1 "ጾሳይ ህንተንቱ ቦላ ፕርደና ማላ፥ ህንተካ ሀራቱዋ ቦላ ፕርዶፕተ። 2 አያዉ ጎፐ፥ ህንተንቱ ሀራቱዋ ቦላ ፕርድያዋዳን፥ ጾሳይ ህንተንቱ ቦላ ፕርዳና፤ ቃይ ህንተንቱ ሀራቶ እማናዉ ማክያባን እ ህንተዉ ማካና። 3 ነ አይፍያን ደእያ ቱሳ በአካ፤ ሽን ነ እሻ አይፍያን ደእያ ሱላ አያዉ ጼላይ? 4 ዎይ ነ አይፍያን ቱሳይ ደእሽን፥ ኔን ነ እሻ፥ ‘ታን ነ አይፍያፐ ሱላ ከሶ’ ዋናደ ጋናዉ ዳንዳያይ? 5 ላ ሀ ሎኡዋ ማላትያ ኢታዉ! ካሰታደ ነ አይፍያፐ ቱሳ ከሳ ድጋ፤ ሄዋፐ ጉይያን፥ ነ እሻ አይፍያፐ ሱላ ከሳናዉ ጌሻደ ጼላናዉ ዳንዳያ።

6 "ጌሻባ ካናቶ እሞፕተ፤ ኡንቱንቱ ጉየ ስሚደ፥ ህንተና ሳአና። ቃይ እንቁዋ ጌተትያ ህንተንቱ አልኦ ሹቻ ጉዱንቱዋ ስንን ኦሎፕተ፤ ኡንቱንቱ ባረንቱ ገድያን የና።

7 "ዎስተ፤ ህንተ አካና። ኮይተ፤ ህንተ ደማና። ካርያኮ ዪደ ጼስተ፤ ህንተዉ ፐንጊ ዶየታና። 8 አያዉ ጎፐ፥ ዎስያ ኡባይ አካና፤ ኮይያ ኡራይ ደማና፤ ቃይ ካርያኮ ዪደ ጼስያ ኡራዉ ፐንጊ ዶየታና። 9 ዎይ ህንተንቱ ግዶን ባረ ናአይ፥ ‘ኡክ እማ’ ጎፐ፥ ሹቻ እምያ አዉ ደኢ? 10 ቃይ፥ ‘ሞልያ እማ’ ጎፐ፥ አዉ ሾሻ እማናዌ? 11 ህንተንቱ ኢታ ግዲደ፥ ህንተንቱ ናናቶ ሎኦባ እምያዋ ኤሮፐ፥ ያትና፥ ሳሉዋን ደእያ ህንተንቱ አዉ ባረና ዎስያዋንቶ ሎኦባ ዎት ዳርስ እመኔ!

12 "ሄዋ ድራዉ፥ ሀራ አሳይ ህንተዉ ኦናዉ ኮይያ ኡባባ ህንተካ አሳዉ ኦተ፤ አያዉ ጎፐ፥ ሙሴ ህግያ ብለይነ ናባቱ ታማርስያዌ ሀዋ።

13 "ኡንአ ፐንግያና ገልተ። አያዉ ጎፐ፥ ባየዉ አፍያ ፐንጊ አኩዋ፤ ኦጊካ ዎጋ። ሄዋና ገልያ አሳይካ ጮራ።

14 "ሽን፥ ደኦ አፍያ ፐንጊ ኡንአ፤ ኦጊካ ጹን። ቃይ ሄዋ ደምያዋንቱካ ጉ።

15 "ቦላ ባጋና ዶርሳ ማላቲደ፥ ህንተኮ ይያ ዎርዶ ናባቱዋፐ ናገትተ፤ ሽን ኡንቱንቱ ጋርሳ ባጋና ዋላቱዋ ማላ። 16 ኡንቱንቱ አይፍያ አይፍያዋን ህንተ ኡንቱንታ ኤራና፤ አጉንይ ዎደን አይፍያ አይፈና፤ ጎምኦሪካ ኮክያ አይፍያ አይፈና። 17 ሄዋዳንካ፥ ሎኦ ም ኡባይ ሎኦ አይፍያ አይፌ፤ ሽን ኢታ ምይ ኢታ አይፍያ አይፌ። 18 ሎኦ ምይ ኢታ አይፍያ አይፋናዉ ዳንዳየና፤ ቃይ ኢታ ምይካ ሎኦ አይፍያ አይፋናዉ ዳንዳየና። 19 ሎኦ አይፍያ አይፈና ም ኡባይ ቃንጸቲደ፥ ታማን የገታና። 20 ሄዋ ድራዉ፥ ህንተ ኡንቱንቱ አይፍያ አይፍያዋን ኡንቱንታ ኤራንታ።

21 "ሳሉዋን ደእያ ታ አቡ ጌዳዋ ኦያ ኡራይ ሳሉዋ ካዉተ ገላናፐ አትን፥ ‘ጎዳዉ፥ ጎዳዉ’ ግያ ኡባይ ገለና። 22 ፕርዳ ጋላስ ዳሮ አሳይ ታና፥ ‘ጎዳዉ፥ ጎዳዉ፥ ኑን ነ ሱንን ጾሳይ ኪቶዋ ኦድበይኮ? ነ ሱንን ጻላሀቱዋ ከስበይኮ? ቃይ ኑን ጾሳይ ኦያ ማላልስያባ ነ ሱንን ኦበይኮ?’ ያጋናዋንታ። 23 ታን ሄ ዎደ ኡንቱንታ፥ ‘ታን ህንተና ኡባካ ኤርከ፤ ኢታባ ኦያዋንቱ ህንተ ታ ማታፐ ሃክተ’ ያጋና።✝

24 "ሄዋ ድራዉ፥ ሀዋ ታ ቃላ ስሲደ ኦያ ኡባይ ምኖ ዛላ ቦላ ባረ ጎልያ ኬጼዳ ዎዛናማ አሳ ማላ። 25 እራይ ቡኪደ፥ ድኡ ድኤዳ፤ ጫርኩካ ጫርኪደ፥ ሄ ጎልያ ሱጌዳ። ሽን ጎሊ ምኖ ዛላ ቦላ ኬጸቴዳ ድራዉ፥ ኩንድቤና።

26 "ሀዋ ታ ቃላ ስሲደ ኦና አሳይ ኡባይ፥ ባረ ጎልያ ሻፍያ ቦላ ኬጼዳ ቦዛ አሳ ማላ። 27 እራይ ቡኪደ፥ ድኡ ድኤዳ፤ ጫርኩካ ጫርኪደ፥ ሄ ጎልያ ሱግና፥ ጎሊ ኤለካ ኩንዴዳ። ሄ ጎሊ ዎልቃማ ኩንደ ኩንዴዳ።"

28 የሱስ ባረ ሃሳይያዋ ዉርሴዳ ዎደ፥ አሳይ እ ታማርስያዋን ማላለቴድኖ። 29 አያዉ ጎፐ፥ እ ኡንቱንታ ታማርሲደ፥ ሙሴ ህግያ ታማርስያዋንቱዳን ግደናን፥ ማታይ ደእያ አሳዳን ታማርሶ ድራሳ።