1 Hewaappe guyyiyaan, laappu kiitanchchatoo, «Biide S’oossaa hank’k’uwaa laappu keriyaappe sa’aan gussite» yaagiide, Geeshsha Golliyaappe haasayiyaa wolk’k’aama kooshshaa taani sisaad.

2 Koyro kiitanchchay biide, bare keriyaan de’iyaawaa sa’aan gussina, do’aa mallay de’iyaawanttu bollanne he do’aa misilew goyinniyaawanttu bolla loytsi sakkiyaa maytsaa keseedda.✝

3 Laa’entso kiitanchchay bare keriyaan de’iyaawaa abbaan gussina abbaa haatsay hayk’k’eedda asaa suutsaa malateedda. K’ay abbaan de’iyaa med’etaa ubbaykka hayk’k’i aggeedda.

4 Heezzentso kiitanchchay bare keriyaan de’iyaawaa shaafatuuwaaninne pulttatuwaan gussina unttunttu suutsaa gideeddino.✝ 5 Haatsaw aawotiyaa kiitanchchay hawaadan yaagiyaawaa, taani sisaad;

«Kasekka ha"ikka de’iyaa Godaw,

Geeshshaw, ha pirddaa pirddeedda diraw,

neeni s’illuwaa.

6 Unttunttu geeshshatuwaa suutsaanne,

nabatuwaa suutsaa gusseedda diraw,

neeni unttuntta ushshanaw,

suutsaa unttunttoo immaadda.

Unttunttu barenttoo,

bessiyaawaa akkeeddino»

yaageedda.

7 Yarshshuwaa yarshshiyaa saappe,

«Godaw, Ubbaappe Wolk’k’aama S’oossaw,

ne pirdday tumuwaanne s’illuwaa!»

yaagiyaa kooshshaa taani sisaad.

8 Oyddentso kiitanchchay bare keriyaan de’iyaawaa awayfiyaa bollan gussina bare tamaa seelaan asaa guuddanaw, awayfew maatay imetteedda. 9 Asay wolk’k’aama seelaan guudettiide ha boshatuwaa bollan maatay de’iyaa S’oossaa suntsaa boreedda. Shin bare nagaraappe simmibeennanne S’oossaa gitatetsaakka bonchchibeenna.

10 Ichcheshentso kiitanchchay bare keriyaan de’iyaawaa do’aa kawutetsaa oydiyaa bolla gussina, he do’aa kawutetsay d’umeedda. Asay bare seelaa diraw, bare ins’s’arssaa sa"eedda.✝ 11 K’ay Asay bare seelaa dirawunne bare maytsaa diraw saluwaa S’oossaa shek’k’eedda. Shin bare ootseedda nagaraappe simmibeenna.

12 Usuppuntsa kiitanchchay bare keriyaan de’iyaawaa wogga Efiraas’iisa geetettiyaa shaafaan gussina away doliyaa baggappe yaana kaatatoo ogii giiganaadan, haatsay meleedda.✝ 13 Hewaappe guyyiyaan, taani sheed’d’iyaa malatiyaa heezzu tuna ayyaanatuu dawiyaa doonaappe, du’aa doonaappenne wordduwaa timbbitiyaa odiyaawaa doonaappe kesishshin be’aaddi. 14 Unttunttu mallatuwaa ootsiyaa s’alahatuwaa ayyaanatuwaa. He heezzu iita ayyaanatuu Ubbaappe Wolk’k’aama S’oossaa wolk’k’aama gallassan, sa’aa kaatatuwaa ubbaa olaw shiishshanaw baana.

15 «Be’a, taani kayisuwaadan yaana. Asaa sintsan kallo hamettiidde yeellatenna mala, gem"ishennaan bare mayuwaa mayyiide naagiyaa uray anjjetteeddawaa!» yaageedda.

16 He iita ayyaanatuu kaatetuwaa Ibraayiss’s’e k’aalaan Arimaagedoona* geetettiyaa sa’aa shiishsheeddino.✝

17 Laappuntsa kiitanchchay bare keriyaan de’iyaawaa c’arkkuwaan gussina, Geeshsha Golliyaan de’iyaa araataappe, «Poletteedda» yaagiyaa wolk’k’aama kooshshay yeedda. 18 Hewaappe guyyiyaan, walk’k’antsay wolk’k’aameedda; guntsay sisetteedda; guuguntsaykka guummeedda. K’ay biittay pala k’aatsaa k’aas’s’eedda. Asay sa’aan med’ettoodeppekka biittay hewaa mala k’aatsaa k’aas’s’i erenna; hewe ubbaappe aad’d’eedda k’aatsaa. 19 Wolk’k’aama katamay heezzu kesiide za"eedda. Biittaa ubbaan de’iyaa katamatuu d’ayeeddino. S’oossay wolk’k’aama Baabloono k’oppiide, bare iita hank’k’uwaa woyniyaa eessay kumeedda burc’c’ukkuwaappe woyniyaa eessaa Baabloono ushsheedda.✝ 20 Abbaan dooddetteedda biittay ubbay d’ayeedda; deriikka beettibeenna. 21 Asaa bolla oytamu kiilo keenaa dees’iyaa wolk’k’aama shachchay saluwaappe wod’d’eedda. Asay he shachchaa boshaa diraw, S’oossaa boreedda; ayaw gooppe, boshay daro wolk’k’aama.✝