1 አ ካልያዋንቱ የሱሳኮ ሄ ዎደ ዪደ፥ "ሳሉዋ ካዉተን ኡባፐ አያዌ ኦኔ?" ያጌድኖ።

2 የሱስ እት ጉ ናኣ ጼስ ኡንቱንቱ ግዶን ኤሲደ፥ ሀዋዳን ያጌዳ፤ 3 "ታን ህንተንቶ ቱሙዋ ኦዳይ፤ ጾሳኮ ህንተንቱ ስሚደ፥ ጉ ናናዳን ሀናና ዮፐ፥ ሳሉዋ ካዉተ ኡባካ ገላናዉ ዳንዳይክታ። 4 ስም ሀ ጉ ናኣዳን፥ ባረና ካዉሽያ ኦንነ ሳሉዋ ካዉተን ኡባፐ አያዋ። 5 ቃይ ሀዋ ማላ ናኣ ታ ሱንን ሞክያ ኦንነ ታና ሞኬ። 6 ሽን ታና አማንያ ሀ ጉ ናናፐ እቱዋ ባለያ ኦንነ፥ ጋጭያ ዎጋ ዎጻ ባረ ቆያን ቃቺደ፥ አባ ጪሙዋን ምተትያዌ አዉ ሎአ።

7 "አላሚ አሳ ቢያ ድራዉ፥ ሳአዉ አየሮ፤ አያዉ ጎፐ፥ ቢያባይ ዩሳ አገና፤ ሽን ቡ አ ጋሶታን ይያ ኡራዉ አየሮ።

8 "ኔና ኩሺ ዎይ ነ ገዲ ኔና ባለፐ፥ ኔፐ ቃንጻ ኦላ፤ ኔን ላኡ ኩሽያናነ ላኡ ገድያና መና ታማን ኦለትያዋፐ ዎባ ዎይ ዱጻ ኩሽያና መና ደኡዋ ገልያዌ ነዉ ሎአ። 9 ቃይ ነ አይፊ ኔና ባለፐ፥ ኔፐ ዎጫ ከሳ ኦላ፤ ኔን ላኡ አይፍያና ጋናምያ ታማን ኦለትያዋፐ እት አይፍያና መና ደኡዋ ገልያዌ ነዉ ሎአ።

10 "ህንተንቱ ሀ ጉቱዋፐ እቱዋነ ካና ማላ፥ ህንተንታ ናግተ፤ አያዉ ጎፐ፥ ታን ህንተንቶ ኦዳይ፤ ሳሉዋን ኡንቱንቱ ኪታንቻቱ ኡባ ዎደ፥ ሳሉዋን ደእያ ታ አቡ ስንን ደኢኖ። 11 አያዉ ጎፐ፥ ታን፥ አሳ ናአይ፥ ባዬዳዋ አሻናዉ ያድ።

12 "እት አሳዉ ጼቱ ዶርሳቱ ደእያዋንቱፐ እቱ ባዮፐ፥ ኡዱፑ ታማነ ኡዱፑኑዋ ደርያን አጊደ፥ ሄ ባዬዳዋ ኮያናዉ ቤኔ? ህንተንቱ ዋጊቴ? 13 ታን ህንተንቶ ቱሙዋ ጋይ፤ እ ደሞፐ፥ ባይቤና ኡዱፑ ታማነ ኡዱፑ ዶርሳቱዋፐ አደ፥ ሄ እት ዶርሳን ናሸቴ። 14 ሄዋዳንካ፥ ሳሉዋን ደእያ ህንተንቱ አቡ ሀ ጉቱዋፐ እቱ ባያናዋካ ኮየና።

15 "ነ እሻይ ኔና ናቆፐ፥ ኔረካ አኮ ባደ፥ አ ናቁዋ አዉ ኦዳ፤ እ ነዋ ስሶፐ፥ ነ እሻ ባላፐ ዛራዳ። 16 ሽን እ ነዋ ስሰናን እጾፐ፥ ላኡ ዎይ ሄዙ ማርካይ ማርካቶዋን የዉ ኡባይ ቱማትያ ድራዉ፥ ሀራ እት ዎይ ላኡ አሳ ኔናና እትፐ አፋ። 17 እ ኡንቱንቱባ ስሰናን እጾፐ፥ ኡባባ አማንያ አሳዉ ኦዳ፤ ቃይ አማንያ አሳይ ግያዋካ እ ስሰናን እጾፐ፥ አማነና አሳዳንነ ቃራጻ ሺሽያ አሳዳን አ ፓይዳ።

18 "ታን ህንተንቶ ቱሙዋ ጋይ፤ ኔን ሳኣን ሀኖ ጎዌ ኡባይ ሳሉዋን ጾሳ ስንን ሀናና፤ ሽን ኔን ሳኣን ሀኖፖ ጌዳዌ ሳሉዋንካ ሀነና።

19 "ቃይካ ታን ህንተንቶ ኦዳይ፤ ህንተፐ ላኡ ኡራይ ሳኣን ጾሳ ዎስያዋን አይ የዉዋንነ እት ዎዛና ግዶፐ፥ ሳሉዋን ደእያ ታ አቡ ሄዋ ህንተንቶ እማና። 20 አያዉ ጎፐ፥ ላኡ ኡራይ ዎይ ሄዙ ኡራይ ታ ሱንን ሺቅያሳን፥ ታን ሄዋን ኡንቱንቱ ግዱዋን ደአይ" ያጌዳ።

21 ጰጽሮስ፤ ሄ ዎደ የሱሳኮ ዪደ፥ "ጎዳዉ፥ ታ እሻይ ታና አፑ ካላ ናቆፐ ታን አዉ አቶ ጋናዉ በሲ? ላፑኑዋ ጋካናዉ ናቂኔዬ?" ያጊደ አ ኦቼዳ።

22 የሱስ ዛሪደ አ፥ "ግደና፥ ታን ኔና ላፑን ታሙ ካላ ላፑኑዋ ጋይፐ አትን፥ ላፑኑዋ ጻላላ ጊከ።✝

23 "አያዉ ጎፐ፥ ሳሉዋ ካዉተይ ባረ ቆማቱዋና ሚሻ ሄተታናዉ ቆፔዳ ካትያ በሴ። 24 ሄ ካቲ ሚሻ ሄተታናዉ ዶሜዳ ዎደ፥ ዳሮ ሚሎነ ብራ አጩ ደእያ እት ብታንያ አኮ አሄድኖ። 25 ሽን ሄ ቆማዉ አጩዋ ጭግያዌ ይና፥ አ ጎዳይ ሄ አጩዋ ጭጋናዉ፥ አ ማቻታነ እነ አ ናናይ፥ ቃይ አዉ ደእያ ኡባባይ ዛልኤታና ማላ፥ አ አዛዜዳ። 26 ሄዋ ድራዉ፥ ቆማይ ባረ ጎዳ ስንን ጉልባቲደ፥ ‘ታ ጎዳዉ፥ ሀያ ጎዶ ጉ ዎድያ ናጋርኪ፤ ታን ነዉ ኡባባካ ጭጋና ያጊደ አ ዎሴዳ።’ 27 አ ጎዳይ አዉ ቃረቲደ፥ አ የድ አጌዳ፤ አ አጩዋካ አዉ ማር አጌዳ።

28 "ሽን ሄ ቆማይ ከሲደ፥ ባረ ላገ ቆማቱዋፐ እቱ ባረፐ ጼቱ ብራ ሳንትምያ ታልኤዳዋና ጋከቲደ፥ ‘ነ ቦላ ደእያ ታ ሚሻ ጭጋ’ ያግ ኦይቂደ፥ አ ጩሌዳ።

29 "ያትና ሄ አ ላገ ቆማይ አ ስንን ጉልባቲደ፥ ‘ሀእ ታይሻይ ጉ ዎድያ ናጋርኪ፤ ታን ነዉ ኡባባካ ጭጋና’ ያጊደ አ ዎሴዳ።

30 "ሽን እጽ አክ ቢደ፥ አ ላገይ ሄ አጩዋ ቃንጻና ጋካናዉ፥ ቃሾ ጎለ ገልሴዳ። 31 ሄዋ ድራዉ፥ አ ላገ ቆማቱ ሄዋ በኢደ፥ ዳሮ ይሎቴድኖ፤ ባረንቱ ጎዳኮ ቢደ፥ እ ኦዳ ኡባባ አዉ ኦዴድኖ።

32 "ሄዋፐ ጉይያን፥ ጎዳይ ሄ ቆማ ጼሲደ፥ ‘ሀ ኢታ ቆማዉ፥ ኔን ታና ዎሴዳ ድራዉ፥ ታን ሄ አጩዋ ኡባ ነዉ ማራ አጋድ። 33 ታን ነዉ ሄ አጩዋ ማሬዳዋዳን፥ ኔንካ ነ ላገ ቆማዉ ማራናዉ በሰኔ?’ ያጌዳ። 34 ሄዋፐ ስሚደ አዉ ዳሮ ሀንቀቲደ፥ ባረ አጩዋ ኡባ እ ጭግ ዉርሳና ጋካናዉ፥ ፓጻ ካኤታና ማላ፥ ቃሾ ጎለ ገልሴዳ።

35 "ህንተንቱ ሁጲያን ሁጲያን ህንተንቱ እሻዉ ዎዛናፐ አቶ ጋና ዮፐ፥ ሄ ጎዳይ ባረ ቆማ ኦዳዋዳን፥ ሳሉዋን ደእያ ታ አቡካ ህንተንታ ሄዋዳን ኦና" ያጌዳ።