አካነ ገሉዋ ኦዱዋ ሌምሱዋ
(ሉቃሳ 14:15-24)
1 የሱስ አሳዉ ላኤንዋ ሌምሱዋን ሀዋዳን ያጊደ ሃሳዬዳ፤ 2 "ሳሉዋ ካዉተይ ባረ ናአዉ ማችያ እማናዉ ኡባባ ማኬዳ ካትያ ማላ። 3 ሄ ካቲ ቡላቻዉ ኦድ ዎዳ አሳቱዋ ጼሳናዉ ባረ ቆማቱዋ ኪቴዳ፤ ሽን አሳቱ ያናዉ ኮይበይክኖ።
4 "ቃይ ሀራ ቆማቱዋ፥ ‘ጼሰቴዳዋንታ፥ "ታን ቁማ ጊግሳድ፤ ታ ሳንጋቱነ ታ ሞ ምያቱ ሹከቴድኖ፤ ኡባባይካ ማከቴዳ። ቡላቻ ሃ ዪተ" ያግተ’ ያጊደ ኪቴዳ። 5 ሽን ጼሰቴዳዋንቱ ኮየናን እጺደ፥ ባረንቱ ኦሶ ቤድኖ፤ እቱ ባረ ጎሻዉ ቢና፥ የኩ ባረ ዛልኤዉ ቤዳ። 6 አቴዳዋንቱ ቃይ ካትያ ቆማቱዋ ኦይቂ ዋደ ዎድኖ።
7 "ካቲ ዳሮ ሀንቀቴዳ፤ ቃይ ባረ ዎታዳራቱዋ የዲደ፥ ሄ ሸምፑዋ ዎዳዋንታ ዎሲደ፥ ኡንቱንቱ ካታማ ጉድሴዳ። 8 ሄዋፐ ጉይያን፥ ባረ ቆማቱዋ፥ ‘ቡላቻይ ማከቴዳ፤ ሽን ጼሰቴዳዋንቱ ቡላቻዉ በስያ አሳ ግድክኖ። 9 ሄዋ ድራዉ፥ ዎጋ ቃ ቢደ፥ ህንተንቱ ደሜዳ አሳ ኡባ ቡላቻዉ ጼስተ’ ያጌዳ። 10 ሄ ቆማቱ ቃ ቢደ፥ ባረንቱ ደሜዳ አሳ ኡባ ሎኡዋ ኢታ ሺሺደ፥ ቡላቻ ዳስያ ኩንድኖ።
11 "ሽን ካቲ ቁማ ማናዉ ኡቴዳ አሳ በአናዉ ገሌዳ ዎደ፥ ቡላቻ ማዩዋ ማይቤና እት ብታንያ ሄዋን በኢደ፥ 12 ‘ታ ላገዉ፥ ቡላቻ ማዩዋ ማየናን ዋናደ ሀዋ ገላዲ?’ ያግና ብታኒ ጮኡ ጌዳ።
13 "ሄዋፐ ጉይያን፥ ካቲ ባረ ቆማቱዋ፥ ‘ሀ ብታንያ ኩሽያነ ገድያ ቃቺደ፥ ካረ ማ ከስ ኦልተ፤ እ ሄዋን ዬካናነ አቻ ቃና’ ያጌዳ።
14 "አያዉ ጎፐ፥ ጼሰቴዳዋንቱ ዳራ፤ ሽን ዶረቴዳዋንቱ ጉ" ያጌዳ።
ጊራ ዎት ጊራነንቶ ኦቼዳ ኦሻ
(ማር. 12:13-17፤ ሉቃሳ 20:20-26)
15 ሄዋፐ ጉይያን፥ ፓርሳዋቱ ቢደ፥ አ ሃሳያፐ ባላ ደሚደ፥ አ ኦይቃና ማላ ማቀቴድኖ። 16 ቃይ ባረንታ ካልያዋንቱፐነ ሄሮድሳ ባጋቱዋፐ አማሬዳዋንታ አኮ ኪቴድኖ። ኡንቱንቱ፥ "ታማርስያዎ፥ ኔን ቱሙዋ ሃሳይያዋነ ጾሳ ኦግያ ቱማተን ታማርስያዋ ኑን ኤሬቶ፤ አያዉ ጎፐ፥ ኔን አሳፐ አሳ ሻካካነ ዱማያካ። 17 ነ ቆፋይ አየንቶ ኑዉ ኦዳ፤ ኑን ሮመ ጋድያ ካትያ ቄሳረዉ ጊራ ጊርያዌ ዎጌየ ዎጋ ግደኔ?" ያጌድኖ።
18 ሽን የሱስ ኡንቱንቱ ኢታ ቆፋ ኤሪደ፥ "ሀ ሎአ ማላትያ ኢታ አሳቶ፥ አያዉ ታና ፓጪቴ? 19 ጊራ ጊርያ ሚሻ ታና በስተ" ያጌዳ። ሄዋፐ ጉየ ኡንቱንቱ ብራ ሳንትምያ አዉ አሄድኖ። 20 እ፥ "ሀ ማላይነ ሱንይ ኦዌ?" ያጌዳ።
21 ሄዋፐ ስሚደ ኡንቱንታ ኦችና፥ ኡንቱንቱ፥ "ሮመ ጋድያ ካትያ ቄሳረዋ" ያጌድኖ።
ሄዋፐ ጉይያን፥ የሱስ ኡንቱንታ፥ "ያቶፐ፥ ቄሳረዋ ቄሳረዉ፥ ጾሳዋ ጾሳዉ እምተ" ያጌዳ። 22 ኡንቱንቱ ሄዋ ስሴዳ ዎደ፥ ማላለቲደ አ አጊደ ቤድኖ።
ሀይቄዳዋንቱ ደንዱዋባ
(ማር. 12:18-27፤ ሉቃሳ 20:27-40)
23 ሀይቄዳ አሳይ ደንደና ግያ ሳዱቃዋናቱዋፐ እት እት አሳቱ ሄ ጋላስ የሱሳኮ ዪደ፥ ሀዋዳን ያጊደ፥ አ ኦቼድኖ፤ 24 "ታማርስያዎ፥ ሙሴ፥ ‘እት አሳይ ናኣ የለናን ሀይቆፐ፥ ሄ ሀይቄዳዋ እሻይ አ ማቻቶ ላቲደ፥ ባረ እሻዉ ናኣ የላናዉ በሴ’ ያጌዳ።22:24 ዛረ. 25:5 25 ኑናና ላፑ እሻቱ ደኢኖ፤ ባይራይ ማቻቶ አኪደ፥ ናኣ የለናን ሀይቄዳ፤ ሄዋፐ ጉይያን አ ማቻቶ አ እሻይ አኬዳ። 26 ቃይ ላኤንያዌካ ሀይቄዳ፤ ሄዘያዌካ፥ ላፑን ጋካናዉካ ሄዋዳን ሀኔድኖ። 27 ኡባፐ ጉይያን፥ ሄ ምሽራታ ሀይቃዱ። 28 ያትና፥ ሀይቄዳ አሳይ ሀይቁዋፐ ደንድያ ጋላስ ሄ ምሽራታ ላፑናቱዋፐ ሀቃዎ ማቼ ግዳኔ? አያዉ ጎፐ፥ ላፑናቱ ኡባይካ እዞ አኬድኖ" ያጌድኖ።
29 የሱስ ዛሪደ፥ ሀዋዳን ያጌዳ፤ "ጾሳ ማጻፋቱዋ ዎይ አ ዎልቃ ህንተንቱ ኤረና ድራዉ ባሊታ። 30 አያዉ ጎፐ፥ ሀይቄዳ አሳይ ሀይቁዋፐ ደንድያ ጋላስ፥ ሳሉዋን ደእያ ኪታንቻቱዋ ማላ ግዳናፐ አትን፥ አቱማ አሳይነ አከና፤ ማጫ አሳይነ ገለና። 31,32 ሽን ሀይቄዳዋንቱ ደንዱዋባ ግዶፐ፥ ጾሳይ፥ ‘ታን አብራሃመ ጾሳ፥ ይሳቃ ጾሳ፥ ያቆባ ጾሳ’ ያጊደ ህንተዉ ኦዴዳዋ ኡባካ ናባብ በይክቴ? ጾሳይ ፓጻ ደእያዋንቱ ጾሳ ግድያዋፐ አትን፥ ሀይቄዳዋንቱ ጾሳ ግደና" ያጌዳ።22:31-32 ከሳ 3:6
33 ዳሮ አሳይ ሄዋ ስሲደ፥ አ ትምርትያን ማላለቴድኖ።
ኡባፐ አያ አዛዙዋ
(ማር. 12:28-34፤ ሉቃሳ 10:25-28)
34 ሽን የሱስ ሳዱቃዋናቱዋ ጮኡ ኦዳዋ ፓርሳዋቱ ስሴዳ ዎደ፥ እትሳ ሺቄድኖ። 35 ኡንቱንቱ ግዶፐ ህግያ ታማርስያ እቱ፥ የሱሳ ፓጫናዉ እትባ ኦቼዳ። 36 "ታማርስያዎ፥ ህግያ ግዱዋን ኡባፐ አያ አዛዙ ሀቃዌ?" ያጊደ አ ኦቼዳ።
37 የሱስ ዛሪደ፥ ሀዋዳን ያጌዳ፤ " ‘ኔን ጎዳ ነ ጾሳ ነ ኩመን ዎዛናፐ፥ ነ ኩመን ሸምፑዋፐ፥ ነ ኩመን ቆፋፐ ሲቃ’ ያጌዳ።22:37 ዛረ. 6:5 38 ሄዌ ኡባፐ ዳርያ አዛዙዋነ ቃይ ኡባፐ አያ አዛዙዋ። 39 ቃይ ላኤንያ አዛዙካ አ ማላ፤ ሄዌ፥ ‘ኔን ነ ሾሩዋ ነ ሁጲያዳን ሲቃ’ ግያዋ።22:39 ዎጋ 19:18 40 ሙሴ ህግያ ኡባይነ ናባቱዋ ትምርቲ ሀ ላኡ አዛዛቱዋን ቃሸቴ" ያጌዳ።
ክርስቶሳባ ኦቼዳ ኦሻ
(ማር. 12:35-37፤ ሉቃሳ 20:41-44)
41,42 ፓርሳዋቱ እትሳ ሺቄዳሳን የሱስ ኡንቱንታ፥ "ክርስቶሳባ ዋጊደ ቆፒቴ? እ ኦ ናኤ?" ያጊደ ኦቼዳ።
ኡንቱንቱ፥ "ክርስቶስ ዳዊታ ናኣ" ያጌድኖ።
43 የሱስ ኡንቱንታ፥ "ያትና፥ ዳዊተ ባረና ጌሻ አያናይ ሃሳይስና ክርስቶሳ ዋጊደ፥ ‘ጎዳ’ ጊደ ጼሲ? 44 ቃይካ ዳዊተ፥
"ጎዳይ ታ ጎዳ፥ ታን፥ ‘ነ ሞርከቱዋ፥
ኔን የ ኤቂያዋ ኦና ጋካናዉ፥
ሀዋን ታፐ ኡሸቻ ባጋና ኡታደ ታናና እትፐ ዳናታ ጌዳ’
ያጌዳ።22:44 ማዝ. 110:1 45 ዳዊተ ክርስቶሳ፥ ‘ጎዳ’ ጊደ ጼሶፐ፥ ያትና፥ ክርስቶስ ዋኒደ ዳዊታ ናኣ ግዲ?" ያጌዳ።
46 የሱሳዉ እት ቃላ ዛራናዉ ዳንዳዬዳ እት አሳይነ ባዋ፤ ቃይ ሄ ጋላሳፐ ዶምና፥ ሀራ ኦሻ አ ኦቻናዉ ጻሌዳዌ ኦንነ ባዋ።