1 የሱስ ሄ ዎደ ሳምባታ ጋላስ፥ ትሻ ባንጋ ግዶና አሽን አ ካልያዋንቱ ኮሻቲደ፥ ትሻ ባንጋ ዱደ፥ ሙሳ ዶሜድኖ።✝ 2 ሽን ፓርሳዋቱ ሄዋ በኢደ የሱሳ፥ "በአ፥ ኔና ካልያዋንቱ ሳምባታ ጋላስ ኦናዉ ዎጋ ግደናባ ኦኖ" ያጌድኖ።

3 ሽን የሱስ ኡንቱንቶ ሀዋዳን ያጌዳ፤ "ዳዊተነ አናና ደእያዋንቱ ኮሻቴዳ ዎደ፥ ዳዊተ ኦዳዋ ናባብ በይክቴ?✝ 4 ዳዊተ ጾሳ ጎለ ገሊደ፥ ቄሳቱዋ ጻላላይ ማናፐ አትን፥ እነ አናና ደእያዋንቱ ማናዉ ዎጋ ግደና ጾሳዉ ያርሼዳ ቁማ ሜዳ።✝ 5 ዎይ ሳምባታ ኡባን ጌሻ ጎልያን ደእያ ቄሳቱ ሳምባታ ዎጋ መንያዋ፥ ቃይ ኡንቱንቶ ሄዌ ባይዞ ግደናዋ ሙሴ ህግያን ናባብ በይክቴ?✝ 6 ሽን ታን ህንተዉ ኦዳይ፤ ጌሻ ጎልያፐ አያዌ ሀዋን ደኤ። 7 ጾሳ ማጻፋይ፥ ‘ታን ማሮተ ኮያይፐ አትን፥ ያርሹዋ ኮይከ’ ያግያዌ ዋግያዌንቶ ህንተንቱ ኤሪተንቶ፥ ባይዙ ባይና አሳ ቦላ ፕርድክታ።✝ 8 አያዉ ጎፐ፥ ታን፥ አሳ ናአይ፥ ሳምባታ ጎዳ" ያጌዳ።

9 የሱስ ሄዋፐ ደንዲደ፥ አይሁዳ ዎሳ ጎለ ቤዳ። 10 ሄዋን ኩሺ ጉንዴዳ እት ብታኒ ደኤ፤ የሱሳ ሞታናዉ ጋሱዋ ኮይያ አሳቱ፥ "ሳምባታን፥ ሀርጋንቻ ፓያዌ ዎጌ?" ያጊደ አ ኦቼድኖ።

11 የሱስ ኡንቱንታ፥ "ህንተንቱ ግዶን እት ዶርሳይ ደእያ ኡራይ፥ ሄ ዶርሳይ ሳምባታ ጋላስ ኦላን ኩንዶፐ፥ ኦይቂደ ከሰናዌ ኦኔ? 12 ያትና፥ አሳይ ዶርሳፐ ዎት ሎይደ ዳረኔ! ሄዋ ድራዉ፥ ሳምባታ ጋላስ ሎኦባ ኦያዌ ዎጋ" ያጌዳ። 13 ሄዋፐ ጉይያን ብታንያ፥ "ነ ኩሽያ ፕድ ኦ" ያግና ብታኒ ፕድ ኦዋፐ ጉይያን፥ አ ኩሺ የኮ ኩሽያዋዳንካ ፓጽ አጌዳ። 14 ሽን ፓርሳዋቱ ካረ ከሲደ፥ የሱሳ ዎት ዎነንቶ ማቀቴድኖ።

15 ሽን የሱስ ኡንቱንቱ ዞረታ ኤሪደ፥ ሄዋፐ አጊደ ብያ ዎደ፥ ዳሮ አሳይ አ ካሌዳ፤ ሀርጌዳ ኡባ ፓዳ። 16,17 ጾሳይ ናብያ ኢስያሳ ባጋና ኦዴዳዌ ፖለታና ማላ፥ የሱስ አሳቶ፥ "ታባ ሀራ አሳዉ ኦዶፕተ" ያጌዳ። 18 ጾሳይ ኢስያሳ ባጋና ሀዋዳን ያጌዳ፤

"ታን ዶሬዳ ታ አይሊ፥

ታን ሲቅያ፥ ታና ናሸችያዌ ሀዌኩ።

ታን ታ አያና አ ቦላ ዎና።

እ ሱረ ፕርዳ አሳዉ ኡባዉ ኦዳናዋ።✝

19 እ ፓሉመተና፤ ዎይ ዋሰና።

ባረ ቃላካ ኦግያን ስሰና።

20 ሱረ ፕርዳይ ጾን ከሳና ጋካናዉ፥

ትንጨቴዳ ማቃ መንና፤*

ቃይ ጩዋትያ ሙቃዳ ቁንጩትያካ እ ቶይሰና።

21 አይሁዳ ግደና አሳይ ኡባይ፥

አ ቦላ ባረንቱ ህዶታ ዎና"

ያጌዳ።

22 ሄዋፐ ጉይያን፥ አማሬዳ አሳቱ ኢታ አያናይ ኦይቂና ዱዴዳ እት ቆቃ ብታንያ የሱሳኮ አሄድኖ፤ የሱስ ሄ ዱደ ብታንያ ፓዳ፤ ብታኒካ ሃሳያነ ጼላ ዶሜዳ። 23 አሳይ ኡባይ ማላለቲደ፥ "ላ ሀዌ ዳዊተ ናኣ ግዳንዴሻ?" ያጌድኖ።

24 ሽን ፓርሳዋቱ ሄዋ ስሲደ፥ "ሀ ብታኒ ኢታ አያናቱዋ ካፑ ‘ብኤል-ዘቡል’ ባረዉ ዎልቃ እምና፥ ጻላሀቱዋ ከሴ" ያጌድኖ።

25 ሽን የሱስ ኡንቱንቱ ቆፋ ኤሪደ፥ ኡንቱንታ ሀዋዳን ያጌዳ፤ "ባረ ግዶን ሻከትያ ካዉተይ ኡባይ ያና፤ ቃይ ባረ ግዶን ሻከትያ ካታማይ ዎይ ጎለን ደእያ አሳይካ ምነና። 26 ቃይ ሴጻናይ ሴጻና ከስያዋ ግዶፐ፥ ባረ ግዶን ሻከቴ፤ ያትና፥ አ ካዉተይ ዋኒደ ምን ኤቃናዌ? 27 ታዉ ብኤል-ዘቡል ዎልቃ እምና፥ ታን ጻላሀቱዋ ከስያዋ ግዶፐ፥ ህንተንቱ አሳዉ ዎልቃ ኦን እምና ጻላሀቱዋ ከሳኔ? ሄዋ ድራዉ፥ ኡንቱንቱ ህንተ ቦላ ፕርዳና። 28 ሽን ጾሳ ጌሻ አያናይ ታዉ ዎልቃ እምና፥ ታን ጻላሀቱዋ ከስያዋ ግዶፐ፥ ስም ጾሳ ካዉተይ ህንተ ቦላ ይ ድጌዳ።

29 "ዎይ አሳይ ካሰቲደ፥ ዎልቃማ አሳ ቃቼናን ደኢደ፥ አ ጎለ ገሊደ፥ አ ሚሻ ቦንቃናዉ ዋኒደ ዳንዳዪ? ቃቼዳዋፐ ጉይያን፥ አ ሚሻ ቦንቃናዉ ዳንዳዬ።

30 "ታ ባጋ ግደና ኡራይ ታዋ እጼ፤ ቃይ ታናና እትፐ ሺሸናዌ ላሌ። 31 ሄዋ ድራዉ፥ ታን ህንተዉ ኦዳይ፤ ጾሳይ አሳዉ አይ ናጋራ ግድናካ፥ ቃይ አይ ቦረ ግድናካ አቶ ጋና፤ ሽን ጌሻ አያና ቦርያዋ አቶ ጌና። 32 ታ ቦላ፥ አሳ ናኣ ቦላ፥ ኢታባ ሃሳይያ ኦ ናጋራነ ጾሳይ አቶ ጋና፤ ሽን ጌሻ አያና ቦላ ኢታባ ሃሳይያ ኦ ናጋራነ ሳኣን ግድና፥ ሳሉዋንካ ጾሳይ አቶ ጌና።

33 "ሎኦ አይፍያ ደማናዉ ሎኦ ም ድቻናዉ በሴ፤ ኢታ ም ህንተንቱ ድቾፐ፥ ኢታ አይፍያ ደማንታ፤ አያዉ ጎፐ፥ ምይ ኤረትያዌ ባረ አይፍያ አይፍያዋና። 34 ሾሻቶ፥ ህንተንቱ ኢታ ግዲደ፥ ዎት ሎኦባ ሃሳያናዉ ዳንዳዪቴ? አያዉ ጎፐ፥ ዶናይ ዎዛና ግዶን ኩሜዳዋ ሃሳዬ። 35 ሎኦ አሳይ ባረ ሎኦ ምንጁዋፐ ሎኦባ ከሴ፤ ቃይ ኢታ አሳይ ባረ ኢታ ምንጁዋፐ ኢታባ ከሴ። 36 ታን ህንተንቶ ኦዳይ፤ አሳይ ባረ ሃሳዬዳ ማደና ሃሳያ ኡባዉ ፕርዳ ጋላስ ዛሩዋ እማናዋ። 37 አያዉ ጎፐ፥ ነ ሃሳያይ ኔና ጽልሳና፤ ዎይ ነ ሃሳያይ ነ ቦላ ፕርድሳና" ያጌዳ።

38 ሄዋፐ ጉይያን፥ ህግያ ታማርስያ እት እት አሳይነ ፓርሳዋቱ ዛሪደ የሱሳ፥ "ታማርስያዎ፥ ኔን ማላታ ኦሽን፥ ኑን በአናዉ ኮዬቶ" ያጌድኖ።

39 ሽን እ ዛሪደ፥ ኡንቱንቶ ሀዋዳን ያጌዳ፤ "ሀ ዎድያ አሳይ ኢታነ ጾሳ አማነና ድራዉ፥ ማላታ ኮዬ፤ ናብያ ዮናሳ ማላታፐ አትን፥ ሀራ ማላታይ እመተና። 40 ዮናስ ዎጋ ሞልያ ኡሉዋን ሄዙ ጋላሳነ ሄዙ ቃማ ደኤዳዋዳን፥ አሳ ናአይካ፥ ቢታ ግዶን ሄዙ ጋላሳነ ሄዙ ቃማ ደአናዋ። 41 ነነዌ አሳይ ዮናስ ኦዴዳዋን ባረንቱ ናጋራፐ ስሜዳ ድራዉ፥ ፕርዳ ጋላስ ደንዲደ፥ ህንተንታ ሞታናዋንታ፤ በይተ፥ ዮናሳፐ አያዌ ሀዋን ደኤ። 42 ዱገ ባጋ ጋድያ ካታታ ሶሎሞነዉ ደእያ አ ኤራተ ስሳናዉ ሳኣ ጋጻፐ ዬዳ ድራዉ፥ ፕርዳ ጋላስ ደንዳደ፥ ህንተንታ ሞታናዉኑ፤ በይተ፥ ሶሎሞነፐካ አያዌ ሀዋን ደኤ።✝

43 "ኢታ አያናይ አሳፐ ከሴዳ ዎደ፥ ባረዉ ሸምፕያ ሳ ኮዪደ፥ ሃይ ባይና መላሳና ዩዬ፤ ሽን ደመና። 44 ሄ ዎደ፥ ‘ታን አጋደ ዬዳ ታ ጎለ ስማና’ ያጌ፤ ስሚደ ይያ ዎደ፥ ጎሊ መላ ደእያዋነ ፕተት ጌዪደ፥ ጊግ ኡቴዳዋ ደሜ። 45 ሄዋፐ ጉይያን፥ ቢደ ባረፐ ኢትያ ላፑ ሀራ አያናቱዋ አኪደ ዬ፤ ሄ አያናቱ ገሊደ፥ ሄዋን ደኢኖ። ሄ ብታንያ ደኡ ካሰዋፐ ዳሪ ኢቴ። ሀ ዎድያ ኢታ አሳዉካ ቃይ ሄዋዳን ሀናና" ያጌዳ።

46 የሱስ ዳሮ አሳዉ ሃሳይሽን፥ አ ዳያነ አ እሻቱ አናና ሃሳያናዉ ኮዪደ፥ ካረን ኤቄድኖ። 47 ሄዋን ደእያ አሳፐ እቱ አ፥ "ነ ዳያነ ነ እሻቱ ኔናና ሃሳያናዉ ኮዪደ፥ ካረን ኤቄድኖ" ያጌዳ።*

48 ሽን የሱስ ዛሪደ፥ "ታ ዳያ ኦኔ? ታ እሻቱ ኦኔ?" ያጌዳ። 49 ባረ ኩሽያን ባረና ካልያዋንቱኮ ጾርሲደ፥ "በይተ፥ ታ ዳያነ ታ እሻቱ ሀዋንቱሽ። 50 አያዉ ጎፐ፥ ሳሉዋን ደእያ ታ አቡ ሸንያ ኦያ ኡባይ፥ ታ እሻ፥ ታ ምቻቶነ ታ ዳዮ" ያጌዳ።