እንጻርሳ ናግያዋ
1 ታናዳን ጾሳ ካልያዋንቶ፥ ኑን ሀራቱዋፐ አያ ፕርዳ አካናዋ ህንተ ኤርያ ድራዉ፥ ህንተፐ ጮራቱ ታማርስያዋንታ ግዶፕተ። 2 ኑን ኡባይካ ዳሮባን ባሌቶ፤ እት ኡራይ ባረ ሃሳያን ሙለካ ባላና ዮፐ፥ እ ባረና ናጋናዉ ዳንዳይያ ባል ባይና አሳ። 3 ፓራቱ ኑዉ አዛዘታና ማላ፥ ብጻላ ባርሲደ፥ ኑን ኮይያሳ ኡባ ኡንቱንታ አፌቶ። 4 በእተ፥ ማርካባቱካ ቃይ ሄዋ ኬና ዎልቃማ ግዲደ፥ ጎቱዋ ጫርኩዋን ላገቶፐካ፥ ኡንቱንታ ላግያዌ ባረዋ ኮይያሳ ዛሪደ ላግያ ቄር ጉ ምን ላገቲደ ቢኖ። 5 ሄዋዳን እንጻርሳይ ቦላ ግዶን ጉ አሳተ ግዶፐካ፥ ዳሮ ዎልቃማባን ጬቀቴ።
ጉ ታማይ ዋኒደ ዎልቃማ ዎራ ጉዲ! አኬክተ። 6 እንጻርሳይካ ታማ ማላ። እ ኑ አሳተ ግዶን ኢታባ ኡባ ኦና ዳንዳዬ፤ አሳተ ኡባ ቱንሴ። ቃይ ኑ ደኡዋ ዎካ ታማን ጉዴ፤ ጋናምያ ታማን እ ጉደታናዋ። 7 አያዉ ጎፐ፥ ዶአቱዋ፥ ካፋቱዋ ዛርያ፥ ትራን ጎሸትያ ሾሻቱ ዛርያነ አባን ደእያ መታቱዋ ዛርያ ኡባ አሳይ አድሴዳ፤ ቃይ ኡንቱንቱካ አዴድኖ። 8 ሽን ኦንነ እንጻርሳ አድሳናዉ ዳንዳይቤና፤ እንጻርሳይ ዎያ ማርዚ ኩሜዳ ጮኡ ጌና ኢታ መታ። 9 ኑን እንጻርሳን ኑ ጎዳነ አዉዋ ጋላቴቶ፤ ቃይ አንካ ጾሳ ማላቲደ መቴዳ አሳ ሸቄቶ።3:9 ዶመ 1:26 10 እት ዶናፐ ጋላታይነ ሸቃይ ከሴ። ታናዳን ጾሳ ካልያዋንቶ፥ ሄዌ ሄዋዳን ሀናናዉ በሰና። 11 ፑልቱ እት ኦላፐ ማልእያ ሃነ ጫምያ ሃ ፑልታናዉ ዳንዳዪ? 12 ታናዳን ጾሳ ካልያዋንቶ፥ ባላስያ ግያ ምይ ዎጋራ አይፋናዉ ዳንዳዪ? ዎይ ዎይንያ ቱራይ ባላስያ ግያ ም አይፋናዉ ዳንዳዪ? ማጽነ ማጽነ ግያ ሃፐካ ማልኦ ሃይ ከሳና ዳንዳየና።
ሳሉዋ አዳ ኤራነ ሳኣ አዳ ኤራ
13 ህንተ ግዶን አዳ ኤራንቻይነ አኬካንቻይ ኦኔ? ባረ ሎኦ ደኡዋን ኦሰቴዳ ባረ ኦሱዋ አዳ ኤራተፐ ይያ አሽከተን በሶ። 14 ሽን ህንተ ዎዛናን ጫምያ ቃናቲነ ይርጊ ደኦፖ። ቃይ ቱማተ ቦላካ ዎርዶቶፕተነ ኦቶረቶፕተ። 15 ሄዋ ማላ አዳ ኤራተይ ሳሉዋፐ ዎያዋ ግደና፤ ሽን ሄዌ ሳኣባ፥ አሳዋ፥ ጻላሀቱዋ። 16 አያዉ ጎፐ፥ ቃናቲነ ይርጊ ደእያ ሳን ዋላሳይነ ኢታ ኦሶ ኡባይ ደኤ። 17 ሽን ቦላፐ ይያ አዳ ኤራተይ ኡባፐ ካሰ ጌሻ። ቃይ ሳሮተ ዶስያዋ፥ አሽከነ ኤኖ ግያዋ፤ ቃይ ማሮተይነ ሎኦ አይፊ ኩሜዳዋ። ስነ ሎኦ ማላትያ ኢታተይ ባይናዋ። 18 ጽሎተ አይፊ ሳሮተ ኦያዋንቱ ሳሮተን ዘሬዳ ዘረፐ ቤቴዳ።