Apocalipse 15

Taani Burc’c’ukkuwaa Abbaa Bee’aad

1 Taani saluwaan hara wolk’k’aamanne maalalissiyaa mallaa be’aaddi. S’oossaa hank’k’uu unttunttu bollan polettiyaa diraw, wurssetsa laappu boshaanna de’iyaa laappu kiitanchchatuu de’iino.

2 K’aykka taani burc’c’ukkuwaa abbaa malatiyaawaa tamaanna walaketteeddawaa be’aaddi. K’ay do’aa, Aa misiliyaanne Aa suntsaa payduwaa s’ooneeddaawantta be’aaddi. S’oossay unttunttoo immeedda diitsatuwaa oyk’k’iide, burc’c’ukkuwaa malatiyaa abbaa matan unttunttu ek’k’eeddino. 3 Unttunttu, S’oossaa oosanchchaa Muse mazimuriyaanne Dorssaa mazimuriyaa hawaadan yes’s’eeddino.

«Godaw, Ubbaappe Wolk’k’aama S’oossaw,

ne kiitay gitanne maalalissiyaawaa.

Asaa zariyaa ubbaa Kaatew,

ne ogii s’illuwaanne tumuwaa.✝15:3 Kes. 15:1

4 Godaw, new yayyenawenne

ne suntsaa bonchchennawe oonee?

Ayaw gooppe, geeshshay ne s’alalaa.

Asaa zariyaa ubbay yiide,

ne sintsan goyinnana;

ayaw gooppe, ne s’illo kiitay

ubbaw k’onc’c’eedda»

yaagiide yes’s’iino.✝15:4 Erm. 10:7; Maz. 86:9

Laappu Boshaanna De’iyaa Laappu Kiitanchchatuwaa

5 Hewaappe guyyiyaan, taani saluwaan de’iyaa Geeshsha Gollii dooyettowaa hewekka markkatetsaa dunkkaaniyaa be’aaddi.✝15:5 Kes. 38:21 6 Laappu boshaanna de’iyaa laappu kiitanchchatuu Geeshsha Golliyaappe keseeddino. Unttunttu p’ooliide boos’s’iyaa laynuwaa mayuwaa mayyeeddino; barenttu tiraa work’k’aa danc’c’uwaan yuushshi aatsiide k’achcheeddino. 7 De’uwaan de’iyaa oyddu med’etatuwaappe ittuu, med’i med’inaw gakkanaw de’iyaa S’oossaa hank’k’uu kumeedda laappu work’k’aa keretuwaa laappu kiitanchchatoo immeedda. 8 S’oossaa bonchchuwaappenne Aa wolk’k’aappe yeedda c’uway Geeshsha Golliyaa kumeedda. Laappu kiitanchchatuu aheedda laappu boshatuu polettana gakkanaw, Geeshsha Golliyaa ooninne gelanaw danddayibeenna.✝15:8 Kes. 40:34; 1 Kat. 8:10-11; 2 Od. 5:13-14; Isa. 6:4