1 ኦላይነ ዋላሳይ ህንተ ግዱዋ ሀቃፐ ዪ? ኡንቱንቱ ዬዳሳይ ህንተ ቦላ ግዶን ኦለትያ ህንተ ናሸታናዉ ዎልቃማ አሙዋ አሞትያዋፐ ግደኔ? 2 ህንተ አሞቲታ፤ ሽን ደምክታ፤ ዎታ። ሎይ ኮዪታ፤ ሽን ደማናዉ ዳንዳይክታ፤ ዋላቀቲታነ ኦለቲታ። ሽን ጾሳ ዎሰና ድራዉ፥ ህንተ ኮይያዋ ደምክታ። 3 ጾሳ ዎሲታ፥ ሽን ደምክታ፤ ጋሱካ ባላ ኦግያን ዎሲታ። ሄዋ ህንተና ናሸችያዋን ፔሻናዉ ኮይያ ድራሳ። 4 ስም ዎሹምያዋንቶ፥ ሀ አላምያና ዳቦትያዌ ጾሳዉ ሞርከ ግድያዋ ኤርክቴ? አያዉ ጎፐ፥ ሀ አላምያና ዳቦታናዉ ኮይያዌ ኦንነ ጾሳና ሞርከቴ። 5 ዎይ ጾሳ ማጻፋይ፥ "ጾሳይ ኑናን ዎዳ አያናይ ዎልቃማ አሙዋ ኑዉ አሞቴ" ግያዋ ህንተንቶ ጮ ግያዋ ማላቲ? 6 ሽን ጾሳይ አ ኬካተ አደ እሜ። ሄዋ ድራዉ፥ ጾሳ ማጻፋይ፥ "ጾሳይ ኦቶረትያዋንታ እጼ፤ ሽን ባረና ካዉሽያዋንቶ አ ኬካተ እሜ" ያጌ።✝

7 ስም፥ ህንተ ጾሳዉ ሞደትተ። ያቲደ ጻላህያና ኤቀትተ፤ እ ህንተፐ ባቃታና። 8 ጾሳኮ ሺቅተ፤ እካ ህንተኮ ሺቃና። ህንተኖ ናጋራንቻቶ፥ ህንተ ኩሽያ ሜጨትተ። ላኡ ቆፋይ ደእያዋንቶ፥ ህንተ ዎዛና ጌሽተ። 9 ቱጋትተ፤ ካዮትተነ ዬክተ። ህንተ ሚቻ ዬኮ ላምተ፤ ህንተ ናሸቻካ ካዮ ላምተ። 10 ጎዳ ስንን ህንተ ሁጲያ ቶችተ፤ ቃይ እ ህንተና ቁ ቁ ኦና።

11 ታናዳን ጾሳ ካልያዋንቶ፥ እቱ እቱዋ ዝግሮፕተ። ባረ እሻ ዝግርያዌነ አ ቦላ ፕርድያዌ ህግያ ዝግሬነ ህግያ ቦላ ፕርዴ። ኔን ህግያ ቦላ ፕርዶፐ፥ ህግያ ቦላ ፕርድያዋ ግዳሳፐ አትን፥ ህገዉ አዛዘትያዋ ግዳካ። 12 ህግያ እምያዌነ ፕርድያዌ ጾሳ ጻላላ፤ እ አሻናዉነ ይሳናዉ ዳንዳዬ፤ ሽን ነ ሾሩዋ ቦላ ፕርድያዌ ኔን ኦኔ?

13 ህንተኖ፥ "ኑን ሀቼ ዎይ ዎንት ሄ ካታማ ባና፤ ሄዋን ላይ ኡታና፤ ዛልአናነ ቃይ ሚሻ ዎሳና" ግያዋንቶ፥ በእተ።✝ 14 ዎንት ህንተ ደኡ አያ ሀናነንቶነ ኤርክታ፤ ጉ ዎደዉ ህንተ ቤቲደ፥ ጉየፐ ይያ ፔኑዋ ማላ። 15 ሄዋ አጊደ፥ "ጎዳይ ጎፐ፥ ኑን ደአና፤ ሀዋ ዎይ ሄዋ ኦና" ጋናዉ በሴ። 16 ሽን ህንተ ሀእ ህንተንቱ ቃተን ጬቀቲታ፤ ሄዋ ማላ ጬቁ ኡባይ ኢታ።

17 ሄዋ ድራዉ፥ ሎኦባ ኦናዉ ኤሪደ ኦና ኡራዉ ሄዌ ናጋራ።