1 የሱስ ሄ ሃሳያ ዉርሶዋፐ ጉይያን፥ ጋሊላፐ ደንዲደ፥ ዮርዳኖሳ ሻፋፐ ሄፍንን ደእያ ይሁዳ ጋድያ ቤዳ። 2 ዳሮ አሳይ አ ካሊደ ቤዳዋ ሄዋን ፓዳ።

3 እት እት ፓርሳዋቱ ፓጫናዉ የሱሳኮ ዪደ፥ "እት አሳይ አይ ጋሱዋንነ፥ ባረ ማቻቶ የዳናዉ ኑ ህጊ አዛዚ?" ያጊደ አ ኦቼድኖ።

4 የሱስ ዛሪደ፥ ሀዋዳን ያጌዳ፤ "ጾሳይ ኮይሮ ኡንቱንታ መደ፥ አቱማዋነ ማጫዉኖ ኦዳ።✝ 5 ሄዋ ድራዉ፥ ‘እት አሳይ ባረ አባነ ባረ ዳዮ አጊደ፥ ባረ ማቻትና እትፐ ደኤ፤ ኡንቱንቱ ላኡ እት አሳ ግዲኖ’ ያግያ ቃላ ናባብበይክቴ?✝ 6 ሄዋ ድራዉ፥ ኡንቱንቱ እት አሳ ግድያዋፐ አትን፥ ላኡ አሳ ግድክኖ፤ ሄዋ ድራዉ፥ ጾሳይ እትፐ ደአናዳን ጋዋ አሳይ ሻኮፖ" ያጌዳ።

7 ፓርሳዋቱ የሱሳ፥ "ያትና፥ ሙሴ አያዉ እት ኡራይ ባረ ማቻቶ ፕርማ ፔደ የዳና ማላ አዛዜዴ?" ያጌድኖ።

8 የሱስ ዛሪደ፥ "ህንተንቱ ህንተንቱ ማቻቱዋ የዳና ማላ፥ ሙሴ ህንተንታ አዛዜዳዌ፥ ህንተንቱ ኦድና ስሰና ጉዙማ ግዶ ድራፐ አትን፥ ኮይሮ ሄዋ ማላ ግደና። 9 ታን ህንተንቶ ኦዳይ፤ ባረ ማቻቶ ዎሹመናን ደእሽን የዲደ፥ ሀራሮ አክያ ኦንነ ዎሹሜ፤ ሀራይ የዴዳዉኖ አክያዌካ ዎሹሜ" ያጌዳ።

10 የሱሳ ካልያዋንቱ አ፥ "አስና ግዱዋንነ ማቻት ግዱዋን ደእያ ዎጋይ ሄዋ ማላ ግዶፐ፥ አከናንነ ገለናን ደእያዌ ሎአ" ያጌድኖ።

11 ሽን የሱስ ኡንቱንታ ያጌዳ፤ "ሄዋ ማላ ትምርቲ ጾሳይ እሞዋንቱሳፐ አትን፥ አሳ ኡባሳ ግደና፤ 12 አያዉ ጎፐ፥ ባረንቱ ዳይ ኡሉዋፐ የለትያ ዎደካ፥ ሹፋ ግዴዳዋንቱ ደኢኖ፤ ቃይ አሳይ ቃራትና ሙሬሳ ግዴዳዋንቱ ደኢኖ፤ ቃይ ሳሉዋ ካዉተ ድራዉ፥ ባረንታ ሹፋ ኦዳዋንቱ ደኢኖ፤ ሀ ትምርትያ አካናዉ ዳንዳይያዌ ኦንነ አኮ" ያጌዳ።

13 የሱስ ሄ ዎደ ባረ ኩሽያ ጉ ናና ቦላ ዎደ፥ ጾሳ ዎሳና ማላ፥ እት እት አሳይ ናና አኮ አሄዳ፤ ሽን የሱሳ ካልያዋንቱ ሄ አሳ አሄና ማላ ሀንቀቴድኖ። 14 ሽን የሱስ፥ "ቄር ናናይ ታኮ ይያዋ ድጎፕተ፤ አያዉ ጎፐ፥ ሳሉዋ ካዉተይ ሄዋንቱ ማላሳ" ያጌዳ።

15 ሄዋፐ ስሚደ ባረ ኩሽያ ኡንቱንቱ ቦላ ዎዳዋፐ ጉይያን፥ ሄዋፐ ባሽ ቤዳ።

16 እት ብታኒ የሱሳኮ ዪደ፥ "ታማርስያዎ፥ ታን መና ደኡዋ ደማናዉ ሎኦባ አያ ኦ?" ያጌዳ።

17 የሱስ አ፥ "ሎኦባይ አየንቶ ታና አያዉ ኦቻይ? እቱዋ ጻላላይ ሎአ፤ ሽን ኔን መናዉ ደአናዉ ኮዮፐ፥ አዛዛቱዋ ናጋ" ያጌዳ።

18 ብታኒ፥ "ሀቃዋንታ?" ያጊደ ኦቼዳ።

የሱስ ዛሪደ፥ "ዎፓ፤ ዎሹሞፓ፤ ዉኦፓ፤ ዎርዱዋ ማርካቶፓ፤✝ 19 ነ አባነ ነ ዳዮ ቦንቻ፤ ነ ሾሩዋካ ነ ሁጲያዳን ሲቃ" ያጌዳ።✝

20 ሄ ያላጋ ብታኒ የሱሳ፥ "ታን ሄዋ ኡባካ ጉተፐ ዶማደ ናጋድ፤ ያትና፥ ታዉ ፓጭያዌ አዬ?" ያጌዳ።

21 የሱስ ብታንያ፥ "ኔን ፖሎ አሳ ግዳናዉ ኮዮፐ፥ ባደ ነዉ ደእያዋ ዛልኣደ፥ ሄ ሚሻ ህዬሳዉ እማ፤ ኔን ሳሉዋን ዱረታና፤ ያታደ ያደ ታና ካላ" ያጌዳ።

22 ሽን ሄ ያላጋ ብታኒ ሄዋ ስሴዳ ዎደ፥ እ ዳሮ ዱረ ግድያ ድራዉ፥ ቃረቲደ ባሽ ቤዳ።

23 የሱስ ባረና ካልያዋንቶ፥ "ታን ህንተንቶ ቱሙዋ ጋይ፤ ዱረ አሳይ ሳሉዋ ካዉተ ገላናዌ ዳሮ መቶ ግዳናዋ። 24 ታን ጉጃደካ ህንተንቶ ኦዳይ፤ ዱረ አሳይ ጾሳ ካዉተ ገላናፐ፥ ጋሉ ማርፕያ ሉኩዋና አናዌ ማታቴ" ያጌዳ። ጫነትቤና ጋሉዋ ካለያዋ

25 አ ካልያዋንቱ ሄዋ ስስ ማላለቲደ፥ "ያትና፥ ኦን አታናዉ ዳንዳዪ?" ያጌድኖ።

26 የሱስ ኡንቱንታ ጫድ ጼሊደ፥ "ሀዌ አሳዉ ዳንዳየተና፤ ሽን ጾሳዉ ኡባባይ ዳንዳየቴ" ያጌዳ።

27 ጰጽሮስ ሄ ዎደ ዛሪደ የሱሳ፥ "በአ፥ ኑን ኑዉ ደእያ ኡባባ ባሺደ፥ ኔና ካሌዶ፤ ያቲደ ኑን አያ ደማኔሻ?" ያጌዳ።

28 የሱስ ኡንቱንታ ሀዋዳን ያጌዳ፤ "ታን ህንተንቶ ቱሙዋ ጋይ፤ ታን፥ አሳ ናአይ፥ ኦራ ጋድያን ታ ካዉተ ኦይድያን ኡትያ ዎደ፥ ታና ካሌዳ ህንተንቱካ ታማነ ላኡ እስራኤልያ ዛራቱዋ ቦላ ፕርዳናዉ፥ ታማነ ላኡ ካዉተ ኦይድያን ኡታንታ። 29 ታ ሱን ድራዉ፥ ጎልያ ዎይ እሻቱዋ ዎይ ምቻቱዋ፥ ዎይ አዉዋ ዎይ አቶ ዎይ ማቻቶ፥ ዎይ ናና ዎይ ጋድያ አጌዳ ኦንነ፥ ጼቱ ዳኩዋፐ ዳሩዋ አካና፤ ቃይ መና ደኡዋካ ላታና። 30 ሽን ጮራቱ ሀእ ስንቴዳዋንቱ ጉየታናዋንታ፤ ቃይ ጮራቱ ሀእ ጉየን ደእያዋንቱ ስንታናዋንታ።