1 ሀዋፐ ካላ የሱስ ዎንግርያን ገሊደ፥ አባ ፕኒደ፥ ባረ ካታማ ዬዳ። 2 አማሬዳ አሳይ ቦላይ ጉንዴዳ እት ብታንያ ሻንቻማን ቶኪደ፥ የሱሳኮ አሄድኖ፤ የሱስ ኡንቱንቱ አማኑዋ በኢደ፥ ቦላይ ጉንዴዳ ብታንያ፥ "ታ ናአዉ፥ ያዮፓ፤ ነ ናጋራይ አቶ ጌተቴዳ" ያጌዳ።

3 ህግያ ታማርስያዋንቱፐ እቱ እቱ ባረንቱ ዎዛናን፥ "ላ ሀ ብታኒ ጾሳ ቦላ ኢታባ ሃሳዬቴ!" ያግ ቆፔድኖ።

4 የሱስ ኡንቱንቱ ቆፋ ኤሪደ፥ ኡንቱንታ ሀዋዳን ያጌዳ፤ "ህንተንቱ ህንተ ዎዛናን ሀዋ ማላ ኢታባ አያዉ ቆፒቴ? 5 ‘ነ ናጋራይ አቶ ጌተቴዳ’ ያግያዌ ማቴዬ? ዎይ፥ ‘ደንዳ ኤቃደ ሀመታ’ ያግያዌ ማቴ? 6 ሽን ሳኣ ቦላን ናጋራ አቶ ጋናዉ ታዉ፥ አሳ ናአዉ፥ ማታይ ደእያዋ ታን ህንተና ኤርሳና" ያጊደ፥ ሄዋፐ ጉየ እ ሄ ቦላይ ጉንዴዳ ብታንያ፥ "ደንዳ ኤቃ፤ ያታደ ነ ሻንቻማ ቶካደ፥ ነ ጎለ ባ" ያጌዳ።

7 ጉንዴዳ ብታኒካ ደንድ ኤቂደ፥ ባረ ጎለ ቤዳ። 8 ሽን ዳሮ አሳይ ሄዋ በኢደ ያዬድኖ፤ አሳዉ ሀዋ ማላ ማታ እሜዳ ጾሳ ጋላቴድኖ።

9 የሱስ ሄዋና አደ፥ ማቶሳ ያግያዌ ቃራጻ ቃንጽያ ሳን ኡቴዳዋ ደሚደ አ፥ "ታና ካላ" ያጌዳ።

ማቶስካ ደንድ ኤቂደ፥ አ ካሌዳ።

10 የሱስ ማቶሳ ጎለን ቁማ ማናዉ ኡት ደእሽን፥ ቃራጻ አክያ ጮራ አሳይነ ናጋራንቻቱ ዪደ፥ አናናነ አ ካልያዋንቱና እትፐ ጋይታን ኡቴድኖ። 11 እት እት ፓርሳዋቱ ሄዋ በኢደ፥ የሱሳ ካልያዋንታ፥ "ህንተና ታማርስያዌ ቃራጻ ቃንጽያዋንቱናነ ናጋራንቻቱዋና ቁማ አያዉ እትፐ ሚ?" ያጌድኖ።

12 ሽን የሱስ ኡንቱንቱ ያግያዋ ስሲደ፥ "ሀርጋንቻቱዋፐ አትን፥ ፓጻቶ አክሚ ኮሸና። 13 ሽን ህንተንቱ ቢደ፥ ጾሳ ማጻፋይ፥ ‘ታን ማሮተ ኮያይፐ አትን፥ ያርሹዋ ኮይከ’ ያግያዌ ዋግያዌንቶ ኤርተ፤ አያዉ ጎፐ፥ ታን ናጋራንቻቱዋ ጼሳናዉ ዬዳዋፐ አትን፥ ጽላቱዋ ጼሳናዉ ያበይከ" ያጌዳ።

14 ሄ ዎደ ዮሃንሳ ካልያዋንቱ የሱሳኮ ዪደ፥ "ኑንነ ፓርሳዋቱ ኡባ ዎደ ጾሜቶ፤ ሽን ኔና ካልያዋንቱ አያዉ ጾምክኖ?" ያጊደ አ ኦቼድኖ።

15 የሱስ ኡንቱንታ፥ "ቡላቻ ዬዳ አሳይ ማቻቶ አክያዌ ባረንቱና ደእሽን፥ ካዮታናዉ ዳንዳዪኖ? ዳንዳይክኖ፤ ሽን ማቻቶ አክያዋ ኡንቱንቱ ማታፐ አፋና ዎዲ ያና፤ ኡንቱንቱ ሄ ዎደ ጾማናዋንታ" ያጌዳ።

16 "ኤጫ ማዩዋ ቦላ ኦራ ፍያ ዎደ ስክያ አሳይ ባዋ፤ አያዉ ጎፐ፥ ኦራ ፊ ኤጫ ማዩዋ ፔሬና፤ ፔይካ ካሰዋፐ ዳራናዋ። 17 ሆኦ ዎይንያ ኤሳ ኤጫ ኦጎሩዋን ናእያ አሳይ ባዋ። ሽን ናኦፐ፥ ሄ ዎይንያ ኤሳይ ኦጎሩዋ ዳካና፤ ባረዉካ ዎፈታና፤ ኦጎሩካ ባያናዋ። ሽን፥ ሆኦ ዎይንያ ኤሳ ኦራ ኦጎሩዋን ናአናዉ በሴ፤ ላኡካ ባይክኖ" ያጌዳ። ዎይንያ ኤሳ ኦጎሩዋ

18 የሱስ ኡንቱንቶ ሄዋ ኦድሽን፥ አይሁደ ዎሳ ጎለ ካፓቱዋፐ እቱ አኮ ይ አ ስንን ጉልባቲደ፥ "ታ ናታ ሀእ ሀይቃዱ፤ ሽን ኔን ያደ ነ ኩሽያ እዝ ቦላ ዎርኪ፤ እዛ ደኡዋን ደአናዉኑ" ያጌዳ።

19 የሱስ ደንዲደ፥ ባረና ካልያዋንቱና እትፐ ብታንያ ካሊደ ቤዳ። 20 ሄ ዎደ ታማነ ላኡ ላይ ኩመን፥ እዝ ቦላፐ ሱይ ጎግያ እት ምሽራታ ጉየና ሺቃደ፥ የሱሳ ማዩዋ ማጫራ ቦቻዱ። 21 ሀዋ እዛ ኦዌ፥ እዛ ባረ ዎዛናን፥ "ታን አ ማዩዋ ጻላላ ቦቻንቶ ፓጻና" ያጋደ ቆፓዱ።

22 ሽን የሱስ ዩይ እዞ ጼሊደ፥ "ታ ናቴ፥ ያዮፓ፤ ኔና ነ አማኑ ፓዳ" ያጌዳ። ሄ ማንእያን ምሽራታ ፓጻ አጋዱ።

23 የሱስ አይሁዳ ዎሳ ጎለ ካፑዋ ሶይ ጋኬዳ ዎደ፥ ዬኩዋን ድንካ ፑንያ አሳነ ዬክያ አሳ በኢደ፥ 24 "ካረ ከስተ፤ ጉ ናታ ገምእሻዱፐ አትን፥ ሀይቃበይኩ" ያጌዳ። ሄዋፐ ጉይያን አሳይ አ ቦላ ዳሪ ሚጬዳ። 25 ሽን ጮራ አሳ ካረ እ ከሴዳዋፐ ጉይያን፥ ጎለ ገሊደ፥ ናት ኩሽያ ኦይቄዳ፤ ናታካ ደንዳ አጋዱ። 26 ሄ ዋሪ፥ ሄ ማንእያን ሄ ጋድያን ኡባን ስሰቴዳ።

27 የሱስ ሄዋና አደ ብያ ዎደ፥ ላኡ ቆቃቱ ባረንቱ ቃላ ቁ ኦደ፥ "ዳዊተ ናአዉ፥ ኑና ማራርኪ" ያጊደ አ ካሌድኖ።

28 የሱስ ጎለ ገሌዳ ዎደ፥ ቆቃቱ አኮ ዬድኖ፤ የሱስ ኡንቱንታ፥ "ታን ሀዋ ኦናዉ ዳንዳይያዋ አማኒቴ?" ያጌዳ።

ኡንቱንቱ፥ "ኤ ጎዳዉ" ያግ ዛሬድኖ።

29 ሄዋፐ ጉይያን፥ የሱስ ኡንቱንቱ አይፍያ ባረ ኩሽያን ቦቺደ ኡንቱንታ፥ "ህንተዉ ህንተንቱ አማኑዋዳን ሀኖ" ያጌዳ። 30 ኡንቱንቱ አይፊ ዶየት አጌዳ፤ የሱስ ኡንቱንቶ፥ "ሀዋ ኦስነ ኦዶፕተ" ያጊደ ምንሲደ ኦዴዳ። 31 ሽን ኡንቱንቱ ቢደ፥ ሄ ጋድያ ኡባን የሱሳባ ኦዴድኖ።

32 ኡንቱንቱ ከሲደ ብያ ዎደ፥ አማሬዳ አሳይ ኢታ አያናይ ኦይቂና ዱዴዳ ብታንያ የሱሳኮ አሄድኖ። 33 የሱስ ኢታ አያና ከሴዳዋፐ ጉይያን፥ ዱደ ብታኒ ሃሳዬዳ። አሳይ፥ "ሀዌ ኦራባ፤ ሀዋ ማላባይ እስራኤልያ ጋድያን ኡባካ ሀንቤና" ያግ ማላለቴድኖ።

34 ሽን ፓርሳዋቱ፥ "እ ኢታ አያናቱዋ ካፑዋ ዎልቃን ጻላሀቱዋ ከሴ" ያጌድኖ።✝

35 የሱስ ኡንቱንታ አይሁዳ ዎሳ ጎለቱዋን ታማርሲደነ ካዉተ ዎንጋላ ምሽራቹዋ ኦዲደ፥ ቃይ ሀርግያ ኡባፐነ ሳኩዋ ኡባፐ አሳ ፓደ፥ ዎጋ ካታማቱዋንነ ቄር ካታማቱዋ ኡባን ዩዬዳ።✝ 36 ጮራ አሳ በኢደ፥ ሄምያ አሳይ ባይና ዶርሳዳን አሳይ ህርገትያ ድራዉነ አሳ ማድያባይ ባይና ድራዉ፥ አሳዉ ቃረቴዳ።✝ 37 ያቲደ ባረና ካልያዋንታ፥ "ቆይቻዉ ጋካ ካይ ዳራ፤ ሽን ጫክያ አሳይ ጉ። 38 ስም ካ ጎዳይ ካ ጫካናዉ ኦሳንቻቱዋ የዳና ማላ፥ አ ዎስተ" ያጌዳ።