አማኔዳባ ግድንቶ፥ ታናካ አማናንታ፤ አያዉ ጎፐ፥ ታባ ጻፌዳዌ አ። 47 ሽን ህንተንቱ እ ጻፌዳዋ አማነናን እጾፐ፥ ታን ግያዋ ዎት አማናንቴ?" ያጌዳ።