1 ሄዋፐ ጉይያን፥ ህግያ ታማርስያ እት እት አሳይነ ፓርሳዋቱ የሩሳላመፐ የሱሳኮ ዪደ፥ 2 "ኔና ካልያዋንቱ አያዉ ኑ አዎቱዋ ዎጋ ባይዚኖ? አያዉ ጎፐ፥ ኡንቱንቱ ቁማ ማናፐ ካሰቲደ፥ ባረንቱ ኩሽያ ሜጨትክኖ" ያጌድኖ።

3 የሱስ ዛሪደ፥ ኡንቱንታ ሀዋዳን ያጌዳ፤ "ህንተንቱ ህንተ ዎጋ ድራዉ፥ ጾሳ አዛዙዋ ፖልያዋ አያዉ እጺቴ? 4 አያዉ ጎፐ ጾሳይ፥ ‘ነ አባነ ነ ዳዮ ቦንቻ’ ቃይ፥ ባረ አባ ዎይ ባረ ዳዮ ቦርያዌ ሀይቆ ያጌዳ።✝ 5,6 ሽን ህንተንቱ፥ ‘እት አሳይ ባረ አባ ዎይ ባረ ዳዮ ማድያባይ ባረዉ ደኢና፥ ሄዌ ጾሳዋ ጎፐ፥ ባረ አባ ዎይ ባረ ዳዮ ቦንቻናዉ በሰና’ ያጊታ፤ ያቲደ ህንተንቱ ህንተንቱ ዎጋ ፖላናዉ ጾሳ ቃላዉ አዛዘትክታ። 7 ሀ ሎአ ማላትያ ኢታ አሳቶ፥ እስያስ ባለናን ህንተንቱባዉ ትምቢትያ ኦዲደ፥

8 " ‘ጾሳይ ሀዋዳን ያጌዳ፤

"ሀዌ አሳይ ታና፥

ባረ ቦላ ዶናን ቦንቼ፤

ሽን ኡንቱንቱ ዎዛናይ፥

ታፐ ሃኩዋን ደኤ።

9 አሳይ ታዉ መላ ጎይኔ፤

አያዉ ጎፐ፥ አሳይ ኦዳ አዛዙዋ፥

ጾሳ ህግያ ማላትሲደ፥

ታማርሴድኖ" ጌዳ’ "

ያጌዳ።✝

10 የሱስ ዳሮ አሳ ባረኮ ጼሲደ፥ "ስስተነ አኬክተ፤ 11 አሳ ቱንስያዌ ዶና ግዶ ገልያዋ ግደና፤ ሽን አሳ ቱንስያዌ ዶናፐ ከስያዋ" ያጌዳ።

12 ሄዋፐ ጉይያን፥ አ ካልያዋንቱ አኮ ዪደ፥ "ፓርሳዋቱ ኔን ሃሳዬዳዋ ስሲደ፥ ሀንቀቴዳዋ አኬካይ?" ያጌድኖ።

13 ሽን የሱስ ዛሪደ፥ "ሳሉዋን ደእያ ታ አቡ ቶክቤና ም ኡባይ ሾደታናዋ። 14 ኡንቱንቶ ህርጎፕተ፤ ኡንቱንቱ ቆቃ ካለያ ቆቃቱዋ፤ ቆቃይ ቆቃ ካለፐ፥ ላኡካ ኦላን ኩንዴ" ያጌዳ።

15 ጰጽሮስ ዛሪደ፥ "ሀ ሌምሱዋ ብለ ኑዉ ኦዳርኪ" ያጌዳ።

16 የሱስ ኡንቱንታ ሀዋዳን ያጌዳ፤ "ህንተንቶ ቃይ ሀእ ጋካናዉካ ገልቤኔ? 17 ዶናና ገልያ ኡባይ ኡሉዋ ግዶ ቢደ፥ ቃይ ኡሉዋፐ ካረ ከስያዋ ኤርክቴ? 18 ሽን ዶናፐ ከስያዌ ዎዛናፐ ከሴ፤ አሳ ቱንስያዌ ሄዋ ማላ። 19 አያዉ ጎፐ፥ ዎዛና ግዶፐ ኢታ ቆፋይ፥ ዎያዌ፥ ዎሹምያዌ፥ ቃይ ዎሹማናዉ ካጄልያዌ ኡባይ፥ ዉእያዌ፥ ዎርዱዋን ማርካትያዌ፥ ቦሪ ከሴ። 20 ሄዋ ማላትያዌ አሳ ቱንስያዋፐ አትን፥ ሜጭቤና ኩሽያን ምያዌ አሳ ቱንሰና" ያጌዳ።

21 ሄዋፐ ጉይያን፥ የሱስ ሄዋፐ አጊደ፥ ጺሮሳነ ሲዶና ጌተትያ ካታማቱ ደእያ ጋድያ ቤዳ። 22 ካናነ ጌተትያ ጋድያ ማጫዉና እትና ሄዋፐ የሱሳኮ ያደ፥ ባረ ኮሻ ቁ ኦደ፥ "ታ ጎዳዉ፥ ዳዊታ ናአዉ፥ ታዉ ቃረታርኪ፤ ታ ናቶ ኢታ አያናይ ሎኤና ኦይ ኦይቄዳ" ያጋዱ።

23 ሽን የሱስ እዝዉ አይ ቃላነ ቃትቤና፤ አ ካልያዋንቱ አኮ ዪደ፥ "ሀ ምሽራታ ኑ ጌዱዋ ካላ ካላደ፥ ባረ ኮሻ ቁ ኦደ ኦዳዉ፤ ሄዋ ድራዉ፥ ኔን እዞ የዳርኪ" ያጊደ ዎሴድኖ።

24 የሱስ ዛሪደ፥ "ታን ባዬዳ ዶርሳዉ፥ እስራኤልያ አሳ ጻላላዉ ኪተታድ" ያጌዳ።

25 ሽን እዛ ያደ፥ "ታ ጎዳዉ፥ ታና ማዳርኪ!" ያጋደ አዉ ጎይናዱ።

26 ቃይ እ ዛሪደ፥ "ናና ቁማ አኪደ፥ ካና ማራዉ ኦልያዌ ሎአ ግደና" ያጌዳ።

27 ምሽራታ፥ "ኤ ታ ጎዳዉ፥ ሄዌ ቱማ፤ ሽን ሀራይ አቶ ካና ማራቱ ባረንቱ ጎዳቱ ሚና፥ ሳምፓፐ ላለቴዳ ሱፓ ሚኖተኔ" ያጋዱ።

28 የሱስ ዛሪደ እዞ፥ "ሀ ምሽራቴ፥ ነ አማኑ ዎልቃማ፤ ኔን ኮዬዳዋዳን ነዉ ሀኖ" ያጌዳ። እዝ ናታ ኤለካ ፓጻ አጋዱ።

29 የሱስ ሄዋፐ ደንዲደ፥ ጋሊላ አባ ማታ ቤዳ፤ ቃይ እት ደርያ ቦላ ከሲደ፥ ሄዋን ኡቴዳ። 30 ዳሮ አሳይ ዎባቱዋ፥ ቆቃቱዋ፥ ቁናቱዋነ ዱደቱዋ፥ ቃይ ሀራ ጮራቱዋ አኮ አሂደ፥ አ ማታን ዎዳ። የሱስ ኡንቱንታ ፓዳ። 31 ሄዋ ድራዉ፥ አሳይ ዱዳቱ ሃሳይሽን፥ ቁናቱ ሱርሽን ዎባቱ ሀመትሽን፥ ቆቃቱ ጼልሽን በእ ማላለቲደ፥ እስራኤልያ ጾሳ ጋላቴድኖ።

32 የሱስ ባረና ካልያዋንታ ባረኮ ጼሲደ፥ "ሀ ጮራ አሳይ ታናና ሄዙ ጋላሳይ ጋካናዉ ጋምኤዳ ድራዉ፥ ታን ሀ አሳዉ ቃረታይ፤ ኡንቱንቶ ሀእ ምያዌ ባዋ። ቃይ ኡንቱንቱ ኦግያን ዳቡሪደ ኩንደና ማላ፥ ቁማ ምዘናን ኡንቱንታ መላ የዳናዉካ ኮይከ" ያጌዳ።

33 አ ካልያዋንቱ ዛሪደ የሱሳ፥ "ኑን ሀ ባዙዋን ሀዋ ኬና አሳ ካልስያ ቁማ ሀቃፐ ደማኔ?" ያጌድኖ።

34 ቃይ የሱስ ኡንቱንታ፥ "ህንተንቶ አፑን ኡክይ ደኢ?" ያጊደ ኦቼዳ።

ኡንቱንቱ፥ "ላፑ ኡክይነ ሞለቱዋፐ አማሬዳዋንቱ ደኢኖ" ያጌድኖ።

35 የሱስ አሳ፥ "ሳኣን ኡትተ" ያጌዳ። 36 ሄ ላፑ ኡክነ ሞልያ ኦይቂደ፥ ጾሳ ጋላቴዳ፤ መንሬደ ባረና ካልያዋንቶ እሜዳ፤ ቃይ ኡንቱንቱ ጮራ አሳዉ እሜድኖ።

37 አሳይ ኡባይ ሚደ ካሌዳ፤ ሚና አቴዳ ላፑ ዛምቤልያ ኩሜዳ ሱፓ አ ካልያዋንቱ ደንድኖ። 38 ሜዳ አሳይ ማጫ አሳነ ናና ፓይደናን፥ ኦይዱ ሻአ አቱማ አሳ። 39 የሱስ አሳ የዶዋፐ ጉይያን፥ ዎንግርያን ገሊደ፥ መገዶነ ጌተትያ ጋድያ ቤዳ።