1 የሱስ ጌሻ ጎልያፐ ከሲደ ብያ ዎደ፥ ጌሻ ጎልያ ድርሳ ግዶን ደእያ ጎልያ በሳናዉ አ ካልያዋንቱ አኮ ዬድኖ። 2 የሱስ ዛሪደ ኡንቱንታ፥ "ሄዋ ኡባ በኢቴ? ታን ህንተንቶ ቱሙዋ ኦዳይ፤ ሀ ጎለቱዋን ደእያ እት ሹቻይነ አተናን ኡባይ ኮለታና" ያጌዳ።

3 የሱስ ደብረ ዛይተ ጌተትያ ደርያ ቦላን ኡት ደእሽን፥ አ ካልያዋንቱ ባረንቱ ጻላላ አኮ ዪደ አ፥ "ሄዌ አዉደ ሀናነንቶ፥ ኑዉ ኦዳርኪ፤ ቃይ ነ ዩሳዉነ ዎድያ ዉርሰዉ ማላይ አያ ግዳኔ?" ያጌድኖ።

4 የሱስ ዛሪደ፥ ኡንቱንታ ሀዋዳን ያጌዳ፤ "ህንተንታ ኦንነ ባለና ማላ ናገትተ። 5 አያዉ ጎፐ፥ ዳሮ አሳይ ታ ሱንን፥ ‘ታን ክርስቶሳ’ ያጊደ ያና፤ ያቲደ ዳሮ አሳ ባለና። 6 ማታን ደእያ ኦላ ዋሱዋነ ሃኩዋን ደእያ ኦላ ኦዱዋ ስሳናዉ ህንተንቱ ደኢታ፤ ሄዋ ማላባይ ሀናናዉ በስያ ድራዉ፥ ናገትተ፤ ህርጎፕተ፤ ሽን ዉርሰይ ብራ። 7 አያዉ ጎፐ፥ እት ጋድያ አሳይ ሀራ ጋድያ አሳና ኦለታና፤ ቃይ እት ካዉተይ ሀራ ካዉተና ኦለታና፤ ኮሻይነ ቢታ ቃይ ኡባ ሳን ደአናዋ። 8 ሄዌ ኡባይካ ኮይሮ ኦይ ማላ።

9 "አሳይ ሄ ዎደ ህንተንታ ዋይሳናነ ዎናዋ፤ ታ ሱን ድራዉ፥ ጋደ ኡባይ ህንተንታ እጻናዋ።✝ 10 ሄ ዎደ ጮራ አሳይ አማኑዋ አጋናዋንታ፤ ባረንቱ ግዶን እቱ እቱዋ አደ እማናነ እቱ እቱዋ እጻናዋ። 11 ቃይ ዎርዶ ናባቱ ጮራቱ ደንዲደ፥ ዳሮ አሳ ጭማናዋንታ። 12 ማካላይ ዳርያ ድራዉ፥ ጮራ አሳ ሲቁ እርጻናዋ። 13 ሽን ዉርሰይ ጋካናዉ ገንጭያ ኡራይ አታናዋ። 14 አሳዉ ኡባዉ ማርካ ግዳና ማላ፥ ካዉተ ዎንጋላ ምሽራቹ ሳኣ ኡባን ኦደታናዋ፤ ሄዋፐ ጉይያን፥ ዉርሰይ ጋካናዋ።"

15 "ሄዋ ድራዉ፥ ናብያ ዳኔል ኦዴዳ ባሻ ቱናተይ ጌሻ ሳን ኤቄዳዋ ህንተንቱ በአና፤ ሄዌ ዋግያዌንቶ፥ ናባብያዌ አኬኮ።✝

16 "ይሁዳ ጋድያን ሄ ዎደ ደእያዋንቱ ደርያኮ ከስኖ። 17 ጎልያ ሁጲያን ደእያ ኡራይካ ባረ ሶይን ደእያዋ አካናዉ ዎፖ። 18 ጋደን ደእያዌ ባረ ማዩዋ አካናዉ ጉየ ስሞፖ። 19 ሄ ዎደ ሻሃራ ማጫዋንቶነ ንያ ማጫዋንቶ አየሮ። 20 ባልጉዋን ዎይ ሳምባታን ህንተንቱ በተና ማላ፥ ጾሳ ዎስተ፤ 21 አያዉ ጎፐ፥ አላሚ መቶደፐ ሀቼ ጋካናዉ ደእቤናባይነ ቃይ ሀዋፐ ስንዉካ ኡባ ደኤና ኢታ ዋዪ ሄ ዎደ ደአናዋ።✝ 22 ጾሳይ ሄ ጋላሳቱዋ ፓይዱዋ ጉያዌ ባዌንቶ፥ አሳ ግዴዳ ኦንነ አተና፤ ሽን እ ባረ ዶሬዳ አሳቱዋ ድራዉ፥ ሄ ጋላሳቱዋ ፓይዱዋ ጉናዋ።

23 "ሄ ዎደ ኦንነ ህንተንታ፥ ‘በእተ። ክርስቶስ ሀዋን ደኤ’ ዎይ፥ ‘ሄዋን ደኤ’ ያጎፐ አዋ አማኖፕተ። 24 አያዉ ጎፐ፥ ዎርዶ ክርስቶሳቱነ ዎርዶ ናባቱ ደንዳና፤ ያቲደ ባረንቶ ዳንዳየቶፐ፥ ሀራይ አቶ ጾሳይ ዶሬዳዋንታካ ባለናዉ ዎልቃማ ማላታነ ማላልስያባ በሳናዋ። 25 በእተ፥ ታን ህንተዉ ሄዋ ካሰታደ ኦዳድ።

26 "ሄዋ ድራዉ፥ አሳይ ህንተንታ፥ ‘በእተ፥ ክርስቶስ ባዙዋን ደኤ’ ጎፐ፥ ያ ቦፕተ፤ ዎይ ህንተንታ፥ ‘በእተ፥ ቆልኦን ደኤ’ ግንቶካ፥ ኡንቱንቱባ አማኖፕተ። 27 አያዉ ጎፐ፥ ዋልቃንይ አዋይፊ ዶልያ ባጋፐ ዋልቃሚደ፥ አዋይፊ ዉልያ ባጋ ጋካናዉ ጶልቁ ግያዋዳን፥ ታ ዩሳይ፥ አሳ ናኣ ዩሳይ፥ ሄዋዳን ሀናናዋ።

28 "ባኩታይ ደኢያሳ ሾርቲ ሺቃና።"

29 "ሄ ዎደ ዋይያፐ ጉይያን፥

ኤለካ አዋይ ማና፤

አገናይ ፖእያዋ አጋናዋ፤

ጾልንታቱ ሳሉዋፐ ኩንዳናዋንታ፤

ቃይ ሳሉዋን ደእያ ዎልቃቱካ ቃጸታናዋንታ።✝

30 ሄ ዎደ ታ ማላይ፥ አሳ ናኣ ማላይ፥ ሳሉዋን ቤታናዋ፤ ሳኣን ሄ ዎደ ደእያ አሳ ዛሪ ኡባይ ዬካናዋንታ። ቃይ ታን፥ አሳ ናአይ፥ ዎልቃናነ ዎልቃማ ቦንቹዋና ሳሉዋፐ ሻርያ ግዶና ዪሽን፥ ኡንቱንቱ በአና።✝ 31 እ ባረ ኪታንቻቱዋ ዎልቃማ ማላካታና ኪታና፤ ኪታንቻቱ አላመዉ ሀ ጋጻፐ ያ ጋጻ ጋካናዉ፥ ቃይ ሳኣን ኦይዱ ባጋፐ አዉ ዶረቴዳ አሳ ሺሻናዋ።

32 "ሌምሱዋ ባላሳቶ ጌተትያ ምትፐ አኬክተ፤ ባላሳታ አጭያ ዎደነ እዝ ሀይይ ቆለትያ ዎደ፥ ቦኒ ማቴዳዋ ህንተንቱ ኤራንታ። 33 ሄዋዳንካ፥ ህንተንቱ ሄ ኡባባ በእያ ዎደ፥ እ ማቲደ ፐንግያ ሺቄዳዋ ኤርተ። 34 ታን ህንተንቶ ቱሙዋ ኦዳይ፤ ሀ ኡባባይ ሀናና ጋካናዉ፥ ሀ ዎድያ አሳይ ሀይቂድገና። 35 ሳሉነ ሳአይ አና፤ ሽን ታ ቃላይ ኡባካ አና።

36 "ሽን ሄ ጋላሳነ ሄ ሳትያ አዉዋ ጻላላፐ አትን፥ ሀራይ አቶ ሳሉዋን ደእያ ኪታንቻቱዋ ግድና፥ ዎይ ታና ናኣ ግድናካ ኦንነ ኤርያዌ ባዋ። 37 ታ ዩሳይ፥ አሳ ናኣ ዩሳይ፥ ኖሄ ዎደ ሀኖዋ ማላ ግዳናዋ።✝ 38 አያዉ ጎፐ፥ ባሻ ሃ ዩሳፐ ካሰ ዎደ፥ ኖሄ ማርካብያን ገሌዳ ጋላሳይ ጋካናዉ፥ አሳይ ሜነ ኡሼነ፤ ቃይ አቱማ አሳይ አኬነ ማጫ አሳይ አስና ገሌ። 39 ባሻ ሃይ ዪደ፥ ኡንቱንታ ኡባ አፋና ጋካናዉ፥ ኡንቱንቱ አኬክበይክኖ፤ ታን፥ አሳ ናአይ፥ ይያ ዎዲ፥ ሄዋ ማላ ግዳናዋ።✝

40 "ሄ ዎደ ላኡ አሳቱ ጋደን ኦያዋንቱፐ እቱዋ አፋና፤ እቱ አታናዋ። 41 ላኡ ማጫዋንቱ ዎጻን ጋጭያዋንቱፐ እትኖ አፋና፤ እትና አታና።

42 "ስም ህንተ ጎዳይ አይ ጋላስ ያናዌንቶ ህንተንቱ ኤረና ድራዉ፥ ናግ ኡትተ። 43 ሽን ካይሱ ቃማፐ ዎይሳ ዎድያን ያነንቶ ጎልያ ጎዳይ ኤሬደንቶ፥ ባረ ጎሊ ቦከተና ማላ፥ ቤጎቲደ ናግ ኡታናዋ ኤርተ። 44 ሄዋ ድራዉ፥ ህንተንቱካ ጊግ ኡትተ፤ አያዉ ጎፐ፥ ታን፥ አሳ ናአይ፥ ህንተንቱ ቆፐና ሳትያን ያና።

45 "ያትና፥ ባረ ሶይ አሳዉ ቁማ ኮሽያ ዎድያን እማና ማላ፥ አ ጎዳይ ሱንዳ አማነቴዳ ዎዛናማ ቆማይ ኦኔ? 46 እ ሄዋዳን ኦሽን፥ አ ጎዳይ ዪደ ደምያ ቆማይ አንጀቴዳዋ። 47 ታን ህንተንቶ ቱሙዋ ኦዳይ፤ ጎዳይ ሄ ቆማ ባረዋ ኡባ ቦላ ሱንና። 48 ሽን ቆማይ ኢታ ግዶፐ፥ ‘ታ ጎዳይ ጋምኢደ ያናዋ’ ያጊደ ባረ ዎዛናን ቆፒደ፥ 49 ባረ ላገ ቆማቱዋ ዋ ዶሞፐ፥ ማትያዋንቱና ሞፐነ ኡሾፐ፥ 50 ሄ ቆማ ጎዳይ እ ቆፕቤና ጋላሳንነ እ ኤርቤና ሳትያን ያና። 51 ሄዋፐ ጉይያን አ ቃንጸሬደ፥* ሎአ ማላትያ ኢታ አሳቱ ደእያ ሳን ዎና፤ ሄዋን እ ዬካናነ አቻ ቃና።