ኡሩታ ቦኤዛ ጋደ ቃርምያ ቆራናዉ ባዱ
1 ኑሃሚው እዝ አስና ኤልመሌካ ባጋና ዳቦትያ፥ ቦኤዛ ግያ እት ኤረቴዳ ዱረ ብታኒ ደኤ። 2 እት ጋላስ ሞኣባታ ኡሩታ ኑሃሞ፥ "ታዉ ቃረትያ አሳ ካላደ ቃርምያ ቆራናዉ ካ ጫክያ ሳኣ ቦሻ?" ያጋዱ።2:2 ዎጋ 19:9-10፤ ዛረ. 24:10
እዛ፥ "ኤ ታ ናተ፥ ባ" ያጋዱ።
3 ኡሩታ ባደ፥ ካ ጫክያ አሳ ጌዱዋፐ ቃርምያ ዶማዱ። ካጫዳን አ ቃርምያ ማጽያዋ ጋዲ ኤልመሌካ ዳቡዋ ቦኤዛ ጋደ። 4 ሄ ዎደንካ ቦኤዝ ቤተሌመ ካታማፐ ጋክ ዎዳ፤ ካ ጫክያ አሳ፥ "መና ጎዳይ ህንተንቶ ዎልቃ እሞ" ያጌዳ።
ኡንቱንቱካ ዛሪደ፥ "ኔናካ መና ጎዳይ አንጆ" ያጌድኖ።
5 ያትና ቦኤዝ ካ ጫክያዋንቱ ካፑዋ፥ "ሀና ያላጋ ማጫውና ኦኒ?" ያጊደ ኦቼዳ።
6 ጫክያዋንቱ ካፑ ዛሪደ፥ "ሀና ያላጋታ ኑሃምና ሞኣበ ጋድያፐ ዬዳ ሞኣበ ማጫ አሳ። 7 አ ታና፥ ‘ካ ጫክያዋንቱ ጌዱዋ ካላደ ፖቻቱዋ ግዱዋፐ ቃርምያ ማጾ?’ ጋደ ኦቻዱ። ያቴዳና ዎንታ ዮደፐ ዶማደ ሀእ ጋካናዉ፥ ጉነ ሸምፐናን ሀዋን ማጻደ ጋምኣዱ" ያጌዳ።
8 ቦኤዝ ኡሩቶ፥ "ታ ናተ፥ ስሳ፤ ቃርምያ ማጻናዉ ሀራ ጋደ ቦፓ። ቃይ ሀዋፐ ሀቃነ ቃጾፓ። ታ ማጫ ቆማቱዋና ሀዋን ፔሻ። 9 አሳይ ካ ጫክያ ሳኣ ጼላ ጼላደ፥ ኡንቱንቱ ጌዱዋ ካላደ ማጻ። አቱማ ቆማቱ ኔና ቦቼናዳን ታን ኡንቱንቶ ኦዳድ። ቃይ ኔና ሳምያ ዎደ፥ አቱማ ቆማቱ ትክ ዎዳ ሃ ኦቱዋኮ ባደ ኡሻ" ያጌዳ።
10 ኡሩታ ሶምእ ሳኣ ጋካናዉ ሆካደ ዉትሻዱ፤ "ታን እማ አሳ ግድክታ? ኔን ሀዋ ኬሻ ታዉ ቃረቴዳዌ አያ ድራሴ?" ያጋዱ።
11 ቦኤዝ ዛሪደ፥ "ነ አስናይ ሀይቆደፐ ዶምና፥ ኔን ነ ቦሎታትዉ ኦዳ ኩመን ኡባ ታን ስሳድ። ኔን ነ አቶ፥ ነ አዉዋነ ነ የለቴዳ ጋዲያ አጋደ፥ ሀዋፐ ካሰ ነ ኤረና አሳና ደአናዉ ዬዳዋ ታን ጌሻደ ኤራድ። 12 ኔን ሀኔዳዋ ኩሽያ መና ጎዳይ ነዉ ዛሮ። ኔን አ ቀፍያ ጋርሳን አታናዉ ዬዳ መና ጎዳይ፥ እስራኤልያ ጾሳይ ነዉ ኩመንባ እሞ" ያጌዳ።
13 ኡሩታ፥ "ታ ጎዳዉ፥ ኔን ታዉ ዳርሳ ቃረታዳ፤ ታን ነ ቆማቱፐ እቱዋ ጋክከ፥ ሽን ታዉ ሎኦባ ሃሳያደ፥ ታና ምንዳ" ያጋዱ።
14 ላጻ ምያ ዎደ ቦኤዝ ኦ፥ "ሃ ሺቃ፤ ኡክ አካደ ዎይንያ ኤሳ ጫላን ቱሻ ቱሻደ ማ" ያጌዳ። ካ ጫክያዋንቱ ማታን ኡታዱ። እዝዉ ትሻ ጺጼዳዋካ እሜዳ፤ አ ማደ ካልና፥ ቁማይ ፓላሄዳ።
15 ቃይካ ቃርምያ ማጻናዉ አ ደንድያ ዎደ፥ ቦኤዝ ባረ ቆማቱዋ፥ "ፖቺያ ጋርሳፐካ አ ቆሮፐካ፥ ኦ ዬላዮፕተ። 16 ኡባ ፖቺያፐካ ሾዲደ፥ እዝዉ የግ አግተ፤ እዛ ማጹ፤ ኦ አማሳሎፕተ" ያጌዳ።
17 ሄዋን ኡሩታ ኦማርስ ጋካናዉ ቆራዱ። ባረ ማጻ ፔሾዋ አ ቡክና፥ ታሙ ኪሎ ግራመ ባንጋ ግድያዋ ከሴዳ። 18 አ ሄ ካ ባአ አካደ፥ ካታማ ስማዱ፤ አይ ኬሻ ካ ማጻደንቶ አ ባረ ቦሎታቶ በሳዱ። ቃይ ባረ ሚሽን ፓላሂደ አቴዳ ቁማ አሄዳዋ ከሳደ እዝዉ እማዱ።
19 ያትና፥ እዝ ቦሎታታ ኦ፥ "ሀቼ ሀዋ ሀቃፐ ማጻዲ? ሀቃን ኦዲ? ነዉ ሀዋዳን ኬኬዳ ብታኒ አንጀቶ" ያጋዱ።
እዛ ባረ ኦ ፔሼዳ ጋድያ ጎዳባ ባረ ቦሎታትዉ ኦዳዱ። "ታን ሀቼ ኦደ ፔሼዳ ጋድያ ጎዳ ሱንይ ቦኤዛ" ያጋዱ።
20 ኑሃማ ዛራደ፥ "ሀይቄዳዋንቶካ ፓጻ ደእያዋንቶካ ባረ ኬካተ አግቤና መና ጎዳይ አንጆ" ያጋዱ። ጉጃደካ ኑሃማ ኦ፥ "ሄ ብታኒ ኑ ማታ ዳቡዋቴ፤ ኡባ ኑባ ዎዛናዉ ጋያዋንቱፐካ እቱ አ" ያጋዱ።2:20 ዎጋ 25:25
21 ሞኣባታ ኡሩታ፥ "እ ኡባ ታና፥ ታ ካይ ጫከቲደ ዉራና ጋካናዉ፥ ታ ኦሳንቻቱዋፐ ሻከተናን ቃርምያ ማጻ ያጌዳ" ያጋዱ።
22 ኑሃማ ባረ ናኣ ማቻቶ ኡሩቶ፥ "ታ ናተ፥ ቱሙካ ቦኤዛ ጋድያን ኦያ ማጫ አሳቱዋና ቦፐ፥ ነዉ ሎአ። አያዉ ጎፐ፥ ሀራ አሳ ጋደ ቦፐ፥ ኔና አቱማ አሳይ ቦቻናዋ" ያጋዱ።
23 ሄዋ ድራዉ፥ ኡሩታ ቦኤዛ ማጫ ቆማቱዋኮ ሺቃደ፥ ባንጋነ ዛርጋ ጫካይ ዉራና ጋካናዉ፥ ቃርምያ ማጻደ ጋምኣዱ። ቃይ ባረ ቦሎታትና እትፐ ደኣዱ።