1 የሱስ ኡሱፑን ጋላሳፐ ጉይያን፥ ባረናና ጰጽሮሳ፥ ያቆባነ፥ ያቆባ እሻ ዮሃንሳ አኪደ፥ ኡንቱንቱ ጻላላ ዎጋ ደርያ ሁጲያ ከሴዳ።✝ 2 ቃይ ኡንቱንቱ ጼልሽን፥ ኡንቱንቱ ስንን ላመቴዳ፤ አ ዴሙ አዋይፍያዳን ፖኤዳ፤ አ ማዩካ ፖኡዋዳን ጶሌዳ። 3 ሙሴነ ኤላስ የሱሳና ሃሳይሽን፥ ሀ ሄዙ አ ካልያዋንቱ በኤድኖ። 4 ጰጽሮስ የሱሳ፥ "ታ ጎዳዉ፥ ኑን ሀዋን ደእያዌ ኑዉ ሎአ፤ ኔን ዶሶፐ፥ ኑን ሀዋን ሄዙ ዳስያ እቱዋ ነዉ፥ እቱዋ ሙሴዉ፥ እቱዋ ኤላሳዉ ኬጻና" ያጌዳ።

5 እ ሃሳይሽን፥ ፖእያ ሻሪ ዪነ ኡንቱንታ ካም አጌዳ፤ ሻርያ ግዶፐ፥ "ሀዌ ታን ሲቅያ ታና ናሸችያ ታ ናኣ፤ እ ግያዋ ስስተ" ግያ ቃላይ ዬዳ።✝

6 አ ካልያዋንቱ ሄ ቃላ ስሴዳ ዎደ፥ ዳሮ ያዪደ፥ ጉፋን አጌድኖ። 7 የሱስ ኡንቱንቱኮ ዪደ፥ ኡንቱንታ ቦቺደ፥ "ደንድተ፤ ያዮፕተ" ያጌዳ። 8 ኡንቱንቱ ቁ ጊደ ጼልያ ዎደ፥ የሱሳ ጻላላፐ አትን፥ ሀራ አሳ ኦናነ በእበይክኖ።

9 ኡንቱንቱ ደርያፐ ዎሽን፥ የሱስ ኡንቱንታ፥ "ታን አሳ ናአይ፥ ሀይቁዋፐ ደንዳና ጋካናዉ፥ ሀ ህንተንቱ በኤዳዋ ኦስነ ኦዶፕተ" ያጊደ አዛዜዳ።

10 አ ካልያዋንቱ የሱሳ፥ "ያትና፥ ህግያ ታማርስያዋንቱ አያዉ፥ ‘ኤላስ ካሰቲደ ያናዉ በሴ’ ጊኖ?" ያጊደ ኦቼድኖ።✝

11 እ ዛሪደ ያጌዳ፤ "ኤላስ ካሰት ዪደ፥ ኡባባ ጊግሳናዋ። 12 ሽን ታን ህንተንቶ ኦዳይ፤ ኤላስ ሀዋፐ ካሰ ይ ድጌዳ። ሄ ዎደ አሳይ አ፥ ባረንቶ ኮዬዳዋዳን ኡባ ኦዳዋፐ አትን አ ኤርበይክኖ፤ ሄዋዳንካ፥ ቃይ ታና፥ አሳ ናኣ፥ አሳይ ዋይሳናዋ" ያጌዳ።

13 አ ካልያዋንቱ ሄ ዎደ ባረንቶ የሱስ ጻማቅያ ዮሃንሳባ ኦድያዋ አኬኬድኖ።

14 ኡንቱንቱ ዳሮ አሳኮ ዬዳ ዎደ፥ እት ብታኒ የሱሳኮ ዪደ፥ አ ስንን ጉልባቲደ፥ 15 "ታ ጎዳዉ፥ ታ ናኣ ዎዛና ባይዝያ ሀርጊ ኦይቂና፥ እ ዳሮ ዎደ ታማን፥ ቃይ ዳሮ ዎደ ሃን ኩንድያ ድራዉ፥ እ ዳሪ ሳከቴ፤ አ ፓርኪ። 16 ኔና ካልያዋንቱኮካ አ አሃድ፤ ሽን ፓናዉ ዳንዳይበይክኖ" ያጌዳ።

17 የሱስ ዛሪደ ኡንቱንታ፥ "አማነና ሀ ዎድያ ጌላ አሳዉ! ታን ህንተናና አዉደ ጋካናዉ ደአኔ? ቃይ ህንተንቱባ አዉደ ጋካናዉ ዳንዳያኔ? ናኣ ታኮ ሃ አኪደ ዪተ" ያጌዳ። 18 የሱስ ኢታ አያና፥ "አፐ ከሳ" ጊደ አዛዝና፥ ኢታ አያናይ ናኣፐ ከስ አጌዳ፤ ኤለካ ናአይ ፓጽ አጌዳ።

19 ሄዋፐ ጉይያን፥ አ ካልያዋንቱ ባረንቱ ጻላላ የሱሳኮ ዪደ፥ "ኑን ኢታ አያና ከሳናዉ አያዉ ዳንዳይበይኮ?" ያጌድኖ።

20 የሱስ ኡንቱንታ ያጌዳ፤ "ሄዌ ህንተንቱ አማኑ ጉጼዳ ድራሳ፤ ታን ህንተንቶ ቱሙዋ ኦዳይ፤ ህንተንቶ ሳናፍጭያ ጌተትያ ጉ ምት አይፍያ ኬና አማኑ ደእንቶ፥ ህንተንቱ ሀ ደርያ፥ ‘ሀዋፐ ያ ሺቃ’ ያግንቶ እ ሺቃና፤ ህንተንቱ አያነ ኦናዉካ ዳንዳያንታ። 21 ሽን ሀዋ ማላ ዎሳፐነ ጾማፐ ሀራባይ ከሳናዉ ዳንዳየና" ያጌዳ።

22 አ ካልያዋንቱ ጋሊላን፥ እትፐ ሺቅ ኡት ደእሽን፥ የሱስ ኡንቱንታ፥ "ታና፥ አሳ ናኣ፥ አሳይ አሳዉ አደ እማና። 23 አሳይ ታና ዎናዋ፤ ሄዋፐ ጉይያን ታን ሄዘንያ ጋላስ ሀይቁዋፐ ደንዳና" ያጌዳ። አ ካልያዋንቱ ዳሮ ቃረቴድኖ።

24 የሱስነ አ ካልያዋንቱ ቅፍርናሆማ ካታማ ዬዳ ዎደ፥ ጌሻ ጎልያስ ቃራጻ አክያዋንቱ ጰጽሮሳኮ ዪደ፥ "ህንተንታ ታማርስያዌ ጌሻ ጎልያ ጊራ ጊረኔ?" ያጌድኖ።✝

25 እ ዛሪደ፥ "ጊሬ" ያጌዳ።

ጰጽሮስ ሶይ ገሌዳ ዎደ፥ የሱስ ካሰቲደ አ፥ "ስሞና፥ ነ ቆፋይ አዬ? ሀ ሳኣ ካታቱ ቃራጻ ዎይ ጊራ ኦፐ አኪኖ? ባረንቱ ጋድያ አሳፐ አኪኖ ዎይ ሀራ ጋድያ አሳፐ አኪኖ?" ያጌዳ።

26 ጰጽሮስ፥ "ሀራ ጋድያ አሳፐ አኪኖ" ያጌዳ።

የሱስ ጰጽሮሳ፥ "ያቶፐ፥ ጋድያ አሳይ ጊራናዉ በሰና። 27 ሽን ኑን ሀ አሳቱዋ ሀንቀናዉ ኮዮኮ፤ ኔን አባ ባደ አን ዳባ የጋ፤ ያታደ ኮይሮ ከስያ ሞልያ ኦይቃደ፥ አ ዶና ፖቅያ ዎደ፥ ጊራዉ ግድያ ሚሻ ኔን ደማና። ሄዋ አካደ፥ ታ ጊራነ ነ ጊራ ኡንቱንቶ እማ" ያጌዳ።