1 "ሄ ዎደ ሳሉዋ ካዉተይ ባረንቱ ኩራዝያ ኦይቂደ፥ ማቻቶ አክያዋ ሞካናዉ ካረ ከሴዳ ታሙ ዎዶራቱዋ ማላታና። 2 ኡንቱንቱፐ እቼሻቱ ቦዛቱዋ፤ ቃይ እቼሻቱ ጭንጫ። 3 ቦዛቱ ባረንቱ ኩራዝያ ኦይቄድኖ፤ ሽን ላምባ ኦይቂበይክኖ። 4 ሽን ጭንጫቱ ባረንቱ ኩራዝያነ ጻራሙስያን ላምባ ኦይቄድኖ። 5 ማቻቶ አክያዌ ዬናን ጋምእና፥ ሄ ዎዶራቱ ባረንታ ገምእሽስና ግስ አጌድኖ።

6 "ብላሄ ግዴዳ ዎደ፥ ‘በእተ፥ ማቻቶ አክያዌ ጋኬዳ፤ አ ሞካናዉ ካረ ከስተ’ ያግያ ዎልቃማ ጫቡ ደንዴዳ።

7 "ሄ ዎደ ሄ ዎዶራቱ ኡባቱ ቤጎቲደ፥ ባረንቱ ኩራዝያ ጊግሴድኖ። 8 ቦዛቱ ጭንጫቱዋ፥ ‘ኑ ኩራዝ ቶአና ሀንያ ድራዉ፥ ህንተንቱ ላምባፐ ኑዉ እሜርክቴ’ ያጌድኖ።

9 "ሽን ጭንጫቱ ዛሪደ ኡንቱንታ፥ ‘አግተ፥ ኑዉነ ህንተንቶ ግደና፤ ሄዋ ድራ ህንተዉ ዛልእያዋንቱኮ ቢደ ሻም አክተ’ ያጌድኖ። 10 ሄዋፐ ጉየ ቦዛ ዎዶራቱ ላምባ ሻማናዉ ብድግና፥ ማቻቶ አክያዌ ፑቱ ጊና፥ ጊግ ኡቴዳ እቼሹ ዎዶራቱ አናና እትፐ ቡላቻ ጎልያ ገሌድኖ፤ እፍይካ ጎርደት አጌዳ።

11 "ጉየፐ ቃይ የኮ ዎዶራቱ ዪደ፥ ‘ጎዳዉ፥ ጎዳዉ፥ ኑዉ ዶያርኪ’ ያጌድኖ።

12 "ሽን ማቻቶ አክያዌ ዛሪደ፥ ‘ታን ህንተንቶ ቱሙዋ ኦዳይ፤ ታን ህንተንታ ኤርከ’ ያጌዳ።

13 "ስም ታን፥ አሳ ናአይ፥ ያና ጋላሳ ዎይ ሳትያ ህንተንቱ ኤረና ድራዉ፥ ናግ ኡትተ።

14 "አያዉ ጎፐ፥ ሳሉዋ ካዉተይ ባረ ቆማቱዋ ጼሲደ፥ ባረዉ ደእያዋ ኡንቱንቶ ሼደ፥ ኦግያ ባና ሀንያ ብታንያ በሴ። 15 ኡንቱንቱ ሁጲያን ሁጲያን ኡንቱንቱ ዎልቃ ኬና እቶ እቼሹ ሻአ ብራ፥ እቶ ላኡ ሻአ ብራ፥ ቃይ እቶ እት ሻአ ብራ እሚደ፥ ባረ ኦግያ ቤዳ። 16 እቼሹ ሻአ ብራ አኬዳ ቆማይ ኤለካ ቢደ ዛልኢደ፥ ሀራ እቼሹ ሻአ ብራ ዎሴዳ። 17 ሄዋዳንካ፥ ቃይ ላኡ ሻአ ብራ አኬዳ ቆማይ ሀራ ላኡ ሻአ ብራ ዎሴዳ። 18 ሽን እት ሻአ ብራ አኬዳዌ ቢደ፥ ኦላ ቦኪደ፥ ባረ ጎዳ ሚሻ ሞግ አጌዳ።

19 "ዳሮ ዎድያፐ ጉይያን፥ ሄ ቆማቱዋ ጎዳይ ዪደ፥ ባረ ሚሻ ኡንቱንቱና ሄተቴዳ። 20 እቼሹ ሻአ ብራ አኬዳ ቆማይ ዪደ፥ ሀራ እቼሹ ሻአ ብራ ሼደ፥ ‘ታ ጎዳዉ፥ ኔን ታዉ እቼሹ ሻአ ብራ እማዳ፤ በአ፥ ሀራ እቼሹ ሻአ ብራ ዎሳድ’ ያጌዳ። 21 አ ጎዳይ አ፥ ‘ሀያናሾ! ኔን ሎአነ አማነትያ ቆማ፤ ኔን ጉባን አማነታዳ። ታን ኔና ዳሮባዉ ካፖ ኦና፤ ሃ ገላደ ነ ጎዳና ናሸታ’ ያጌዳ።

22 "ቃይ ላኡ ሻአ ብራ አኬዳዌካ ዪደ፥ ‘ታ ጎዳዉ፥ ኔን ታዉ ላኡ ሻአ ብራ እማዳ፤ በአ፥ ታን ሀራ ላኡ ሻአ ብራ ዎሳድ’ ያጌዳ። 23 አ ጎዳይ አ፥ ‘ሀያናሾ! ኔን ሎአነ አማነትያ ቆማ፤ ኔን ጉባን አማነታዳ። ታን ኔና ዳሮባዉ ካፖ ኦና፤ ሃ ገላደ ነ ጎዳና ናሸታ’ ያጌዳ።

24 "እት ሻአ ብራ አኬዳዌ ቃይ ዪደ፥ ‘ታ ጎዳዉ፥ ኔን ዘራቤናሳፐ ቆይጭያ አሳ ግድያዋነ ካ ላላቤናሳፐ ማጽያ መቀ ባይና አሳ ግድያዋ ታን ኤራይ። 25 ታን ያያድ፤ ያታደ ባደ ነ ብራ ቢታን ሞጋድ፤ በአ፥ ነ ብራይ ሀዌኩ’ ያጌዳ።

26 "አ ጎዳይ ዛሪደ፥ አ ሀዋዳን ያጌዳ፤ ‘ሀ ኢታ አዛላ ቆማዉ፥ ታን ዘራቤናሳፐ ቆይጭያ አሳ ግድያዋነ ካ ላላቤናሳፐ ማጽያ አሳ ግድያዋ ኤራዲ? 27 ያትና፥ ኔን ታ ሚሻ ዎስያዋንቱ ማታን ዎዳዋ ግድንቶ፥ ታን ስምያ ዎደ ታ ሚሻ ዎያና አካናዋሽን አቴዳ። 28 ሄዋ ድራዉ፥ ሄ ሚሻ አፐ ዎ አኪደ፥ ታሙ ሻአ ብራይ ደእያዎ እምተ። 29 አያዉ ጎፐ፥ ደእያ ኡባዉ ሀራይ ጉጀታና፤ እ ባረዉ ግድያዋፐ ዳርሲደ አካና፤ ሽን ባይናዎ ሀራይ አቶ፥ ሄ አዉ ደእያ ጉይካ አፐ አከታናዋ። 30 ጎኤና ቆማ ካረ ማ ከስ ኦልተ፤ ሄዋን እ ዬካናነ ባረ አቻ ቃና’ ያጌዳ።

31 "ታን፥ አሳ ናአይ፥ ኪታንቻቱዋ ኡባቱዋና ቦንቹዋን ይያ ዎደ፥ ታ ቦንቾ ካዉተ ኦይድያን ኡታና።✝ 32 ሳኣን ደእያ አሳይ ኡባይ ታ ስን ሺቃናዋንታ፤ ሄምያዌ ዶርሳቱዋ ዴሻቱዋፐ ሻክያዋዳን፥ ታን ሄ አሳ ላኡ ከሳደ ሻካና። 33 ቃይ ዶርሳቱዋ ታፐ ኡሸቻ ባጋና ኤሳደ፥ ዴሻቱዋ ታፐ ሀድርሳ ባጋና ኤሳና።

34 "ሄዋፐ ጉይያን፥ ታን ካቲ ታፐ ኡሸቻ ባጋና ደእያዋንታ ሀዋዳን ያጋና፤ ‘ታ አቡ አንጄዳዋንቶ፥ ሃ ዪደ ሳአይ መቶደፐ ሀቼ ጋካናዉ፥ ህንተንቶ ጊጌዳ ካዉተ ላትተ። 35 አያዉ ጎፐ፥ ታን ኮሻትና ምዜድታ፤ ሳመትና ኡሼድታ፤ እማ ግዳደ ቢናካ ሞኬድታ። 36 ታን ካሎትና ማይዜድታ፤ ሀርግና በኤድታ፤ ቃሸትና ታኮ ጋኪደ ኦቼድታ’ ያጋና።

37 "ሄዋፐ ጉይያን፥ ጽላቱ ዛሪደ፥ አ ሀዋዳን ያጋና፤ ‘ጎዳዉ፥ ኔን ኮሻትና፥ አዉደ በኢደ ምዜዶ? ዎይ ኔን ሳመትና፥ አዉደ በኢደ ኡሼዶ? 38 ኔን እማ ግዳደ ዪና አዉደ በኢደ ሞኬዶ? ዎይ ኔን ካሎትና አዉደ ማይዜዶ? 39 ቃይ ኔን ሀርግና፥ ዎይ ቃሸትና ኔኮ ቢደ አዉደ ኔና በኤዶ?’ ያጋናዋንታ። 40 ታን ካቲ ዛራደ፥ ‘ታን ህንተንቶ ቱሙዋ ኦዳይ፤ ህንተንቱ ሀ ታ እሻቱዋ ኡባፐ ሀራይ አቶ፥ ላፍያ እቶ ኦዳዋ ግድንቶካ፥ ሄዋ ታዉ ኦድታ’ ያጋና።

41 "ሄ ዎደ፥ ታፐ ሀድርሳ ባጋና ደእያዋንታ ታን ያጋና፤ ‘ሀ ሸቀቴዳዋንቶ፥ ታ ማታፐ ክችተ፤ ቢደ ጻላህያ ካፖነ አ ኪታንቻቶ ጊጌዳ መና ታማን ገልተ። 42 አያዉ ጎፐ፥ ታን ኮሻትና፥ ታና ምዝበይክታ፤ ሳመትና ኡሽበይክታ። 43 ታን እማ ግዳደ ቢና፥ ታና ሞክበይክታ፤ ካሎትና ማይዝበይክታ፤ ቃይ ሀርግና፥ ቃሸትናካ ታና በእበይክታ’ ያጋና።

44 "ሄ ዎደ ኡንቱንቱ ቃይ ሀዋዳን ያጊደ ዛራናዋንታ፤ ‘ጎዳዉ፥ ኔን ኮሻትና ዎይ ሳመትና፥ ዎይ እማ ግዳደ ቢና ዎይ ካሎትና፥ ዎይ ሀርግና ዎይ ቃሸትና፥ አዉደ በኢደ፥ ኔና ማደናን እጼዶ?’ ያጋናዋንታ።

45 "ሄ ዎደ ታን ካቲ ዛራደ ኡንቱንታ፥ ‘ታን ህንተንቶ ቱሙዋ ኦዳይ፤ ህንተንቱ ሀ ኡባፐ ላፍያ እቱዋ ማደናን እጼዳዌ፥ ታና ማደናን እጼዳዋ’ ያጋና። 46 ሄዋንቱ መና ሙራዉ ባና፤ ሽን ጽላቱ መና ደኦ ባና" ያጌዳ።✝