1 እት እት ፓርሳዋቱነ ሳዱቃዋናቱ የሱሳኮ ዪደ፥ አ ፓጫናዉ ኮዬድኖ፤ ያቲደ ባረንታ ሳሉዋፐ ማላታ በሳና ማላ ዎሴድኖ። 2 ሽን የሱስ ዛሪደ፥ ኡንቱንታ ሀዋዳን ያጌዳ፤ "ሳአይ ቃምያ ዎደ ህንተንቱ፥ ‘ሳሉ ዞኤዳ ድራዉ፥ ሳአይ ሻማናዋ’ ያጊታ፤ 3 ዎንቱማን ቃይ፥ ‘ሳሉ ዞኢደ ጉባኔዳ ድራዉ፥ ሀቼ እራይ ቡካናዋ’ ያጊታ፤ ሳሉዋ ጼሊደ፥ ሳአይ ሀናናዋ ኤራናዉ ዳንዳዪታ፤ ሽን ታ ዩሳ ዎድያ ማላታ ሻክ ኤራናዉ ዳንዳይክቴ?* 4 ሀ ዎድያ አሳይ ኢታይነ ዎሹምያዌ፥ ጾሳዉ አማነተናዌ፥ ማላታ ኮዬ፤ ናብያ ዮናሳ ማላታፐ አትን፥ ሀራ ማላታይ አዉ እመተና" ያጌዳ። ሄዋፐ ስሚደ፥ ኡንቱንታ አጊደ ቤዳ።

5 አ ካልያዋንቱ አባ ፕኔዳ ዎደ፥ ቁማ አፋናዋ ዶጌድኖ። 6 የሱስ ኡንቱንታ፥ "ፓርሳዋቱዋ እርሹዋፐነ ሳዱቃዋናቱዋ እርሹዋፐ ህንተንታ ኤሪደ ናገትተ" ያጌዳ።

7 ኡንቱንቱ ባረንቱ ግዶን፥ "እ ሀዋ ያግያዌ ኑን ቁማ አህቤና ድራሳ" ያጊደ ሃሳያ ዶሜድኖ።

8 ሽን ኡንቱንቱ ግያዋ የሱስ ኤሪደ፥ "ሀ አማኑ ፓጬዳዋንቶ፥ ቁማይ ባይና ድራዉ፥ አያዉ ህንተንቱ ግዶን ሃሳዪቴ? 9 ሀእካ ህንተንቶ ገልቤኔ? ታን እቼሹ ኡክ እቼሹ ሻአ አሳ ምዛደ ካልሴዳዋ፥ ቃይ ህንተንቱ አፑን ዛምቤልያ ኩንደ አቴዳ ሱፓ ደንድተንቶ ዎዛና አክቴ? 10 ዎይ ታን ላፑ ኡክ ኦይዱ ሻአ አሳ ምዛ ካልሴዳዋ፥ ቃይ ህንተንቱ አፑን ዛምቤልያ ኩንደ አቴዳ ሱፓ ደንድተንቶ ዎዛና አክቴ? 11 ታን ህንተንታ ፓርሳዋቱዋ እርሹዋፐነ ሳዱቃዋናቱዋ እርሹዋፐ ናገትተ ግያዋፐ አትን፥ ኡክባ ህንተንቶ ሃሳያቤናዋ ህንተንቱ ዋኒደ አኬክክቴ?" ያጌዳ።

12 አ ካልያዋንቱ የሱስ ባረንቶ ኦዴዳዋ፥ ፓርሳዋቱዋ ትምርትያፐነ ሳዱቃዋናቱዋ ትምርትያፐ ኡንቱንቱ ናገታና ማላ ኦደቶዋፐ አትን፥ ሙናቃን ትግያ እርሹዋፐ ናገታና ማላ ግደናዋ ሄ ዎደ አኬኬድኖ።

13 የሱስ ቂሳርያ ፕሊጶሳ ጌተትያ ጋድያ ጋኬዳ ዎደ፥ ባረና ካልያዋንታ፥ "አሳይ ታና፥ አሳ ናኣ ኦና ጊ?" ያጊደ ኦቼዳ።

14 አ ካልያዋንቱ ዛሪደ፥ "ኔና እት እት አሳይ፥ ጻማቅያ ዮሃንሳ ያጌ፤ ሀራንቱ ቃይ ኤላሳ ያጊኖ፤ ቃይ ሀራንቱ ኤርማሳ ዎይ ናባቱዋፐ እቱዋ ያጊኖ" ያጌድኖ።

15 የሱስ ኡንቱንታ፥ "ያትና ህንተንቱ ታና ኦና ጊቴ?" ያጌዳ።

16 ስሞን ጰጽሮስ ዛሪደ፥ "ኔን ደኡዋ ጾሳ ናኣ ክርስቶሳ" ያጌዳ።

17 የሱስ ዛሪደ፥ ሀዋዳን ያጌዳ፤ "ዮና ናኣ ስሞና፥ ሀዋ ነዉ ሳሉዋን ደእያ ታ አቡ ኤርሴዳዋፐ አትን፥ አሳይ ኦንነ ኔና ኤርስቤና ድራዉ፥ ኔን አንጀቴዳዋ። 18 ጰጽሮሳ፥ ታን ነዉ ኦዳይ፤ ኔን ሹቻ፤ ታን ሀ ዛላ ቦላ ታ ዎሳ ጎልያ ኬጻና፤ ታ ዎሳ ጎልያ ሀራይ አቶ፥ ስኦልያ ዎልቃይካ ጾናናዉ ዳንዳየና። 19 ታን ነዉ ሳሉዋ ካዉተ ቁልፕያ እማና፤ ኔን ሳኣን ሀኖ ጎዌ ኡባይ ሳሉዋን ጾሳ ስንን ሀናና፤ ሽን ኔን ሳኣን ሀኖፖ ጌዳዌ ሳሉዋንካ ሀነና" ያጌዳ።

20 ሄዋፐ ጉይያን፥ እ ክርስቶሳ ግዴዳዋ አ ካልያዋንቱ ኦስነ ኦደና ማላ፥ ኡንቱንታ አዛዜዳ።

21 ሄ ዎድያፐ ዶሚደ የሱስ፥ "ታን የሩሳላመ ቢና፥ ታና ጭማቱ፥ ቄሳቱዋ ካፓቱነ ህግያ ታማርስያዋንቱ ዳሪ ዋይሳናዉ በሴ፤ ኡንቱንቱ ታና ዎናዉነ ታን ሄዘን ጋላስ ሀይቁዋፐ ደንዳናዉ በሴ" ያጊደ፥ ባረና ካልያዋንቶ ጌሺደ ኦዱዋ ዶሜዳ።

22 ጰጽሮስ አ እት ባጋ ዛሪደ፥ "ታ ጎዳዉ፥ ጾሳይ ኔና ሄዋፐ አሾ፤ ሀዌ ነ ቦላ ኡባካ ዬና" ያጊደ አ ዞራናዉ ዶሜዳ።

23 ሽን የሱስ ጉየ ስሚደ ጰጽሮሳ፥ "ሀ ሴጻናዉ፥ ኔን ታ ማታፐ ክቻ፤ ኔን አሳይ ዶስያዋ ቆፕያዋፐ አትን፥ ጾሳይ ዶስያዋ ቆፐና ድራዉ፥ ታዉ ቦ ግዳዳ" ያጌዳ።

24 ሄዋፐ ጉይያን፥ የሱስ ባረና ካልያዋንታ ሀዋዳን ያጌዳ፤ "ታና ካላናዉ ኮይያ ኡራይ ደኦፐ፥ ባረና ካዶ፤ ያቲደ ባረ ማስቃልያ ቶኪደ፥ ታና ካሎ። 25 አያዉ ጎፐ፥ ባረ ሸምፑዋ አሻናዉ ኮይያ ኡራይ ባይዛናዋ፤ ሽን ባረ ሸምፑዋ ታ ድራዉ ባይዝያ ኡራይ አሻናዋ። 26 እት ኡራይ ሳኣን ደእያ ኡባባ ባረዉ ሺሺደ፥ ባረ ሸምፑዋ ባይዞፐ፥ አ አያ ማዳኔ? ዎይ እት ኡራይ ባረ ሸምፑዋ ዎዛናዉ አያ እማና ዳንዳዪ? 27 አያዉ ጎፐ፥ ታን፥ አሳ ናአይ፥ ታ አቡ ቦንቹዋን ታ ኪታንቻቱዋና ያና ሀናይ፤ አሳ ኡባዉ ሄ ዎደ አ ኦሱዋ ጋትያ እማና።✝ 28 ታን ህንተንቶ ቱሙዋ ጋይ፤ አማሬዳ አሳቱ፥ ታን፥ አሳ ናአይ፥ ካትያ ግዳደ ይያዋ በአና ጋካናዉ፥ ሀይቀናዋንቱ ሀዋን ደኢኖ" ያጌዳ።