1 የሱስ ሄ ጋላስ ሶይፐ ከሲደ፥ አባ ጋጻን ኡቴዳ። 2 ዳሮ ጮራ አሳይ ባረ ዩሹዋን ዩይ አደ ሺቅና፥ ዎንግርያ ግዶ ገሊደ ኡቴዳ፤ አሳይ ኡባይ አባ ጋጻን ኤቄዳ። 3 አሳዉ ሌምሱዋን ዳሮባ ሀዋዳን ያጊደ ኦዴዳ፤ "እት ብታኒ ዘረ ዘራናዉ ከሴዳ። 4 እ ዘርሽን፥ እት እት ዘረይ ኦግያ ዶናን ዎዳ፤ ያትና ካፉ ዪደ ሜዳ። 5 ቃይ እት እት ዘረይ አንጮ ግዴዳ ቢታ ቦላ ዎዳ፤ ዳሮ ቢታይ ባይና ድራዉ፥ ሄ ዘረይ ኤለካ ዶሌዳ። 6 ሽን አዋይ ከሴዳ ዎደ ጫርሻይ ሹሌዳ፤ አዱሳ ጻጱዋ የድቤና ድራዉ መል አጌዳ። 7 እት እት ዘረይ አጉን ግዶን ዎዳ፤ ሄዋን ዶሌዳዋ አጉንይ ድጪደ ጩሌዳ። 8 እት እት ዘረይ ቱኤ ቢታን ዎደ ዶሌዳ፤ እቱ ጼቱ አይፍያ፥ እቱ ኡሱፑን ታሙዋ፥ እቱ ሀታሙዋ አይፌዳ። 9 ስስያ ሀይይ ደእያ ኡራይ ስሶ!" ያጌዳ።

10 የሱሳ ካልያዋንቱ አኮ ሺቂደ፥ "ኔን አያዉ አሳዉ ሌምሱዋን ኦዳይ?" ያጌድኖ።

11 የሱስ ዛሪደ፥ ኡንቱንቶ ሀዋዳን ያጌዳ፤ "ህንተንቶ ሳሉዋ ካዉተ ጹራ ኤሩሳይ እመቴዳ፤ ሽን ኡንቱንቶ እመትቤና። 12 አያዉ ጎፐ፥ ደእያዎ ጉጀታና፤ አዉ ዳራናዋ፤ ሽን ባይናዋፐ ሀራይ አቶ፥ ሄ ደእያዌካ አከታናዋ። 13 ታን ኡንቱንቱ ጼሊደ ጼለናዋዳን፥ ስሲደ ስሰናዋዳን ሀንያ ድራዉ፥ ዎይ ቃይ አኬከና ድራዉ ኡንቱንቶ ሌምሱዋን ኦዳይ።

14 "እስያስ ኡንቱንቱባ ሀዋዳን ኦዶዌ ፖለታናዋ፤

" ‘ህንተንቱ ስሳ ስሳና፤

ሽን ህንተንቶ ገለና፤

ህንተንቱ ጼላ ጼላና፤

ሽን በእክታ።✝

15 አያዉ ጎፐ፥ ሀ አሳ ዎዛናይ ጉዙሜዳ፤

ባረንቱ ሀይ ቱልሴድኖ፤

ባረንቱ አይፍያካ ጪሉሜድኖ።

ሀዌ ባዌንቶ፥ ኡንቱንቱ ባረንቱ አይፍያን በአና፤

ባረንቱ ሀይን ስሳና፤

ባረንቱ ዎዛናንካ አኬካና፤

ኡንቱንቱ ታኮ፥ ጾሳኮ ስማና፤

ታንካ ኡንቱንታ ፓና’

ያጌ።

16 "ሽን ህንተንቱ አይፊ ጼልያ ድራዉነ ህንተንቱ ሀይይካ ስስያ ድራዉ፥ ህንተንቱ አንጀቴዳዋንታ። 17 ታን ህንተንቶ ቱሙዋ ኦዳይ፤ ዳሮ ናባቱነ ጽላቱ ህንተንቱ በእያዋ በአናዉ አሞቴድኖ፤ ሽን በእበይክኖ። ህንተንቱ ስስያዋ ስሳናዉ አሞቴድኖ፤ ሽን ስስበይክኖ።

18 "ስም ካ ዘርያዋ ሌምሱዋ ብለይ ግያዋ ስስተ። 19 ካዉተ ቃላ ስሲደ፥ አኬከና ኦንነ ኦግያ ዶናን ዎዳ ዘረ ማላ፤ ጻላህያ ካፑ ዪደ፥ ኡንቱንቱ ዎዛናን ዘረቴዳዋ ማጽ ድጌ። 20 አንጮ ቢታን ዎዳ ዘረይ ቃላ ስሲደ፥ ኤለካ ናሸቻን አክያዋንታ ማላቴ። 21 ሽን ሄ አሳቱ ሀእሳፐ አትን፥ ኡንቱንቱን ጻጱ ባዋ፤ ቃላ ጋሱዋን መቱ ዎይ የደሳይ ይያ ዎደ፥ ኤለካ በት አጊኖ። 22 ቃይ አጉን ግዶን ዎዳዌ ቃላ ስስያዋ በሴ፤ ሽን ሀ ሳኣ ደኦ ህርጉሳይነ ዱረተ ሲቁሳይ ቃላ ጩሌ፤ ሀ ጋሱዋን ሄ ዘረይካ አይፈናን አት አጌ። 23 ቱኤ ቢታን ዘረቴዳዌ፥ ቃላ ስሲደ፥ አኬክያ አሳ በሴ፤ እካ አይፌ፤ እቱ ጼቱዋ፥ እቱ ኡሱፑን ታሙዋ፥ እቱ ሀታሙዋ አይፌ" ያጌዳ።

24 የሱስ ኡንቱንቶ ሀራ ሌምሱዋ ሀዋዳን ያጊደ ኦዴዳ፤ "ሳሉዋ ካዉተይ ባረ ጎሻን ሎኦ ዘረ ዘሬዳ ብታንያ ማላቴ። 25 ሽን ቃማ አሳይ ገምእሽድግና፥ አ ሞርኪ ዪደ፥ ዛርጋ ዘሬዳዋ ቦላ ዛርንግያ ዘሪደ ቤዳ። 26 ሽን ዛርጋይ ዶል አይፌዳ ዎደ፥ ዛርንጊ ሄ ዎደ ቤቴዳ።

27 "አ ቆማቱ አኮ ዪደ፥ ‘ጎዳዉ፥ ኔን ነ ጎሻን ሎኦ ዘረ ዘራበይኪ? ያትና፥ ዛርንጊ ሀቃፐ ዬዴ?’ ያጌድኖ።

28 "ሄዋፐ ጉይያን ጎዳይ፥ ‘ሄዋ ሞርኪ ኦዳ’ ያጌዳ።

ቆማቱ፥ ‘ኑን ቢደ ሾዳናዳን ዶሳይ?’ ያጌድኖ።

29 "ሽን እ፥ ‘አግተ፥ ዛርንግያ ህንተንቱ ሾዲደ፥ ዛርጋና ሾዳንታ። 30 ቦቾፕተ፤ ቆይጭያ ዎዲ ጋካናዉ፥ እትፐ ድጭኖ። ቆይጭያ ዎዲ ጋኮደ፥ ታን ቆይጭያዋንታ፥ ካሰቲደ ዛርንግያ ማጽተ፤ ታማን ጉዳናዉ ፖችያን ፖችያን ቃችተ፤ ሽን ዛርጋ ሺሺደ ድይያን ቆልተ’ ጋና" ያጌዳ።

31 የሱስ ኡንቱንቶ ሀራ ሌምሱዋ ያጊደ ኦዴዳ፤ "ሳሉዋ ካዉተይ ሳናፍጭያ ጌተትያ ጉ ምት አይፍያ ማላቴ፤ ሄ ምት አይፍያ አሳይ አኪደ፥ ባረ ጎሻን ዘሬዳ። 32 ሄ ዘረታ ሀራ ዘረ ኡባፐ ጉጻዉ፤ ሽን ድጬዳ ዎደ፥ ሀራ አታክልትያ ኡባፐ ዳራዉ፤ ካፉ ዪደ፥ እዝ ቃንካን ኬጽያዋ ኬና ዎጋ ም ግዳዱ" ያጌዳ።

33 ቃይ የሱስ ሀራ ሌምሱዋ ኡንቱንቶ ያጊደ ኦዴዳ፤ "ሳሉዋ ካዉተይ እት ምሽራታ ሄዙ ከርያ ልያ አካደ፥ ሙናቄዳ ሙናቃይ ኡባይ ደንዳና ጋካናዉ፥ አን ትጌዳ እርሹዋ ማላቴ" ያጌዳ።

34,35 የሱስ አሳዉ ሄ ኡባ ሌምሱዋን ኦዴዳ፤ ሌምሱ ባይናን እ እትባካ ኦደና፤ ናቢ፥

"ታን ኡንቱንቶ ሃሳይያ ዎደ፥

ሌምሱዋን ሃሳያይ።

አላሚ መቶደፐ ዶሚደ

ጌሜዳ የዋቱዋ ኦዳይ"✝

ያጌዳዌ ፖለታና ማላ፥ ሄዋ እ ኦዴዳ።

36 ሄዋፐ ጉይያን፥ የሱስ አሳ አጊደ፥ ሶይ ገሌዳ፤ አ ካልያዋንቱ አኮ ቢደ፥ "ጎሻን ደእያ ዛርንግያ ሌምሱዋ ብለ ኑዉ ኦዳ" ያጌድኖ።

37 የሱስ ዛሪደ፥ ሀዋዳን ያጌዳ፤ "ሎኦ ዘረ ዘርያዌ አሳ ናኣ፤ 38 ጎሻይ ሀ አላምያ፤ ሎኦ ዘረይ ጾሳ ካዉተ አሳ፤ ዛርንጊ ጻላህያ ካፑዋ ናና። 39 ዛርንግያ ዘሬዳዌ ሞርክያ ጻላህያ፤ ቆይቻ ዎዲ፥ ዎድያ ዉርሰ፤ ቃይ ቆይጭያዋንቱ ኪታንቻቱዋ።

40 "ሄዋ ድራዉ፥ ዛርንግያ ማጺደ፥ ታማን ጉድያዋዳን፥ ዎድያ ዉርሰን ሄዋ ማላ ግዳናዋ። 41 አሳ ናአይ፥ ኪታንቻቱዋ ኪታናዋ፤ ኡንቱንቱ አ ካዉተ ግዶን ናጋራዉ ጋሶ ግድያ ኡባቱዋነ ኢታባ ኦያዋንታ ማጺደ ከሳናዋንታ። 42 ያቲደ ቶኤና ታማን ኦላናዋንታ፤ ሄዋን ኡንቱንቱ ዬካናዋንታነ አቻ ቃናዋንታ። 43 ሄ ዎደ ጽላቱ ባረንቱ አቡ ካዉተን አዋዳን ፖአና። ስስያ ሀይይ ደእያ ኡራይ ስሶ!

44 "ሳሉዋ ካዉተይ ጎሻን ሞገቴዳ ሚሻ በሴ፤ እት ብታኒ ሄ ሚሻ ደሚደ፥ ዛሪደ ሞግ አጌዳ፤ ዳሮ ናሸቲደ ቢደ፥ ባረዉ ደእያዋ ኡባ ዛልኢደ፥ ሄ ጎሻ ሻሜዳ።

45 "ቃይ ሳሉዋ ካዉተይ እንቁዋ ጌተትያ ዳሮ አልኦ ሹቻ ሻማናዉ ኮይያ ዛልአንቻ ማላቴ። 46 ሄ ዛልአንቻይ ዳሮ አልኦ እንቁዋ ደሚደ፥ ቢደ ባረዉ ደእያዋ ኡባ ዛልኢደ፥ አ ሻሜዳ።

47 "ቃይ ሳሉዋ ካዉተይ ኡባ ቆሞ ሞልያ ኦይቂያ፥ አባን የገቴዳ ዳባ ማላቴ። 48 ሞሊ ዳባ ኩሜዳ ዎደ፥ ሞልያ ኦይቂያ አሳቱ አባፐ ጋጻ ከሲደ ኡቴድኖ፤ ያቲደ ሎኦ ሞልያ ቆሪደ፥ የግያ ሚሻን የጌድኖ፤ ሽን ኢታ ሞልያ ዎራ ኦሌድኖ። 49 ዎድያ ዉርሰን ሄዋዳን ሀናና፤ ኪታንቻቱ ዪደ፥ ናጋራንቻቱዋ ጽላቱዋ ግዶፐ ቆሪደ፥ 50 ቶኤና ታማን ኦላናዋንታ፤ ሄዋን ኡንቱንቱ ዬካናዋንታነ አቻ ቃናዋንታ።

51 "ሀዌ ኡባይ ህንተንቶ ገሌዴ?" ያጊደ ኡንቱንታ ኦቼዳ።

ኡንቱንቱ፥ "ኤ" ያጌድኖ።

52 እ፥ "ሄዋ ድራዉ፥ ሳሉዋ ካዉተ ጹራ ሎይ ኤርያ፥ ህግያ ታማርስያ ኡባይ፥ ባረ ሚሻ ሺሽ ዎዳ ጎልያፐ ኦራ ሚሻነ ኤጫ ሚሻ ሻክ ከስያ እዛዋ ማላቴ" ያግ ዛሬዳ።

53 የሱስ ሀ ሌምሳቱዋ ኦድ ዉርሶዋፐ ጉይያን፥ ሄዋፐ ደንዲደ፥ 54 ባረ ካታማ ናዝሬተ ቤዳ። አይሁዳ ዎሳ ጎለን ታማርስያዋ ስሴዳ አሳይ ማላለቲደ፥ ሀዋዳን ያጌዳ፤ "ሀዌ ሀ አ ኤራተነ ጾሳይ ኦያ ማላታ ኦናዉ ዎልቃ ሀቃፐ አኬዴ? 55 ሀዌ አናጽያ ናኣ ግደኔ? አ ዳያ ማይራሞ ግደኬ? አ እሻቱ ያቆባ፥ ዮሴፎ፥ ስሞናነ ይሁዳ ግድክኖ? 56 አ ምቻቱ ኡባይ ኑናና ደእክኖ? ያትና፥ እ ሀ ኤራ ኡባ ሀቃፐ ደሜዴ?" ያጌድኖ። 57 ኡንቱንቱ እ ግያባ አከናን እጼድኖ።

ሽን የሱስ ሄ አሳዉ፥ "ናቢ ባረ ጋድያንነ ባረ ሶይ አሳን ቦንቼተና፤ ሽን ሀራሳ ኡባን ቦንቼቴ" ያጌዳ። 58 ኡንቱንቱ አማንቤና ድራዉ፥ የሱስ ዳሮ ማላታ ሄ ሳን ኦቤና።