11 Hewaa diraw, nuuni S’oossaw yayyussay ayentto eriide, hewaadan k’ay asaakka ammantseetto; S’oossay nuuna ubbaanna eree; k’ay hinttekka hintte wozanaa k’ofaan nuuna eriita yaagaade k’oppay. 12 Beettiyaaban c’eek’ettiyaawanttuppe attin, wozanaan de’iyaawan c’eek’ettenna asatoo hintte odi zaariyaabay de’ana mala, hintte nuunan c’eek’ettanaadan, nuuni hinttenttoo gaasuwaa gidanaw koyyiyaawaappe attin, nuuna galatanaw koyyokko. 13 Nuuni gooyiyaawaa gidooppe, S’oossaa bonchchuwaassa; woy k’ay wozanaanna de’iyaawaa gidooppekka, hinttena go"anaassa. 14 Kiristtoosa siik’uu nuuna giddee; ayaw gooppe, itti Asay asaa ubbaw hayk’k’eeddawaa nuuni akeekeeddo; hewaa gidooppe Asay ubbay aanana hayk’k’eedda. 15 Pas’a de’iyaawanttu barenttu diraw hayk’k’eeddawoonne k’ay hayk’uwaappe denddeeddawoo de’anaappe attin, sintsappe barenttu huup’ew de’enna mala, I asaa ubbaa diraw hayk’k’eedda.

16 Hewaa diraw, nuuni hawaappe sintsaw oonanne asaa k’ofaan pirddokko; haray atto, nuuni Kiristtoosa kase asaa k’ofaan pirddeeddawaa gidooppekka, simmi sintsappe hewaadan pirddokko. 17 Hewaa diraw, ooninne Kiristtoosanna de’ooppe, ooratsa med’etaa; c’imay aad’d’eedda; be’ite, ubbabaykka ooras’s’eedda. 18 Kiristtoosa baggana nuuna barenanna sigetseedda S’oossay ubbabaakka ootseedda; k’ay I nuw haratuwaa barenanna sigetsiyaa oosuwaa immeedda. 19 S’oossay Kiristtoosa baggana asaa ubbaa barenanna sigetsee; asaa nagaraakka asaa bolla paydenna; k’ay asaa barenanna sigetsiyaa kiitaakka nuw immeedda.

20 Simmi S’oossay nu baggana hinttenttoo haasayiyaawaadan, nuunikka Kiristtoosa diraw haasayiyaa I kiitteeddawantta; k’ay nuuni hinttena, «S’oossaanna sigettite» giide, Kiristtoosa diraw woosseetto. 21 Nuuni S’oossaa s’illotetsaa Kiristtoosa baggana akkana mala, nagaraa erenna Kiristtoosa nu diraw, S’oossay nagaranchcha ootseedda.