1 የሱስ ጮራ አሳ በኢደ፥ ፑደ ደርያ ከሲደ ኡቴዳ። አ ካልያዋንቱ አኮ ሺቄድኖ። 2 ኡንቱንታ ሀዋዳን ያግ ታማርሱዋ ዶሜዳ።

3 "ባረንቱ አያና ደኡዋን፥

ህዬሳ ግዴዳዋ ኤርያዋንቱ አንጀቴዳዋንታ፤

አያዉ ጎፐ፥ ሳሉዋ ካዉተይ ኡንቱንቱሳ።

4 ካዮትያዋንቱ አንጀቴዳዋንታ፤

አያዉ ጎፐ፥ ጾሳይ ኡንቱንታ ምንሳና።✝

5 አሽከ ግዴዳዋንቱ አንጀቴዳዋንታ፤

አያዉ ጎፐ፥

ኡንቱንቱ ሳኣ ላታና።✝

6 ጽሎተ ኮሻትያዋንቱነ ሳመትያዋንቱ፥*

አንጀቴዳዋንታ፤

አያዉ ጎፐ፥ ጾሳይ ኡንቱንታ ካልሳና።

7 ማርያዋንቱ አንጀቴዳዋንታ፤

አያዉ ጎፐ፥

ጾሳይ ኡንቱንታ ማራና።

8 ዎዛና ጌሻቱ አንጀቴዳዋንታ፤

አያዉ ጎፐ፥

ኡንቱንቱ ጾሳ በአና።

9 አሳ ስገያዋንቱ አንጀቴዳዋንታ፤

አያዉ ጎፐ፥ ጾሳይ ኡንቱንታ፥

ባረ ናና ጊደ ጼሳና።

10 ጽሎተ ድራዉ፥

የደርሰትያዋንቱ አንጀቴዳዋንታ፤

አያዉ ጎፐ፥ ሳሉዋ ካዉተይ ኡንቱንቱሳ።*

11 "ህንተ ታና ካልያ ድራዉ፥ አሳይ ህንተና ቦርያ ዎደነ ዋይስያ ዎደ፥ ቃይ ህንተ ቦላ ኢታባ ኡባ ዎርዱዋን ሃሳይያ ዎደ፥ ህንተ አንጀቴዳዋንታ። 12 ህንተዉ ሳሉዋን ዎልቃማ ዎይታይ ደእያ ድራዉ፥ ናሸትተ፤ ሀሹ ጊተ፤ አያዉ ጎፐ፥ አሳይ ህንተፐ ካሰ ደኤዳ ናባቱዋ ሄዋዳን የደርሴድኖ።

13 "አሳ ኡባዉ ህንተ ማጽነ ማላ፤ ሽን ማጽኒ ማልአና ዮፐ፥ ዛሪደ አ ዎት ማልኤኔ? ካረ ኦልና፥ አሳይ አ የ ሀመታናፐ አትን፥ ስንዉ አይነ ማደና።

14 "ሀ አላመዉ ህንተ ፖኦ፤ ደርያ ሁጲያን ኬጸቴዳ ካታማይ ጌማና ዳንዳየና። 15 ጾምፕያ ጾምፒደ፥ ሶይን ደእያ አሳ ኡባዉ ፖአና ማላ፥ ቂያ ሳን ዎፐ አትን፥ ካምያ ሚሻ ግዶን ቁምእ ዎያ አሳይ ኦንነ ባዋ። 16 ሄዋዳንካ፥ አሳይ ህንተ ኦያ ሎኦ ኦሱዋ በኢደ፥ ሳሉዋን ደእያ ህንተ አዉዋ ቦንቻና ማላ፥ ህንተ ፖኡ አሳ ስንን ፖኦ።

17 "ታን ሙሴ ህግያነ ናባቱ ታማርስያዋ* ይሳናዉ ዬዳዋ ህንተዉ ማላቶፖ፤ ታን ፖላናዉ ዬዳዋፐ አትን፥ ይሳናዉ ያበይከ። 18 አያዉ ጎፐ፥ ታን ህንተዉ ቱሙዋ ኦዳይ፤ ሳሉነ ሳአይ አና ጋካናዉ፥ ቃይ ኡባባይካ ፖለታና ጋካናዉ፥* ህግያፐ እት ጫቻይካ ዎይ ቄር ፕዶሊካ አና። 19 ሄዋ ድራዉ፥ ሀ አዛዙዋ ኡባፐ ጉጽያ እት አዛዙዋ መንያ ኡራይ ኦንነ፥ ቃይ ሀራቱካ ባረዋዳን ሀናናዳን ታማርስያ ኡራይ ኦንነ፥ ሳሉዋ ካዉተን ኡባፐ ጉ ግዳና፤ ሽን አዛዙዋ ኦያዌነ ሀራንቱካ ኦናዳን ታማርስያዌ ኦንነ ሳሉዋ ካዉተን ቃ ግዳና። 20 አያዉ ጎፐ፥ ህንተ ጽሎተይ ሙሴ ህግያ ታማርስያዋንቱ ጽሎተፐነ ፓርሳዋቱዋ ጽሎተፐ ዳራና ዮፐ፥ ሳሉዋ ካዉተ ህንተ ሙለ ገለናዋ ታን ኦዳይ።

21 "በን አሳዉ፥ ‘አሳ ዎፓ፤ አሳ ዎዳ ኦንነ ፕርደታና’ ጌዳዋ ስሴድታ።✝ 22 ሽን ታን ህንተዉ ኦዳይ፤ ባረ እሻ ሀንቀትያ ኡባይ ፕርደታና፤ ባረ እሻ ቦርያ ኡባይ ሻንጉዋ ፕርዳዉ ሺቃና፤ ቃይ ባረ እሻ፥ ‘ሎዌ’ ግያ ኡባይ ጋናምያ ታማ ፕርዳዉ ሺቃና። 23 ሄዋ ድራዉ፥ ኔን ያርሽያሳን ያርሽሽን፥ ነ እሻ ናቄዳባይ ነዉ ሄዋን ሀሳየቶፐ፥ 24 ነ ያርሹዋ ሄዋን አጋደ ባ፤ ካሰታደ ነ እሻና ስገታ ድጋ፤ ሄዋፐ ካላ ያደ፥ ነ ያርሹዋ ያርሻ።

25 "ኔና ሞትያዋና ዎዲ ደእሽን ኤለ አናና ስገታ ድጋ፤ ሄዌ ዮፐ፥ እ ኔና ዳና ስን አና፤ ቃይ ዳናይ ኔና ፖልሰዉ አ እምና፥ ፖልሲ ኔና ቃሾ ጎለን የጋና። 26 ታን ነዉ ቱሙዋ ኦዳይ፤ ኔን እት ሳንትሚ አተናን፥ ነ ማጋጩዋ ዉርሳደ ጭጋና ጋካናዉ፥ ሙለካ ቃሾ ጎለፐ ከሳካ።

27 " ‘ዎሹሞፓ’ ጌዳዋ ስሴድታ።✝ 28 ሽን ታን ህንተዉ ያጋይ፤ ‘ማጫዉኖ ጼሊደ አሞትያ ኡባይ፥ ባረ ዎዛና ግዶን ሄ ዎደ ኢናና ዎሹሜዳ።’ 29 ነ ኡሸቻ አይፊ ኔና ናጋራ ኦስሶፐ፥ ኔፐ ዎጫደ ኦላ አጋ፤ አያዉ ጎፐ፥ ነ ቦላይ ሙለካ ጋናምያ ታማን ኦለትያዋፐ፥ አፐ እቱ ፓጭንቶ ነዉ ሎአ።✝ 30 ቃይ ነ ኡሸቻ ኩሺ ኔና ናጋራ ኦስሶፐ፥ ኔፐ ቃንጻደ ኦላ አጋ፤ አያዉ ጎፐ፥ ነ ቦላይ ሙለካ ጋናምያ ታማን ኦለትያዋፐ፥ አፐ እቱ ፓጭንቶ ነዉ ሎአ።

31 " ‘ቃይ ባረ ማቻቶ የድያ ኦንነ እዞ የድያ ፓራማ እሞ’ ጌተቴዳ።✝ 32 ሽን ታን ህንተዉ ያጋይ፤ ‘ባረ ማቻታ ዎሹመናን ደእሽን የድያ ኦንነ እዞ ዎሹማ ከሴ፤ ቃይ አስናይ የዴዳ ምሽራቶ አክያዌ ኦንነ ዎሹሜ።’✝

33 "ቃይ በን አሳዉ፥ ‘ዎርዱዋን ጫቆፓ፤ ሽን ነ ጎዳዉ ጫቄዳዋ ፖላ’ ጌዳዋ ስሴድታ።✝ 34 ሽን ታን ህንተዉ ያጋይ፤ ‘ኡባካ ጫቆፕተ’፤ ሳሉ ጾሳ ካዉተ ኦይድያ ግድያ ድራዉ፥ ‘ሳሉዋን ጫቆፕተ’ 35 ቃይ ሳአይ አ ገዲ የያ ሳ ግድያ ድራዉ፥ ‘ሳኣን ጫቆፕተ’፤ ቃይካ፥ የሩሳላመ ዎልቃማ ካትያ ካታማ ግድያ ድራዉ፥ ‘የሩሳላመንካ ጫቆፕተ’✝ 36 ኔን እት ብናናካ ቦ ዎይ ካረ ከሳናዉ ዳንዳየና ድራዉ፥ ‘ነ ሁጲያንካ ጫቆፓ።’ 37 ሽን ህንተ፥ ‘ኤ’ ዎይ፥ ‘ግደና’ ጊተ፤ ሀዋንቱፐ ሀራይ ሴጻናፐ ዬ።

38 " ‘አይፍያ ድራዉ አይፍያ፤ አቻ ድራዉ አቻ’ ጌዳዋ ስሴድታ።✝ 39 ሽን ታን ህንተዉ ያጋይ፤ ‘ህንተዉ ኢታባ ኦያ ኡራዉ ኢታን ዛሮፕተ፤ ኦንነ ነ ኡሸቻ ባጋ ሻይያ ባቆፐ፥ ነ ሀድርሳ ባጋ ሻይያካ አ በሳ፤ 40 ነ ሻምጭያ አካናዉ እት ኡራይ ኔና ሞቶፐ፥ ሄ ኡራዉ ነ ኮትያካ ጉጃ እማ። 41 ኦንነ ኔና እት ሳትያ ኦግያ ባረናና ባናዳን ዎልቃንፐ፥ አናና ላኡ ሳትያ ኦግያ ባ። 42 ኔና ዎስያ ኡራዉ እማ፤ ቃይ ኔፐ ታልአና ኮይያ ኡራዉካ ድጎፓ።’

43 " ‘ነ ላገቱዋ ሲቃ፤ ነ ሞርክያ ሞርካ’ ጌዳዋ ስሴድታ።✝ 44,45 ሽን ታን ህንተዉ ያጋይ፤ ሳሉዋን ደእያ ህንተ አዎ ናና ግዳና ማላ፥ ህንተ ሞርከቱዋ ሲቅተ፤ ህንተና ሸቂያዋንታ አንጅተ፤ ህንተና እጽያዋንቶ ሎኦባ ኦተ፤ ህንተና የደርስያዋንቶ፥ ጾሳ ዎስተ፤ አያዉ ጎፐ፥ ኢታ አሳዉካ ሎኦ አሳዉካ ጾሳይ ባረ አዋ አዋጽሴ፤ ቃይ ጽላቶካ ናጋራንቻቶካ ባረ እራ ቡክሴ። 46 ህንተ ህንተና ሲቅያዋንቱ ጻላላ ሲቆፐ፥ ህንተዉ አይ ዎይታይ ደኢ? ሀራይ አቶ፥ ናጋራንቻቱካ ሄዋዳን ኦኖ። 47 ህንተ ህንተንቱ እሻቱዋ ጻላላ ሳሮቶፐ፥ ሀራቱ ኦያዋፐ አያባ አያ ኦድቴ? ሀራይ አቶ፥ አይሁደ ግደና አሳይካ ሄዋዳን ኦ። 48 ሄዋ ድራዉ፥ ሳሉዋን ደእያ ህንተ አዉ ፖሎ ግዶዋዳን፥ ህንተካ ፖሎ ግድተ።✝