1 የሱስ ቢደ፥ የለቶደፐ ቆቃ ግዲደ ደእያ እት ብታንያ በኤዳ። 2 የሱሳ ካልያዋንቱ የሱሳ፥ "ታማርስያዎ፥ ሀ ብታኒ ቆቃ ግዲደ የለታናዳን፥ ናጋራ ኦዳዌ ኦኔ? እ ኦዴየ? ዎይ አ የሌዳዋንቱ ኦድኖ?" ያጊደ ኦቼድኖ።

3 የሱስ፥ "ጾሳ ኪታይ አ ቦላን ቆንጫና ማላ ቆቄዳፐ አትን፥ እ ዎይ አ ዳያነ አ አቡ ናጋራ ኦበይክኖ። 4 ኑን ሳአይ ቃመናን ደእሽን፥ ታና ኪቴዳዋ ኦሱዋ ኦናዉ በሴ። ኦንነ ኦናዉ ዳንዳየና ቃማይ ዬ። 5 ታን አላምያን ደኣደ አላመዉ ፖኦ" ያጌዳ።

6 የሱስ ሄዋ ጊደ፥ ሳኣን ጩቼዳ፤ ባረ ጩቻን ጉ ኡርቃ ሹግሲደ፥ ሄ ኡርቃን ቆቃ ብታንያ አይፍያ ኦኪደ፥ 7 "ባደ ሳልሆማ ግያ ዳጋቴዳ ሃን ነ አይፍያ ሜጫ" ያጌዳ። "ሳልሆማ" ግያዌ "ኪተቴዳዋ" ጉሳ። ሄዋ ድራዉ፥ ብታኒ ቢደ፥ ባረ አይፍያ ሜጨቲደ፥ ጼሊደ ስሜዳ።

8 ብታንያ ሾራቱነ ብታኒ ካሰ ዎስሽን በኤዳ አሳይ፥ "ሀዌ ኡቲደ ዎስያ ብታንያ ግደኔዬ?" ያጌድኖ።

9 ቃይ አማሬዳዋንቱ፥ "ሀዌ አተኔ" ያጌድኖ።

ሀራንቱ ቃይ፥ "ቱይት፥ ሀዌ አ ማላትያዋፐ አትን፥ አ ግደና" ያጌድኖ።

ሽን ብታኒ፥ "ታን አቴ" ያጌዳ።

10 ኡንቱንቱ ብታንያ፥ "ያትና፥ ነ አይፊ ዋን ጼሌዴ?" ያጊደ ኦቼድኖ።

11 እ ዛሪደ፥ "የሱሳ ጌተትያ ብታኒ ጉ ኡርቃ ሹግሲደ፥ ታ አይፍያ ኦኪደ፥ ‘ሳልሆማ ጌተትያ ዳጋቴዳ ሃን ባደ ነ አይፍያ ሜጨታ’ ያጌዳ። ታን ባደ ሜጨታደ ጼላድ" ያጌዳ።

12 ኡንቱንቱ አ፥ "እ ሀቃን ደኢ?" ያጊደ ኦቼድኖ።

ብታኒ፥ "ታን ኤርከ" ያጌዳ።

13 ኡንቱንቱ ካሰ ቆቂደ ጼሌዳ ብታንያ ፓርሳዋቱዋኮ አፌድኖ። 14 የሱስ ኡርቃ ሹግሲደ፥ ብታንያ አይፍያ ፓዳ ጋላሳይ ሳምባታ ጋላሳ። 15 ሄዋ ድራዉ፥ ብታኒ ዋን ጼሌደንቶነ ፓርሳዋቱ አ ጉጂደ ኦቼድኖ። ብታኒ ኡንቱንቶ፥ "እ ታ አይፍያን ጉ ኡርቃ ዎዳ። ታ አይፍያ ሜጨታደ ሀእ ጼላድ" ያጌዳ።

16 ፓርሳዋቱዋፐ እቱ እቱ፥ "ሀዋ ኦዳ ብታኒ ሳምባታ ህግያ ናገና ድራዉ፥ ጾሳ ማታፐ ይቤና" ያጌድኖ።

ሽን ሀራንቱ፥ "ናጋራንቻ አሳይ ሀዋ ማላ ዎልቃማ ማላታ ዋን ኦናዉ ዳንዳዪ?" ያጊደ ኡንቱንቱ ባረንቱ ግዱዋን ሻከቴድኖ።

17 ሄዋ ድራዉ፥ ፓርሳዋቱ ብታንያ እት ካላ ጉጂደ፥ "እ ነ አይፍያ ዶዬዳ ድራዉ፥ አባ ዋጋይ?" ያጌድኖ።

ብታኒ፥ "እ ናብያ" ያጌዳ።

18 አይሁዳቱ ሄ ጼሌዳ ብታንያ አቶነ አዉዋ ጼሲደ ኦቻና ጋካናዉ፥ ብታኒ ቆቃ ግዴዳዋነ ሀእ እ ጼልያዋ አማንበይክኖ። 19 አይሁዳቱ አ አቶነ አዉዋ፥ "ህንተንቱ፥ ‘ቆቃ ግዲደ የለቴዳ’ ግያ ህንተንቱ ናአይ ሀዌ? ያትና፥ ሀእ ዋኒደ ጼሌዴ?" ያጊደ ኦቼድኖ።

20 ብታንያ ዳያነ አዉ፥ "ሀዌ ኑ ናኣ ግዴዳዋነ ቆቃ ግዲደ የለቴዳዋ ኑን ኤሬቶ። 21 ሽን ሀእ እ ዋን ጼሌደንቶ፥ ኑን ኤሮኮ፤ ዎይ አ አይፍያ ኦን ፓደንቶ፥ ኑን ኤሮኮ። አ ኦችተ፤ እ ዶንዛ አሳ፤ ባረባ ሃሳያናዉ ዳንዳዬ!" ያጌድኖ። 22 ብታንያ ዳያነ አዉ አይሁዳቶ ያዬዳ ድራዉ፥ ሄዋ ጌድኖ፤ አያዉ ጎፐ፥ አይሁዳቱ የሱስ ክርስቶሳ ያጊደ ማርካትያ ኡራይ ደኦፐ፥ ሄ ኡራ አይሁዳ ዎሳ ጎልያፐ ከሳናዉ ካሰት ቆፋ ቃች ዎድኖ። 23 አ ዳያነ አዉ፥ "እ ዶንዛ አሳ፤ አ ኦችተ!" ጌዳዌ ሀዋሳ።

24 ሄዋ ድራዉ፥ ቆቃ ግዲደ የለቴዳ ብታንያ ኡንቱንቱ ላኤንዋ ጼሲደ፥ "ጾሳ ጋላታ፤ ሀ ብታኒ ናጋራንቻ ግድያዋ ኑን ኤሬቶ" ያጌድኖ።

25 ብታኒ፥ "እ ናጋራንቻ ግድያዋነ፥ ግደናዋ ኤርከ፤ ታን ቆቃ ግድያዋነ ሀእ ጼልያዋ ሄ እትባ ኤራይ" ያጌዳ።

26 ኡንቱንቱ ዛሪደ ብታንያ፥ "እ ነዉ አያ ኦዴ? እ ነ አይፍያ ዎት ፓዴ?" ያጌድኖ።

27 እ ኡንቱንታ፥ "ታን ህንተንቶ ኦዳድ፤ ስስበይክታ። አያዉ ላኤንዋ ስሳናዉ ኮዪቴ? ህንተካ የሱሳ ካልያዋንታ ግዳናዉ ኮዪቴ?" ያጌዳ።

28 ኡንቱንቱ አ ቦሪደ፥ "ኔን ሄ ብታንያ ካልያዋ፤ ኑን ሙሳ ካልያዋንታ። 29 ጾሳይ ሙሴዉ ሃሳዬዳዋ ኑን ኤሬቶ፤ ሽን ሀ ብታንያ ግዶፐ፥ እ ሀቃፐ ዬደንቶነ ኑን ኤሮኮ" ያጌድኖ።

30 ብታኒ፥ "እ ሀቃፐ ዬደንቶነ ህንተንቱ ኤረናዌ ማላልስያዋ፤ ሽን እ ታ አይፍያ ፓዳ! 31 ጾሳዉ ያይያ ኡራይነ ጾሳይ ኮይያዋ ኦያ ኡራይ ደኦፐ፥ ሄ ኡራባ ጾሳይ ስስያዋፐ አትን፥ ናጋራንቻቱዋባ ስሰና። 32 ቆቃ ግዲደ የለቴዳ አሳ አይፍያ ኦንነ ፓና፥ ሳአይ መቶደፐ ዶምና፥ ስሰት ኤረና። 33 ሀ ብታኒ ጾሳፐ ይቤናዋ ግድንቶ፥ እትባነ ኦናዉካ ዳንዳየና" ያጌዳ።

34 ኡንቱንቱ ዛሪደ አዉ፥ "ኔን ናጋራን የለታደ ድጬዳዌ ኑና ታማርሳናዉ ኮያይ?" ያጌድኖ፤ አይሁዳ ዎሳ ጎልያፐ ካረ አ ከሴድኖ።

35 ኡንቱንቱ ብታንያ ካረ ከሴዳዋ የሱስ ስሴዳ፤ የሱስ ብታንያ ደሚደ፥ "አሳ ናኣ አማናይ?" ያጌዳ።

36 ብታኒ የሱሳ፥ "ጎዳዉ፥ ታን አ አማናናዳን እ ኦኔ? ታዉ ኦዳርኪ!" ያጌዳ።

37 የሱስ ብታንያ፥ "ኔን አ በኣዳ፤ ሀ ኔናና ሃሳይያዌካ አ" ያጌዳ።

38 ብታኒ ዛሪደ፥ "ጎዳዉ፥ አማናይ" ያጊደ የሱሳዉ ጎይኔዳ።

39 የሱስ፥ "ቆቃቱ ጼላና ማላነ ጼልያዋንቱ ቆቃና ማላ፥ ታን ፕርዳናዉ ሀ ሳኣ ያድ" ያጌዳ።

40 አናና ደእያ አማሬዳ ፓርሳዋቱ ሄዋ ስሲደ፥ "ኑንካ ቆቀዬ?" ያጊደ ኦቼድኖ።

41 የሱስ፥ "ህንተንቱ ቆቃ ግዴደንቶ፥ ህንተንቶ ናጋራ ግደና፤ ሽን ሀእ ህንተንቱ፥ ‘ኑን ጼሌቶ’ ያጊታ፤ ህንተንቱ ናጋራና ደኢታ" ያጌዳ።