1 ሄዋፐ ጉይያን፥ ጻላህያን ፓጨታና ማላ፥ ጌሻ አያናይ አሳይ ደኤና ሳኣ የሱሳ አፌዳ። 2 የሱስ ኦይታሙ ጋላሳነ ኦይታሙ ቃማ ጾሞዋፐ ጉይያን ኮሻቴዳ። 3 ጻላሂ ዪደ አ፥ "ኔን ጾሳ ናኣ ግዶፐ፥ አነ ሀ ሹቻቱዋ ኡክ ግዳና ማላ ጋ" ያጌዳ።

4 ሽን የሱስ ዛሪደ፥ "ጾሳ ማጻፋን፥ ‘አሳይ ጾሳይ ሃሳይያ ቃላ ኡባን ደአናፐ አትን፥ ኡክ ጻላላን ደኤና’ ያገት ጻፈቴዳ" ያጌዳ።✝

5 ሄዋፐ ጉይያን፥ ጻላሂ የሱሳ ጌሻ ካታማ አፍ ጌሻ ጎልያ ጼራን ኤሲደ፥ 6 "ኔን ጾሳ ናኣ ግዶፐ፥ አነ ዱገ ኩንዳ። አያዉ ጎፐ፥ ጾሳ ማጻፋን፥

" ‘ጾሳይ ባረ ኪታንቻቱዋ

ነዉ አዛዛናዋ’

ቃይ ‘ኡንቱንቱ ነ ገዲ ሹቻን በተና ማላ፥

ባረንቱ ኩሽያን ኔና ደንናዋንታ’

ያገት ጻፈቴዳ" ያጌዳ።✝

7 የሱስ ዛሪደ አ፥ "ቃይካ ጾሳ ማጻፋን፥ ‘ጎዳ ነ ጾሳ ፓጮፓ’ ያገት ጻፈቴዳ" ያጌዳ።✝

8 ቃይ ጻላሂ የሱሳ እት ዳሮ ዎልቃማ ደርያ ጼራ ከሲደ፥ ሀ አላምያን ደእያ ካዉተ ኡባነ ኡንቱንቱ ቦንቹዋ 9 በሲደ አ፥ "ኔን ታዉ ጉልባታደ ጎይኖፐ፥ ታን ሀዋ ኡባ ነዉ እማና" ያጌዳ።

10 ሄ ዎደ የሱስ ዛሪደ አ፥ "ላ ሀ ሴጻናዉ ሃካ፤ አያዉ ጎፐ፥ ጾሳ ማጻፋን፥ ‘ጎዳዉ፥ ነ ጾሳዉ ጎይና፤ አ ጻላላ ጎሸታ’ ጌተት ጻፈቴዳ" ያጌዳ።✝

11 ሄዋፐ ጉይያን፥ ጻላሂ የሱሳ አግና፥ ኪታንቻቱ ዪደ፥ አዉ ኦድኖ።

12 ዮሃንስ ቃሸቴዳዋ የሱስ ስሴዳ ዎደ፥ ጋሊላ ጌተትያ ጋድያ ቤዳ። 13 ናዝሬተፐ ከሲደ፥ ቅፍርናሆማ ካታማ ቢደ፥ ያን ደኤዳ፤ ቅፍርናሆም ዛብሎናንነ ንፍታሌመ ጋድያን ደእያ ጋሊላ አባ ማታን ደኤ። 14 ሀዌ ሀኔዳዌ ናብያ ኢስያስ፥

15 "ዛብሎነ ጋድያንነ ንፍታሌመ ጋድያን፥

አባ ኦግያን ዮርዳኖሳ ሻፋፐ ሄፍን ባጋን፥

አይሁዳ ግደና አሳይ ደእያ ጋሊላን፥

16 ማን ደእያ አሳይ፥

ዎልቃማ ፖኡዋ በኤዳ።

ቃይ ሀይቁዋ ኩዋይ ደእያ ጋድያን ኡቴዳዋንቶ

ፖኡ ከሴዳ"

ያጌዳዌ ፖለታና ማላሳ።✝

17 ሄ ዎድያፐ ዶሚደ የሱስ፥

"ህንተ ናጋራ ፓጽተ፤ አያዉ ጎፐ፥

ሳሉዋ ካዉተይ ማታቴዳ ድራሳ"

ጊደ ቃላ ኦዱዋ ዶሜዳ።

18 የሱስ ጋሊላ አባ ማታና አደ፥ ላኡ እሻቱ ጰጽሮሳ ጌተትያ ስሞንነ አ እሻ እንድራስ፥ ሞልያ ኦይቂያዋንታ ግዶ ድራዉ፥ ዳባ* አባን የግያዋንታ በኤዳ። 19 ኡንቱንታ፥ "ታና ካልተ፤ ታን ህንተና ሞልያ ኦይቂያዋዳን አሳ ታኮ አህያ ኦግያ ታማርሳና" ያጌዳ። 20 ኡንቱንቱ ኤለካ ባረንቱ ዳባ አጊደ፥ የሱሳ ካሌድኖ።

21 የሱስ ሄዋፐ ስንኮ ቢደ፥ ሀራ ላኡ እሻቱዋ፥ ዛብድዮሳ ናና ያቆባነ አ እሻ ዮሃንሳ በኤዳ፤ ኡንቱንቱ ባረንቱ አዉዋ ዛብድዮሳና ሃ ቦላን ብያ ዎንግርያ ግዶን ባረንቱ ዳባ ጊግስያዋንታ በኢደ፥ ጼሴዳ። 22 ኡንቱንቱ ኤለካ ሃን ብያ ዎንግርያነ ባረንቱ አዉዋ አጊደ፥ የሱሳ ካሌድኖ።

23 የሱስ አይሁዳ ዎሳ ጎለቱዋን ታማርሲደ፥ ካዉተ ምሽራቹዋ ቃላ ኦዲድነ ቃይ ሀርግያ ኡባፐነ ሳኩዋ ኡባፐ አሳ ፓደ፥ ጋሊላ ጋድያ ኡባን ዩዬዳ። 24 አ ዋሪ ሶርያ ጋድያ ኡባ ጋኬዳ፤ ዱማ ዱማ ሀርግያን ኦይቀቲደ ሀርጌዳ አሳ ኡባ፥ ጻላሀቱዋን ኦይቀቴዳዋንታ፥ ዪጩዋ ሳኩ ደእያዋንታ፥ ቃይ ጉንዴዳዋንታ አሳይ የሱሳኮ አሄዳ፤ እ ኡንቱንታ ፓዳ። 25 ጮራ አሳይ ጋሊላፐ፥ ታሙ ካታማቱዋፐ፥ የሩሳላመፐ፥ ይሁዳፐነ ዮርዳኖሳፐ ሄፍንን ደእያ ጋድያፐ የሱሳ ካሌድኖ።