1 ሽን የሱስ ዎጋራ ምን ኤረቴዳ ደርያኮ ቤዳ። 2 ዎንተ ጋላስ ጉራን ጌሻ ጎልያ ስሜዳ፤ ኡባ አሳይ አኮ ዪና፥ ኡቲደ ኡንቱንታ ታማርሱዋ ዶሜዳ። 3 ሙሴ ህግያ ታማርስያዋንቱነ ፓርሳዋቱ ዎሹምሽን ኦይቀቴዳ እት ምሽራቶ አኮ አሄድኖ። ኡንቱንቱ አሳ ኡባ ስንን እዞ ኤሲደ የሱሳ፥ 4 "ታማርስያዎ፥ ሀ ምሽራታ ዎሹማደ ኦይቀታዱ። 5 ህግያ ቦላን ሙሴ ሀን ማላ ማጫ አሳ ሹቻን ጫዳና ማላ፥ ኑና አዛዜዳ። ያትና ኔን ዋጋይ?" ያጌድኖ።✝

6 ኡንቱንቱ ሄዋ ጌዳዌ የሱሳ ሞትያዋ ደሚደ አ ፓጫናሳ፤ ሽን የሱስ ሆኪደ፥ ባረ ብራያን ቢታ ቦላ ጻፌዳ። 7 ኡንቱንቱ አ ኦቺደ አገናን እጽና፥ ፑደ ቁ ጊደ፥ "ህንተንቱ ግዱዋን ናጋራ ኦቤና አሳይ ካሰቲደ፥ እዞ ሹቻን ጫዶ" ያጌዳ። 8 ቃይካ ሆኪደ፥ ቢታ ቦላ ጻፌዳ።

9 ኡንቱንቱ ሄዋ ስሴዳ ዎደ፥ ካሰቲደ ጭማቱ ከስና፥ እቱ እቱ ከሲደ ዉሬድኖ፤ አ ስንን ምሽራታ ኤቃ ደእሽን፥ የሱስ ባረ ጻላላ አቴዳ። 10 እ ፑደ ቁ ጊደ ምሽራቶ፥ "ምሽራቴ፥ አሳቱ ሀቃን ደኢኖ? ኦንነ ነ ቦላ ፕርድቤኔ?" ያጌዳ።

11 ምሽራታ፥ "ጎዳዉ፥ ኦንነ ታ ቦላ ፕርድቤና" ያጋዱ።

የሱስ እዞ፥ "ታንካ ነ ቦላ ፕርድከ፤ ባ፤ ላኤንደ ናጋራ ኦፓ" ያጌዳ።*

12 ቃይካ የሱስ አሳዉ፥ "ታን አላመዉ ፖኡዋ፤ ታና ካልያ ኦንነ ደኡዋ እምያ ፖኡዋ ደማናፐ አትን፥ ማን ኡባካ ሀመተና" ያጊደ ሃሳዬዳ።

13 ሄዋፐ ጉየ ፓርሳዋቱ፥ "ኔን ነባ ማርካታሳ፤ ነ ማርካተይ ቱማ ግደና" ያጌድኖ።

14 የሱስ ዛሪደ፥ "ታን ታባ ማርካቶፐካ፥ ታ ማርካተይ ቱማ፤ አያዉ ጎፐ፥ ታን ሀቃፐ ያድታንቶነ ቃይ ሀቃ ባይታንቶ ኤራይ፤ ሽን ህንተንቱ ኤርክታ። 15 አሳይ ፕርድያ ኦግያን ህንተንቱ ፕርዲታ፤ ታን እት ኡራ ቦላካ ፕርድከ። 16 ሽን ታን ፕርድያዋ ግዶፐነ፥ ታ ፕርዳይ ቱማ፤ አያዉ ጎፐ፥ ታና ኪቴዳ ታ አቡ ታናና ደኤፐ አትን፥ ታን ታረካ ደእከ። 17 ላኡ አሳ ማርካተይ ቱማ ግድያዌ ህንተንቱ ህግያን ጻፈት ኡቴዳ።✝ 18 ታን ታባ ታ ሁጰዉ ማርካታድ፤ ቃይ ታና ኪቴዳ ታ አቡካ ታባ ማርካቴ" ያጌዳ።

19 ኡንቱንቱ፥ "ነ አቡ ሀቃን ደኢ?" ያጊደ የሱሳ ኦቼድኖ።

የሱስ ዛሪደ፥ "ህንተንቱ ታናካ ዎይ ታ አባካ ኤርክታ፤ ታና ኤሬዳዋ ግድንቶ፥ ታ አባካ ኤራንታ" ያጌዳ።

20 የሱስ ጌሻ ጎልያ ታማርሲደ፥ እሞታ ሚሻይ ኡትያ ሳጽንያ ማታን ሄዋ ሃሳዬዳ። አ ኦንነ ኦይቂቤና፤ አያዉ ጎፐ፥ አ ዎዲ ብሮ ጋክበና።

21 ቃይካ የሱስ ኡንቱንታ፥ "ታን ባና ህንተንቱ ታና ኮያና፤ ሽን ህንተንቱ፥ ህንተንቱ ናጋራን ሀይቃንታ። ታን ብያሳካ ባናዉ ህንተንቱ ዳንዳይክታ" ያጌዳ።

22 አይሁዳቱ፥ "እ፥ ‘ታን ብያሳ ህንተንቱ ባናዉ ዳንዳይክታ’ ያጌ፤ እ ባረና ባረካ ዎኔየ?" ያጌድኖ።

23 የሱስ ዛሪደ፥ "ህንተንቱ ጋርሳ አሳ፤ ታን ቦላ አሳ። ህንተንቱ ሀ አላምያ አሳ፤ ታን ሀ አላምያ አሳ ግድከ። 24 ህንተንቱ፥ ህንተንቱ ናጋራን ሀይቃናዋ ታን ህንተንቶ ኦዴዳዌ ሀዋሳ፤ ታን ታና* ግድያዋ ህንተንቱ አማናና ዮፐ፥ ህንተንቱ፥ ህንተንቱ ናጋራን ሀያንታ" ያጌዳ።

25 ኡንቱንቱ፥ "ኔን ኦኔ?" ያጊደ ኦቼድኖ።

የሱስ ዛሪደ፥ "ታን ታና። 26 ታን ህንተባ ሃሳይያባይነ ፕርድያባይ ዳሮባይ ደኤ። ሽን ታና ኪቴዳዌ ቱማንቻ፤ ቃይ ታን አፐ ስሴዳዋ አላምያ አሳዉ ኦዳይ" ያጌዳ።

27 እ ባረ አዉዋባ ሃሳይያዋ ኡንቱንቱ አኬክበይክኖ። 28 ሄዋ ድራዉ፥ የሱስ ኡንቱንታ፥ "ታና አሳ ናኣ ህንተንቱ ማስቃልያ ቦላ ፑደ ደንያ ዎደ፥ ታን ታና ግድያዋነ ቃይ ታን ታ አቡ ታና ታማርሴዳዋዳን ሃሳይያዋፐ አትን፥ ታ ሸንያን አይነ ኦናዋ ህንተንቱ ኤራንታ። 29 ቃይ ታና ኪቴዳዌ ታናና ደኤ፤ ታን ኡባ ዎደ አ ናሸችያዋ ኦያ ድራዉ፥ እ ታ ጻላላ አግቤና" ያጌዳ።

30 የሱስ ሄዋ ሃሳይሽን ስሴዳ ዳሮ አሳይ አ አማኔድኖ።

31 የሱስ ባረና አማኔዳ አይሁዳቱዋ፥ "ህንተንቱ ታን ታማርስያዎ አዛዘቶፐ፥ ቱሙ ታና ካልያዋንታ። 32 ህንተንቱ ቱማተካ ኤራንታ፤ ቃይ ቱማተይ ህንተንታ አይለተፐ ከሳናዋ" ያጌዳ።

33 ኡንቱንቱ ዛሪደ፥ "ኑን አብራሃሞ ዛረ፤ ኑን ኦስነካ አይለትበይኮ። ያትና ኔን ዋጋደ፥ ‘አይለተፐ ህንተንቱ ከሳንታ’ ጋይ?" ያጌድኖ።

34 የሱስ፥ "ታን ህንተንቶ ቱሙዋ ኦዳይ፤ ናጋራ ኦያ ኦንነ ናጋራ አይልያ። 35 አይሊ ኡባ ዎደ ሶይን ደኤና፤ ሽን ናአይ መናዉ ጎለን ደኤ። 36 ናአይ ህንተንታ አይለተፐ ከሶፐ፥ ህንተንቱ አይለተፐ ቱሙ ከሳንታ። 37 ህንተንቱ አብራሃሞ ዛረ ግድያዋ ታን ኤራይ፤ ሽን ታ ታማርስያዋ ህንተንቱ አከና ድራዉ፥ ታና ዎናዉ ኮዪታ። 38 ታን ታ አቡ ታና በሴዳዋ ሃሳያይ፤ ቃይ ህንተንቱካ ህንተንቱ አዉዋፐ ስሴዳዋ ኦታ" ያጌዳ።

39 ኡንቱንቱ ዛሪደ፥ "ኑ አቡ አብራሃማ" ያጌድኖ።

የሱስ ኡንቱንታ፥ "ህንተንቱ አብራሃሞ ናና ግዴደንቶ፥ እ ኦዳ ኦሱዋ ማላ ኦንታ። 40 ሽን ጾሳፐ ስሴዳ ቱሙዋ ኦዴዳ ታና ህንተንቱ ዎናዉ ኮዪታ፤ አብራሃመ ሄዋዳን ኦቤና። 41 ህንተንቱ፥ ህንተንቱ አዉ ኦዳዋ ኦታ" ያጌዳ።

ኡንቱንቱ ዛሪደ፥ "ኑን ዎሹማን ድቃላተ የለትበይኮ፤ ኑዉ እት አዉ፥ ጾሳ ጻላላይ ደኤ" ያጌድኖ።

42 የሱስ ኡንቱንታ፥ "ህንተንቱ ጾሳ ናና ቱሙ ግዴደንቶ፥ ታና ሲቃና፤ አያዉ ጎፐ፥ ታን ጾሳ ማታፐ ያደ ሀዋን ደአይ። ታና እ ኪቴዳዋፐ አትን፥ ታን ታ ሸንያን ያበይከ። 43 ታን ታማርስያዋ ህንተንቱ አኬከናዌ አያሴ? ታን ታማርስያዋ ህንተንቱ አከና ድራሳ። 44 ህንተንቱ፥ ህንተንቱ አዉዋ ኢታ አያና ናና፤ ቃይ ህንተንቱ፥ ህንተንቱ አዉ አሞትያዋ ኦናዉ ኮዪታ። እ ካሰፐ ዶሚደ፥ ሸምፑዋ ዎዳዋ፤ ቱማተይ አን ባይና ድራዉ፥ ቱማተኮ ሺቅ ኤረና። እ ዎርዱዋ ሃሳይያ ዎደ፥ ባረፐ ሃሳዬ፤ አያዉ ጎፐ፥ እ ዎርዳንቻነ ቃይ ዎርዶካ አዉዋ። 45 ሽን ታን ቱሙዋ ሃሳይያ ድራዉ፥ ህንተንቱ ታና አማንክታ። 46 ህንተፐ ታና ናጋራ ኦሽን በኣድ ጋናዉ ዳንዳይያዌ ኦኔ? ታን ቱሙዋ ሃሳይያዋ ግዶፐ፥ ታና አያዉ አማንክቴ? 47 ጾሳ አሳ ግዴዳ ኡራይ ጾሳይ ግያዋ ስሴ፤ ህንተንቱ ጾሳ አሳ ግደና ድራዉ፥ ጾሳይ ግያዋ ስስክታ" ያጌዳ።

48 አይሁዳቱ ዛሪደ፥ "ኑን ኔና፥ ‘ኔን ሳማርያ አሳ፤ ኔናን ኢታ አያናይ ደኤ’ ጊደ ባይዜዶ?" ያጌድኖ።

49 የሱስ ኡንቱንታ፥ "ታ ቦላ ኢታ አያናይ ባዋ። ታን ታ አባ ቦንቻይ፤ ሽን ህንተንቱ ታና ካዉሺታ። 50 ታን ታ ሁጲያዉ ቦንቹዋ ኮይከ፤ ሄዋ ታዉ ኮይያዌነ ፕርድያዌ ደኤ። 51 ታን ህንተንቶ ቱሙዋ ኦዳይ፤ ታን ታማርስያዋ ናግያ ኦንነ ኡባካ ሀይቀና" ያጌዳ።

52 አይሁዳቱ ዛሪደ፥ "ነ ቦላ ኢታ አያናይ ደእያዋ ኑን ሀእ ኤሬዶ። አብራሃመ ሀይቄዳ፤ ናባቱ ሀይቄድኖ፤ ሽን ኔን፥ ‘ታ ቃላ ናግያ ኦንነ ኡባካ ሀይቀና’ ያጋ። 53 ኔን ሀይቄዳ ኑ አዉዋ አብራሃሞፐ ዳራይ? ናባቱ ቃይ ሀይቄድኖ። ኔን ኔና ኦና ጋደ ቆፓይ?" ያጌድኖ።

54 የሱስ፥ "ታን ታና ቦንቾፐ፥ ታ ቦንቹ መላ፤ ህንተንቱ ኑ ጾሳ ግያ ታ አቡ ታና ቦንቼ። 55 ህንተንቱ አ ኤራና ዮፐካ፥ ታን አ ኤራይ። ታን አ ኤርከ ጎፐ፥ ህንተንቱዋዳን ዎርዶ ግዳይ፤ ሽን ታን አ ኤራይ፤ ቃይ አ ቃላካ ናጋይ። 56 ህንተንቱ አዉ አብራሃመ፥ ታ ዩሳ ዎድያ በአናዉ ላሞቴዳ፤ በኢደካ ናሸቴዳ" ያጌዳ።

57 አይሁዳቱ ዛሪደ አ፥ "ነዉ ሀራይ አቶ እሻታሙ ላይ ኩምቤናዌ አብራሃማ በኣዲ?" ያጌድኖ።

58 የሱስ ኡንቱንታ፥ "ታን ህንተንቶ ቱሙዋ ኦዳይ፤ አብራሃሞ የለታናፐካ ካሰ ታን ታና" ያጌዳ።

59 ሄዋ ድራዉ፥ ኡንቱንቱ የሱሳ ጫዳናዉ ሹቻ አኬድኖ፤ ሽን የሱስ ኡንቱንቱፐ ጌመቲደ፥ ጌሻ ጎልያፐ ቤዳ።