Mateus 28

የሱስ ሀይቁዋፐ ደንዴዳ

1 ሳምባታይ አና ዎጋ ጋላስ ዎንታ ባካልያን፥ ማግዳላ ጌተትያ ካታማፐ ዬዳ ማይራማነ የኮ ማይራማ የሱስ ሞገቴዳ ጎንጎሉዋ በአናዉ ቤድኖ። 2 ጎዳ ኪታንቻይ ሳሉዋፐ ዎዳ ድራዉ፥ ሳአይ ዳሮ ቃጼዳ፤ ሄ ኪታንቻይ ዪደ፥ ሹቻ ጎንዶርስ ኦሊደ፥ አ ቦላ ከስ ኡቴዳ። 3 አ ማላይ ዋልቃን ማላቴ፤ አ ማዩካ ሻቻዳን ቦ። 4 ናግያዋንቱ ኪታንቻዉ ያሻ ኮኮሪደ፥ ሀይቄዳ አሳዳን ሀኔድኖ።

5 ኪታንቻይ ማጫዋንታ ሀዋዳን ያጌዳ፤ "ያዮፕተ፤ አያዉ ጎፐ፥ ማስቃልያ ቦላ ምስማርያን ሺደ ካቄዳ የሱሳ ህንተንቱ ኮይያዋ ታን ኤራይ። 6 እ ሀዋን ባዋ፤ አያዉ ጎፐ፥ እ ባረ ጌዳዋዳንካ ሀይቁዋፐ ደንድ ድጌዳ፤ ሃ ዪደ፥ እ ሞገት ግሶሳ በእተ። 7 ህንተንቱ ሀእ ኤለካ ቢደ፥ የሱሳ ካልያዋንቶ፥ ‘የሱስ ሀይቁዋፐ ደንድ ድጌዳ። ቃይ እ ህንተፐ ካሰቲደ፥ ጋሊላ ቤ፤ ህንተንቱ አ ያን በአና’ ያጊደ ኦድተ። በእተ፥ ታን ህንተንቶ ኦዳድ" ያጌዳ።

8 ኡንቱንቱ ያዪድነ ቃይ ዳሮ ናሸቲደ፥ የሱስ ሞገቴዳ ጎንጎሉዋ ማታፐ ኤለካ ክቺደ፥ የሱሳ ካልያዋንቶ ኦዳናዉ ዎጼድኖ።

9 ሄ ማንእያን የሱስ ኡንቱንቱና ጋከቲደ ኡንቱንታ፥ "ሳሮ ደኢቴ" ያግ አጌዳ፤ ኡንቱንቱ አኮ ሺቅ አ ገድያ ኦይቂደ፥ አዉ ጎይኔድኖ። 10 የሱስ ሄ ዎደ ኡንቱንታ፥ "ያዮፕተ፤ ታ እሻቱ ጋሊላ ባና ማላ፥ ቢደ ኡንቱንቶ ኦድተ፤ ኡንቱንቱ ታና ያን በአናዋንታ" ያጌዳ።

11 ሄ ማጫዋንቱ ብያ ዎደ፥ ጎንጎሉዋ ናግያ ዎታዳራቱዋፐ አማሬዳዋንቱ ካታማ ቢደ፥ ሀኔዳዋ ኡባ ቄሳቱዋ ካፓቶ ኦዴድኖ። 12 ቄሳቱዋ ካፓቱ ጭማቱዋና እትፐ ሺቅ ዞረቲደ፥ ዎታዳራቶ ዳሮ ሚሻ እሚደ፥ 13 " ‘ኑን ገምእሹዋን ደእሽን አ ካልያዋንቱ ቃማ ዪደ፥ አ አሃ ዉኤድኖ’ ያግተ። 14 ሀ የዉዋ ጋድያ አይስያዌ ስሶፐ፥ ኑን አዉ ኦድ አማንና፤ ቃይ ህንተንታ አይነ ህርግሰናዳን ኦና" ያጌድኖ።

15 ዎታዳራቱ ሚሻ አኪደ፥ ባረንቶ ኦዴዳዋዳን ኦድኖ። ሀ የዉ አይሁዳቱዋ ማታን ሀቼ ጋካናዉ፥ ኦደቲደ ደኤ።

የሱስ ባረና ካልያዋንቶ ቤቴዳ

16,17 ሽን ታማነ እት አ ካልያዋንቱ የሱስ ባረንታ ቢተ ጌዳ ጋሊላ ጋድያ ቢደ አ በኤዳ ዎደ፥ አዉ ጎይኔድኖ፤ ሽን ኡንቱንቱፐ እቱ እቱ ስድኖ።✝28:16-17 ማቶሳ 26:32፤ ማር. 14:28

18 የሱስ ኡንቱንቱኮ ሺቂደ፥ ኡንቱንታ ሀዋዳን ያጌዳ፤ "ማታይ ኡባይ ሳሉዋንነ ሳኣን ታዉ እመቴዳ። 19 ሄዋ ድራዉ፥ ህንተንቱ ቢደ፥ አሳ ኡባ ታና ካልያዋንታ ኦተ፤ አዉዋ ሱንን፥ ናኣ ሱንንነ ጌሻ አያና ሱንን ኡንቱንታ ጻማቅተ።✝28:19 ኪታ 1:8 20 ታን ህንተንታ አዛዜዳባ ኡባ ኡንቱንቱ ናጋና ማላ፥ ኡንቱንታ ታማርስተ፤ ታን ዎድያ ዉርሰይ ጋካናዉካ ኡባ ዎደ ህንተንቱና ደእያዋ አኬክተ" ያጌዳ።