1 Hewaappe guyyiyaan, kiitanchchay taana S’oossaa kawutetsaa oydiyaappenne Dorssaa kawutetsaa oydiyaappe goggiyaa birilliiyaadan p’ooliyaa de’uwaa haatsaa shaafaa besseedda.22:1 Hiz. 47:1; Zak. 14:8 2 He shaafay katamaa ogiyaa gidduwaanna duge goggee. Shaafaappe hefintsa baggannanne hafintsa baggana agenaan itti gedenne laytsan tammanne laa"u gede ayfiyaa de’uwaa mitsay de’ee. He mitsaa bonchchuu de’iyaawe, zariyaa ubbaa harggiyaappe patsanaassa.22:2 Dom. 2:9; Hiz. 47:12
3 He katamaan S’oossaa shek’ay ayinne baawa. S’oossaa kawutetsaa oydiinne Dorssaa kawutetsaa oydii he katamaan de’ana. S’oossaa oosanchchatuu S’oossaw goyinnana.22:3 Zak. 14:11 4 Unttunttu Aa deemuwaa be’ana; Aa suntsay unttunttu deemuwaan s’aafettana. 5 Hewaappe sintsaw hara k’ammay baawa. Unttunttoo s’omppiyaa woy aawaa poo’uwaa koshshenna; ayaw gooppe, Goday S’oossay unttunttoo s’omppiyaa gidanawaa. Unttunttu med’i med’inaw kaatetana.22:5 Isa. 60:19; Dan. 7:18