1 እስራኤልያ ጋደ ዳናቱ ሞድያ ዎደ፥ ሄ ጋድያን ኮሻይ ደንዴዳ። እት ብታንያ ባረ ማቻትናነ ባረ ላኡ ናናነ ይሁዳ ጋድያን ቤተሌመ ካታማፐ ደንዲደ፥ ሞኣበ ጋድያ በቴዳ። 2 ሄ ብታንያ ሱንይ ኤልመሌካ፤ አ ማቻት ሱንይ ኑሃሞ፤ አ ላኡ ናና ሱንይ ማህሎናነ ኬልዎናነ። ኡንቱንቱ ይሁዳ ቤተሌመን ደእያ ኤፍራታ ያራ። ሄዋንቱ ሞኣበ ቢደ ያን ደኤድኖ።

3 ኑሃም አስናይ ኤልመሌክ ሀይቄዳ። እዛ ባረ ላኡ ናናቱዋን አታዱ። 4 ሄ ናናይ ሞኣበ ጋደ ማጫ ናናቱዋፐ ኦርፖነ ኡሩቶነ ጌተትያ ማቻቱዋ አኬድኖ። ሄዋን ታሙ ላይ ግድያዋ ኡቲደ፥ 5 ማህሎንነ ኬልዎንነ ላአቱካ ሀይቄድኖ። ኑሃማ ባረ አስናይካ ባረ ላኡ ናናይካ ሀይቅና ባረካ አታዱ።

6 አ ሞኣበን ደኣደ፥ መና ጎዳይ ባረ አሳ እስራኤልያ ማሪደ፥ ካ ኡንቱንቶ ጋዳዋ ስሳዱ። ሞኣበ ጋድያፐ ስማናዉ ባረ ናና ማቻቱዋ ላአቱዋና ደንዳዱ፤ 7 ባረ ናና ማቻቱዋ ላአቱዋና እትፐ ባረ ደኢያሳፐ ከሳዱ። ኡንቱንቱ ጉየ ይሁዳ ጋድያ አፍያ ኦግያን ገሌድኖ።

8 ኑሃማ ባረ ናና ማቻቱዋ፥ "ስምተ፤ ህንተንቱ ኡባይካ ህንተንቱ አት ሶ አት ሶ ቢተ። ህንተንቱ ሀይቄዳዋንቶነ ታዉነ ኬከዳዋዳን፥ መና ጎዳይ ህንተንቶ ኬኮ። 9 ህንተንቱ ሁጲያን ሁጲያን ገልያ ሀራ አስናቱ ሶን መና ጎዳይ ዎፓ እሞ" ያጋደ ኡንቱንታ የራዱ።

ሽን ኡንቱንቱ ባረንቱ ቃላ ቁ ኦደ ዬኪደ፥ 10 "ኑን ኔናና ነ አሳኮ ባና" ያጌድኖ።

11 ሽን ኑሃማ ኡንቱንታ፥ "ሀይ ታ ናቶ፥ ስምተ። ህንተንቱ ታናና አያዉ ቢቴ? ህንተንቶ አስና ግዳናዉ አቱማ ናና ታን ሀዋፐ ጉየ የላንታየ? 12 ታ ናቶ፥ ስምተ፤ ታን ሀራ አስና ገለናዳን ኤጫክቻድ። ዎን ታን የላና ጋይታንቶነ፥ ሀቼ ቃማ ኡባ አስና ገላደ፥ አቱማ ናና የላይታንቶነ፥ 13 ሄዋንቱ ድጭ ጋካናዉ ናጋኒቴየ? ኡንቱንቱ ድራዉ ጊደ፥ አስና ገለናን አት አጋንቴየ? ታ ናቶ፥ ሄዌ ሀነናዋ ግድያዋ ህንተንቱ ኤሪታ። መና ጎዳይ ታና መቶዳዋ ድራዉ፥ ህንተንታ ጋኬዳባይ ታና ሎይ ሴሌ" ያጋዱ።

14 ሄዋን ኡንቱንቱ ባረንቱ ቃላ ቁ ኦደ፥ ዬኬድኖ። ያትና ኦርፓ ባረ ቦሎታቶ የራ አካደ፥ ስማ አጋዱ። ሽን ኡሩታ ኦ ባቃ ኦይቃደ እጻዱ። 15 ኑሃማ ኦ፥ "በአ፥ ነ አስና እሻ ማቻታ ባረ አሳኮነ ባረ ጾሳኮነ ስማዱ። ኔንካ እዝና ስማደ ባ" ያጋዱ።

16 ኡሩታ ዛራደ፥ "ታን ኔፐ ሻከታናዳን ዎይ ኔና አጋደ ጉየ ስማናዳን ታና መቶፓ። ኔን ብያሳኣ ሀቃነ ታን ባና፤ ኔን ደእያ ሳኣን ሀቃንነ ታን ደአና። ነ አሳይ ታ አሳ ግዳና፤ ነ ጾሳይ ታ ጾሳ ግዳና። 17 ኔን ሀይቂያ ሳኣን ታን ሀይቃና፤ ሄዋን ሞገታ አጋና። ሀይቆፐ አትን፥ ሀራባይ ታና ኔፐ ሻኮፐ፥ መና ጎዳይ ታና ዎ" ያጋዱ።

18 ኡሩታ እዝና ባናዉ ባረ ቆፋ ቃቼዳዋ ኑሃማ ኤራደ፥ ጮኡ ጋደ አጋ ባሻዱ። 19 ሄዋ ድራዉ፥ ላኡ ማጫ አሳቱ ቤተሌመ ጋካናዉ ቤድኖ። ኡንቱንቱ ቤተሌመ ጋክያ ዎደ፥ ሄ ካታማ አሳይ ኡባይ ኡንቱንቱባን ማላሌቴዳ። ቃይ ማጫ አሳቱ፥ "ሀና ኑሃሚ?" ያጌድኖ።

20 አ ዛራደ ኡንቱንታ፥ "ታና፥ ኑሃሞ* ጎፕተ፤ ‘ጫመቴዳነ’ ጊተ። አያዉ ጎፐ፥ ኡባ ዳንዳይያ ጾሳይ ታ ደኡዋ ዳርስ ጫምሴዳ። 21 ታን ኩመንን ከሳደ ባድ፤ ሽን መና ጎዳይ ታና መላ ዛሬዳ። መና ጎዳይ ታና ቱጋዪደ ኡባ ዳንዳይያ ጾሳይ ታናን ፓላባ ጋዳ። ያትና፥ ታና አያዉ ኑሃመ ጊደ ጼሲቴ?" ያጋዱ።

22 ሄዋዳን ሀናደ፥ ኑሃማ ባረ ናኣ ማቻት ሞኣበ ኡሩትና ስማዱ። ኡንቱንቱ ቤተሌመ ጋኬዳዌ ባንጋ ጫካይ ዶመትያ ዎድያና።