1 ታናዳን ጾሳ ካልያዋንቶ፥ ህንተ ኑ ቦንቾ ጎዳ የሱስ ክርስቶሳ አማን ደኢደ፥ ዴሙዋ ጼሊደ፥ አሳ ቦንቾፕተ። 2 አያዉ ጎፐ፥ ዎርቃ ምግዱዋ ዎደ፥ ሎኦ ማዩዋ ማዬዳ እት አሳይ ህንተ ሺቁዋ ዮፐ፥ ቃይ ጩርቃ ማዩዋ ማዬዳ ህዬሳ አስካ ዮፐ፥ 3 ሎኦ ማዩዋ ማዬዳ ብታንያ ህንተ አ ቦንቺደ አ፥ "ኔን ሀዋን ኡባፐ ሎእያ ኦይድያን ኡታ" ጊደ ቃይ ህዬሳ ብታንያ፥ "ኔን ህንና ኤቃሻ፤ ዎይ ሀዋን ታ ገድያ ማታን ሳኣን ኡታ" ጎፐ፥ 4 ያትና ህንተ ህንተ ግዶን ሻኮተ መያዋንታነ ኢታ ቆፋና ደእያ ዳናቱዋ ግድክቴዬ?

5 ታናዳን ጾሳ ካልያዋንቶ፥ ስስተ፤ ጾሳይ ሀ ሳኣን ደእያ ህዬሳ አሳይ አማኑዋን ዱረታናዉነ ባረና ሲቅያዋንቶ እማና ጌዳ ሳሉዋ ካዉተ ላታናዉ ዶርቤነዬ? 6 ሽን ህንተ ህዬሳቱዋ ቶቼድታ። ዱረቱ ህንተና ቱጋይያዋንታ ግድክኖዬ? ኡንቱንቱ ህንተና ዳናን ሞትያዋንታ ግድክኖዬ? 7 ህንተዉ እመቴዳ ሎኦ ሱን ቦርያዋንቱ ኡንቱንታ ግድክኖዬ?

8 ሽን ጾሳ ማጻፋን፥ "ነ ሾሩዋ ነ ሁጲያዳን ሲቃ" ጌተቲደ ጻፈቴዳ ካትያ ህግያ* ህንተ ፖሎፐ፥ ሎኦባ ኦታ።✝ 9 ሽን ህንተ አሳ ዴሙዋ ጼሊደ ቦንቾፐ፥ ናጋራ ኦታ፤ ቃይ ህጊ ህንተ ቦላ፥ ህግያ መንዳዋንቱዳን ፕርዳና። 10 አያዉ ጎፐ፥ ኦንነ ህግያ ኡባ ናጊደ፥ እትኖ መንያዋ ግዶፐ፥ ሄ ኡራይ ህግያ ኡባ መን። 11 አያዉ ጎፐ፥ "ዎሹሞፓ" ጌዳዌ ቃይ "ዎፓ" ጌዳ፤ ሽን ኔን ዎሹማና ዮፐካ፥ ዎዳዋ ግዶፐ፥ ህግያ መንዳ።✝ 12 አሳ አይለተፐ ከስያ ህግያን፥ ፕርዳ አካና አሳቱዋዳን ሃሳይተነ ኡንቱንቱዋዳን ኦተ። 13 አያዉ ጎፐ፥ አሳ ማርቤና ኡራ ጾሳይ ማረናን ፕርዳና፤ ማሮተይ ፕርዳ ጾኔ።

14 ታናዳን ጾሳ ካልያዋንቶ፥ እት ኡራይ ባረዉ አማኑ ደኤ ጎፐ፥ ቃይ አ አማኑዋ አ ኦሱ ኤርሳና ዮፐ፥ አ አይ ጎአኔ? አ አማኑ አ አሻናዉ ዳንዳዪ? 15 እት እሻይ፥ ዎይ እት ምቻታ ካሎቶፐ፥ ቃይ ኡንቱንቶ ኡባ ጋላስ ምያባይ ዮፐ፥ 16 ህንተፐ እት ኡራይ ኡንቱንታ፥ "ሳሮ ቢተ። ታማ ሆእተ። ካሊደ ሚተ" ጊደ፥ ኡንቱንቶ ኮሽያዋ እማና ዮፐ፥ ኡንቱንታ አይ ጎአኔ? 17 ሄዋ ድራዉ፥ አማኑ ኦሱ ባይናን ባረካ ደኦፐ ሀይቄዳዋ።

18 ሽን እት ኡራይ፥ "ነዉ አማኑ ደኤ፤ ቃይ ታዉ ኦሱ ደኤ። ኔን ነ አማኑዋ ነ ኦሱዋፐ ሻካደ ታና በሳ፤ ታንካ ታ አማኑዋ ታ ኦሱዋን ኔና በሳና" ጋና። 19 ኔን እት ጾሳይ ደእያዋ አማናሳ፤ ሄዌ ሎአ። ጻላሄቱካ ቃይ አማኒኖ፤ ያሻን ኮኮሪኖ። 20 ኔን ኤያይ! አማኑ ኦሱዋፐ ሻከቲደ ጎኤናዋ* ኤራናዉ ኮያይ? 21 ኑ አቡ አብራሃሞ ባረ ናኣ ይሳቃ ያርሽያ ሳኣ ቦላ ዎዳ ዎደ፥ ባረ ኦሱዋን ጽልቤኔ?✝ 22 አ አማኑነ አ ኦሱ እትፐ ኦዳዋነ አ አማኑ አ ኦሱዋን ፖለቴዳዋ በእኪ? 23 ጾሳ ማጻፋይ "አብራሃሞ ጾሳ አማኔዳ። ጾሳይካ ሄዋ አዉ ጽሎተን ፓይዴዳ" ጌዳዌ ፖለቴዳ፤ ቃይ ጾሳ ዳቦ ጌተቲደ እ ጼሰቴዳ።✝ 24 አሳይ አማኖ ጻላላና ግደናን፥ ኦሱዋን ጽልያዋ ህንተ በኢታ።

25 ሄዋዳንካ ቃይ ጫራታ ራኣባ ኪተቶዋንታ ሞካደ ሀራ ኦግያና ኡንቱንታ ሞይዜዳ ዎደ፥ ባረ ኦሱዋን ጽላበይኬ?✝

26 አያዉ ጎፐ፥ ሸምፑ ሻከቴዳ ቦላይ ሀይቄዳዋ ግድያዋዳን፥ ሄዋዳንካ ቃይ ኦሱ ሻከቴዳ አማኑ ሀይቄዳዋ።