1 C’iimmo ollaa k’ulppiyaanne wolk’k’aama santsalataa bare kushiyan oyk’k’eedda itti kiitanchchay saluwaappe yiyaawaa taani be’aaddi. 2 Kiitanchchay dawiyaa, he beni shooshshaa, s’alahiyaa kaappuwaa woy Sees’aanaa giyaawaa oyk’k’eedda; yaatiide sha"a laytsaw k’achcheedda.✝ 3 Kiitanchchay c’iimmo ollaan Aa yeggiide, sha"a laytsay wuranaw, asaa zeretsaa laa’entsuwaa balettena mala, he c’iimmo ollaa k’ulppi gorddiide attameedda. Hewaappe guyyiyaan, dawii amareeda wodiyaa bilettanaw bessee.

4 Hewaappe guyyiyaan, taani araatatuwaanne unttunttun utteeddawantta be’aaddi; unttunttoo pirddiyaa maatay imetteedda. Yesuusi k’onc’c’isseedda tumuwaanne S’oossaa k’aalaa awaayeedda diraw, barenttu k’ood’iyaa k’ans’s’etteedda asaa shemppuwaakka taani be’aaddi. Unttunttu do’aw woy do’aa misilew goyinnibeykkino. Unttunttu do’aa mallaa barenttu deemuwaan woy barenttu kushiyan wotsibeeykkino. Unttunttu hayk’uwaappe denddiide, Kiristtoosanna ittippe kaatetuwaadan sha"a laytsaw mooddeeddino.✝ 5 Hayk’k’eeddawanttuppe c’oratuu sha"a laytsay wurana gakkanaw, hayk’uwaappe denddibeykkino. Hewe koyro dendduwaa. 6 Koyro dendduwaan denddeeddawanttu anjjetteeddawanttanne S’oossaa asatuwaa. Unttunttu bolla laa’entso hayk’oo wolk’k’ay baawa. Unttunttu S’oossawunne Kiristtoosaw k’eesatuwaa gidana; unttunttu aanana ittippe sha"a laytsaw mooddana.

7 Sha"a laytsay wureeddawaappe guyyiyaan, Sees’aanay k’ashuwaappe bilettana. 8 I Sa’aan ubba saan de’iyaa asaa zeretsaa baletsanaw kessana; hewe Googanne Maagooga geetettiyaawaa. Sees’aanay abbaa shafiyaa keena zeretsaa olaw shiishshana.✝ 9 He zaratuu biittaa ubbaa mayyiide geeshshatuwaa heeraanne S’oossay siik’iyaa katamato yuuyyi aad’d’i ek’k’eeddino. Shin tamay saluwaappe wod’d’iide, unttuntta meedda.

10 Do’aynne worddo nabii yegetteedda ees’s’iyaa diiniyaa tamaa abbaan s’alahiyaa kaappuu, asaa zeretsaa baletseeddawe, yegetteedda. Unttunttu k’ammanne gallassi med’i med’inaw pas’a kaa’ettana.

11 Hewaappe guyyiyaan, taani wolk’k’aama bootsa araataanne he araataan utteeddawaa be’aaddi. Sa’aynne saluu Aa sintsappe bak’ateeddino; laa’entso beettibeykkino.✝ 12 Hayk’k’eeddawanttu, d’ok’k’u giyaawanttunne guutsatuu araataa sintsan ek’k’eeddawantta taani be’aaddi. Mas’aafatuu dooyetteeddino; hara mas’aafay, de’uwaa mas’aafaykka dooyetteedda. Hayk’k’eeddawanttu barenttu oosuwaadan, mas’aafatuwan s’aafetti utteeddawaadankka pirddetteeddino. 13 Abbay bare giddon de’iyaa hayk’k’eeddawantta immeedda; hayk’uunne Si’oolii barenttu giddon de’iyaa hayk’k’eeddawantta immeeddino. Ubbaykka barenttu oosuwaadan pirddetteeddino. 14 Hewaappe guyyiyaan, hayuunne Si’oolii tamaa abbaan yegetteeddino. He tamaa abbay laa’entso hayk’uwaa. 15 De’uwaa mas’aafan bare suntsay s’aafettibeenna Asay ooninne tamaa abban yegetteedda.