1 ሄ ዎደ ጋሊላ ጋድያ አይስያ ሄሮድሰ የሱሳባ ስሴዳ፤ 2 ያቲደ ባረ ቆማቶ፥ "ሀዌ ሀይቁዋፐ ደንዴዳ ጻማቅያ ዮሃንሳ፤ ጾሳይ ኦያ ዎልቃማ ማላታ እ ኦያዌ ሄዋሳ" ያጌዳ።

3 አያዉ ጎፐ፥ ሄሮድስ ባረ እሻ ፕልጶሳ ማቻት ሄሮድያድ ጋሶታን ዮሃንሳ ኦይ ቃሽሲደ፥ ቃሾ ጎለን የግ ዎዳ። 4 አያዉ ጎፐ፥ ዮሃንስ ሄሮድሳ፥ "ኔን ሄሮድያዶ፥ ነ እሻ ማቻቶ አካናዉ ህጊ ድጌ" ያጌዳ።✝ 5 ሄሮድስ ዮሃንሳ ዎናዉ ኮዬዳ፤ ሽን ይሁዳ አሳይ ናብያዳን ዮሃንሳ ጼሌዳ ድራዉ፥ አሳዉ ያዬዳ።

6 ሽን ሄሮድስ የለቴዳ ጋላሳ ባላይ ጋክና፥ ሄሮድያድ ናታ አሳ ስንን ዱራደ ሄሮድሳ ናሸቻዉ። 7 ሄሮድስ ናቶ፥ "ኔና ሎኤዳዋ አያነ ግዶፐ፥ ታና ኦቻ፤ ታን ነዉ እማና" ያጊደ እዝዉ ጫቄዳ። 8 ናታ ባረ ዳይ ዞርያ አካደ ሄሮድሳ፥ "ጻማቅያ ዮሃንሳ ሁጲያ ሀ ዎጪትያን ዎደ ታዉ እማ" ያጋዱ። 9 ካቲ አዉ ቃረቴዳ፤ ሽን ባረ ጫቁዋ ድራዉነ ባረናና ማዳን ኡቴዳ እማ ድራዉ፥ እዝዉ ዮሃንሳ ሁጲ እመታና ማላ አዛዜዳ። 10 ካቲ ኪቲደ፥ ዮሃንሳ ቆያ ቃሾ ጎለን ሙጭሴዳ። 11 ሁጲያ ዎጪትያን ዎ አሂደ፥ ናትዉ እሜድኖ፤ ናታ ሄ ሁጲያ ባረ አትኮ አፋዱ። 12 ዮሃንሳ ካልያዋንቱ ዪደ፥ አ አሃ አፊደ ሞጌድኖ፤ ሄዋፐ ስሚደ ሀ የዉዋ የሱሳዉ ቢደ ኦዴድኖ።

13 የሱስ ሄዋ ስሲደ፥ ዎንግርያን ገሊደ፥ ሄዋፐ ባረካ አሳይ ባይናሳ ቤዳ፤ አሳይ ሄዋ ስሲደ፥ ካታማፐ ደንዲደ፥ ገድያን አ ካሌድኖ። 14 የሱስ ዎንግርያፐ ከሴዳ ዎደ፥ ዳሮ አሳ በኢደ፥ ሄ አሳዉ ቃረቴዳ፤ ያቲደ ኡንቱንቱና ደእያ ሀርጋንቻቱዋ ፓዳ።

15 ሳአይ ኦማርስያ ዎደ፥ የሱሳ ካልያዋንቱ አኮ ዪደ፥ "ሀዌ ሳአይ አሳይ ባይናሳ፤ ሀእ ሳአይ ቃም ድጌዳ፤ አሳይ ኡባይ ቄር ካታማቱዋ ቢደ፥ ባረንቶ ቁማ ሻማና ማላ፥ አሳ ሞይዛ" ያጌድኖ።

16 ሽን የሱስ ኡንቱንታ፥ "አሳይ ባናዉ ኮሸና፤ አሳዉ ሜተትያባ ህንተንቱ እምተ" ያጌዳ።

17 ኡንቱንቱ ዛሪደ አ፥ "ኑዉ ሀዋን እቼሹ ኡክፐነ ላኡ ሞልያፐ አትን፥ ሀራይ ባዋ" ያጌድኖ።

18 የሱስ ኡንቱንታ፥ "ሄዋንታ፥ ሃ ታኮ አህተ" ያጌዳ። 19 አሳይ ማታን ኡታና ማላ፥ የሱስ አዛዜዳ፤ እቼሹ ኡክነ ላኡ ሞልያ ኦይቂደ፥ ሳሉዋ ፑደ ጼሊደ፥ ጾሳ ጋላቴዳ፤ ሄ ኡክ መንደ፥ ባረና ካልያዋንቶ እምና፥ ኡንቱንቱ ጮራ አሳዉ ግሼድኖ። 20 አሳይ ኡባይ ሚደ ካሌዳ፤ አቴዳ ሱፓ ዶካ ታማነ ላኡ ዛምቤልያ ኩሜዳዋ ደንድኖ። 21 ሜዳ አሳይ ማጫ አሳነ ናና ፓይደናን፥ እቼሹ ሻኣ ግድያዋ ኬና።

22 የሱስ ጮራ አሳ ሞይዚደ፥ ባረና ካልያዋንታ ዎንግርያን ገሊደ፥ ባረፐ ስንቲደ፥ አባፐ ሄፍን ፕናና ማላ አዛዜዳ። 23 አሳ ሞይዚደ፥ ጾሳ ዎሳናዉ ደርያ ሁጲያ ባረካ ከሴዳ፤ ሳአይ ቃም ድግናካ ሄዋን ባረካ ደኤ። 24 ሽን ዎንግሪ ሄ ዎደ፥ አባ ቦላን ደእሽን፥ ስን ባጋና ጫርኩ ጫርክያ ድራዉ፥ ቤታይ ዎንግርያ ያነ ሃነ ሱጌ።

25 ባይራ ኩቱ ዋስ ስምና፥ የሱስ አባ ቦላ ሀመቲደ፥ ኡንቱንቱኮ ዬዳ። 26 አ ካልያዋንቱ አባ ቦላ እ ሀመትሽን በእ ዳጋሚደ፥ "ሀዌ ሞይትልያ ግደኔ!" ግ ያዪደ ዋሴድኖ።

27 ሽን የሱስ ኤለካ ኡንቱንታ፥ "አይነ ባዋ፤ ታናተ፤ ያዮፕተ!" ያጌዳ።

28 ጰጽሮስ ዛሪደ አ፥ "ታ ጎዳዉ፥ ሀዌ ኔና ግዶፐ፥ ታን ሃ ቦላና ኔኮ ባና ማላ፥ ታና አዛዛርኪ" ያጌዳ።

29 የሱስ ጰጽሮሳ፥ "ሃያ!" ያጌዳ።

ጰጽሮስ ዎንግርያፐ ዎደ፥ ሃ ቦላና ሀመቲደ፥ የሱሳኮ ቡሳ ዶሜዳ። 30 ሽን ጫርኩዋ ዎልቃ በኢደ፥ ያዬዳ፤ ሃይ ባረና ምቱዋ ዶሜዳ ዎደ፥ ባረ ኮሻ ቁ ኦደ፥ "ታ ጎዳዉ ታና አሻርኪ!" ያግ ዋሴዳ።

31 ሄ ማንእያን የሱስ ባረ ኩሽያ የድ ጰጽሮሳ ኦይቂደ፥ "ላ ሀ አማኑ ላፌዳዎ! አያዉ ስዲ?" ያጌዳ።

32 ኡንቱንቱ ላኡ ዎንግርያን ገሌዳ ዎደ፥ ጫርኩ ዎፑ ጌዳ። 33 ዎንግርያ ግዶን ደእያ አ ካልያዋንቱ የሱሳ፥ "ኔን ጾሳ ናኣ ግዴዳዌ ቱማ" ያጊደ አዉ ጎይኔድኖ።

34 ኡንቱንቱ አባ ፕኒደ፥ ገንሳሬጻ ጌተትያ ጋድያ ጋኬድኖ። 35 ሄ ጋድያ አሳይ የሱሳ ግድያዋ ኤሬድኖ፤ ሄዋ ሄራ ጋድያ ኡባ ኪቲደ፥ ሀርግያ አሳ ኡባ አኮ አሄድኖ። 36 ሀርግያ አሳይ አ ማዩዋ ማጫራ ጻላላ ቦቻና ማላ፥ አ ዎሴድኖ፤ አ ማዩዋ ማጫራ ቦቼዳ ኡባይካ ፓጼዳ።