17 Hewaappe guyyiyaan, Daaneeli bare golle simmiide, bare heezzu laggetoo, Hanaaniyaw, Mishaa’eelawunne Azaariyaw hanotaa odeedda. 18 Unttunttu Baabloonen de’iyaa yenkko kaatiyaa zoriyaawanttunna ittippe hayk’k’ennaadan, saluwaa S’oossay maarotaa unttunttoo ootsiide, ha s’uuraa unttunttoo k’onc’c’issanaw woosana mala, unttunttoo odeedda.
20 «Aad’d’eeda eratetsaynne wolk’k’ay,
S’oossaassa gidiyaa diraw,
Aa suntsay med’inaappe med’inaa gakkanaw
galatetteeddawaa gido.
21 Wodetuwaanne aginatuwaa I laammee.
Kaatetuwaa kawutetsaappe diggee;
k’ay kaatetuwaa kawutetsan utissee.
Aad’d’eeda eranchchatoo aad’d’eeda eraa,
akeekiyaawanttookka eraa I immee.
22 C’iimma s’uuraanne geemmeedda yewuwaa,
I k’onc’c’issee.
D’uman de’iyaawaakka I eree;
poo’uukka aanana de’ee.
23 Abeet ta mayzza aawotuwaa S’oossaw,
taani neena galataynne sabbay.
Ayaw gooppe, neeni taw,
aad’d’eeda eraanne wolk’k’aa immaadda.
Nuuni neena oochcheeddawaa,
taana ha"i erissaadda.
Kaatiyaa akumuwaa nuuna erissaadda»
yaageedda.