Daniel 3

Sidiraak’a, Misaak’a, Abddinaaguwaa S’oossay Ees’iyaa Tamaappe Asheedda

1 Kaatii Naabukadanas’oori geesay usuppun tammu wad’aa, gomppay usuppun wad’aa gidiyaa misiliyaa work’k’aappe med’d’iide, Baabloone gadiyaan Duura Dembban esseedda. 2 He misiliyaa anjjissanaw yaanaadan, kaatiyaappe garssana gadiyaa mooddiyaawantta, suntsatuwaa, awuraajjaa mooddiyaawantta, kaatiyaa zoriyaawantta, miishshaa golliyaan ootsiyaawantta, pirddaa daannatuwaa, higge eranchchatuwaanne awuraajjaan awuraajjaan de’iyaa hara kaappotuwaa s’eegeedda. 3 Yaatina, kaatiyaappe garssana gadiyaa mooddiyaawanttu, suntsatuu, awuraajjaa mooddiyaawanttu, kaatiyaa zoriyaawanttu, miishshaa golliyaan ootsiyaawanttu, pirddaa daannatuu, higge eranchchatuunne awuraajjaan awuraajjaan de’iyaa hara kaappatuu ittippe he misiliyaa anjjissanaw shiik’iide, Kaatii Naabukadanas’oori esseedda misiliyaa sintsan ek’k’eeddino.

4 He wode awaayuwaa awaayiyaawe bare k’aalaa d’ok’k’u ootsiide, hawaadan yaageedda; «Hinttenoo, asaw, kawutetsatto, dumma dumma k’aalan haasayiyaa zaretoo, 5 ubbaykka malakataa, suusuliyaa, zayyiyaa, maasink’k’uwaa, diitsaanne c’ora bak’etteedda kiriyaan waas’etteedda diitsaanne hara muuziik’aa miishshatuwaa ittippe kaa’iyaa wode siso saannakka, Kaatii Naabukadanas’oore esseedda work’k’aa misiliyaw guufanniide goyinnite. 6 Misiliyaa sintsan guufanniide goynnena ooninne he saatiyaan ees’s’iyaa itooniyaa tamaa giddo olettana» yaageedda.

7 Asay ubbay, kawutetsatuu ubbaynne dumma dumma k’aalan haasayiyaa zaratuu ubbay malakataa, suusuliyaa zayyiyaa, maasink’k’uwaa, diitsaanne c’ora bak’etteedda kiriyaan waas’etteedda diitsaa ittippe kaa’iyaa wode siso saannakka, sa’aan guufanniide, Kaatii Naabukadanas’oori esseedda work’k’aa misiliyaw goyinneeddino.

Misiliyaw Goyinnennan Is’s’ina Heezzu Ayihudatuwaa Mooteeddino

8 Hewaa diraw, he wode itti itti Baabloone asatuu sintsaw aad’d’iide, Ayihudatuwaa mooteeddino. 9 Unttunttu Kaatiyaa Naabukadanas’oora hawaadan yaageeddino; «Kaatiyaw, med’inaw de’a. 10 Kaatiyaw, neeni malakataa, suusuliyaa, zayyiyaa, maasink’k’uwaa, diitsaanne c’ora bak’etteedda kiriyaan waas’etteedda diitsaa ittippe kaa’iyaa wode, sisiyaa ooninne sa’aan guufanniide, work’k’aa misiliyaw goyinnanaadan, 11 k’ay sa’aan guufanniide goynnena Asay de’ooppe, ees’s’iyaa itoone tamaa giddo olettanaadan awaayuwaa kessaadda. 12 Shin kaatiyaw, neeni Baabloone biittaa bolla suntseedda Ayihudatuu, Sidiraak’i, Misaak’inne Abddanaaguu ne azazuwaa is’s’eeddino; ne s’oossatoo ootsikkino; k’ay ne esseedda work’k’aa misiliyaawukka goyinnikkino» yaageeddino.

13 Naabukadanas’oori hewaa siseedda wode, hank’k’uwaa ees’s’i kesiide, Sidiraak’a, Misaak’anne Abddanaaga ahanaadan azazeedda. Unttuntta kaatiyaa sintsa aheeddino. 14 Naabukadanas’oori unttuntta hawaadan yaageedda; «Sidiraak’aa, Misaak’aa, Abddanaagoo, ha hintte ta s’oossatoo ootsennawenne ta esseedda work’k’aa misiliyaw goyinnennawe tumee? 15 Ha"i malakataa, suusuliyaa, zayyiyaa maasink’k’uwaa, diitsaanne c’ora bak’etteedda kiriyaan waas’etteedda diitsaanne hara muuziik’aa miishshatuwaa kaa’iyaawaa siso wode, taani esseedda misiliyaw guufanniide goyinooppe, daro lo"a. Shin hintte goyinnennan is’s’ooppe, ellekka ees’s’iyaa itooniyaa tamaa giddon olettana. Ay s’oossatuu hinttena ta kushiyaappe ashshanawe?» yaageedda.

16 Shidiraak’i, Mishaak’inne Abddanaaguu kaatiyaw zaariide, «Kaatiyaw, Naabukadanas’ooraa, ha yewuwaa nuuni new zaaruwaa immanaw bessena. 17 Kaatiyaw, nuuni ees’s’iyaa itoone tamaa giddo olettinttokka, nuuni aw ootsiyaa S’oossay he tamaappe ashshanaw danddayee. K’ay kaatiyaw, I nuuna ne kushiyaappekka ashshana. 18 Shin kaatiyaw, ubbaa I nuuna ashshenan is’s’inttokka, nuuni ne s’oossatoo ootsennawaanne neeni esseedda work’k’aa misiliyaw goyinnennawaa era» yaageeddino.

Heezzu Ayihudatuwaa Hayk’k’oo Pirddeeddino

19 He wode Naabukadanas’oori Shidiraak’a, Mishaak’anne Abddanaago bolla hank’k’uwaa suulleedda; Aa som"ii unttunttoo kasewaappe dummateedda. Tamay kase ees’s’iyaawaappe laappun kushiyaa aad’d’iide ees’s’anaadan azazeedda. 20 Shidiraak’a, Mishaak’anne Abddanaaga k’achchiide, ees’s’iyaa itooniyaa tamaa giddo olanaadan, bare olanchchatuwaa giddoppe mino asatuwaa azazeedda. 21 Yaatina, ha asatuwaa, unttunttu mayuwaanna, suriyaanna, huup’iyaan s’aas’eedda s’aatsaananne hara mayuwaa ubbaanna gatsi k’achchiide, ees’s’iyaa itooniyaa tamaa giddo oleeddino. 22 Kaatiyaa azazuu loytsi elleellisiyaawaa gideedda dirawunne itooniyaa tamaykka kasewaappe aad’d’i ees’s’iyaa diraw, Sidiraak’a, Misaak’anne, Abddanaaga taman oleedda he mino asatuwaa tamaa lac’uu labiide wod’eedda. 23 Ha heezzu k’ashetteedda asatuu, Shidiraak’i, Mishaak’inne Abddanaaguu, ees’s’iyaa itoone tamaa giddo wod’d’eeddino.

24 Hewaappe guyyiyaan, Kaatii Naabukadanas’oori barena maalalissina ellekka denddi ek’k’iide, «Nuuni k’achchiide ees’s’iyaa itooniyaa tamaa giddo oleedda asatuu heezza gidikkinooyye?» yaagiide barena zoriyaawantta oochcheedda.

Unttunttu, «Kaatiyaw, ee heezza» yaagiide zaareeddino.

25 Kaatii zaariide, «Be’ite, taani k’ashuwaappekka biletteedda, tamaa giddon yaa, haa hametiyaa, tamaykka ayinne bochchenna oyddu asatuwaa be’ay! Oyddentsuu k’ay s’oossatuwaa na’aa malatee» yaageedda.

Heezzu Ayihudatuu Tamaappe Keseeddino

26 Yaatina, Naabukadanas’oori ees’s’iyaa itoone tamaa mata shiik’iide, bare k’aalaa d’ok’k’u ootsiide, «Ubbaappe d’ok’k’iyaa S’oossaa k’oomatoo, Shidiraak’aa, Mishaak’aa, Abddanaagoo, kesite! haayite!» yaagiide s’eegeedda. Yaatina, Shidiraak’i, Mishaak’inne Abddanaaguu tamaa giddoppe keseeddino. 27 Kaatiyaappe garssana biittaa mooddiyaawanttu, suntsatuu, awuraajjaa mooddiyaawanttu, kaatiyaw ootsiyaa hara kaappatuu ubbay unttunttukko shiik’eeddino. Tamay unttunttu bollaa bochchibeennawaa, unttunttu huup’iyaa binnaanaappe ittuukka malaatettibeennawaa, unttunttu mayuukka boshetibeennawaanne tamaa peenuukka unttunttun bayinnawaa be’eeddino.

28 Hewaappe guyyiyaan, Naabukadanas’oori hawaadan yaageedda; «Sidiraak’a, Misaak’anne Abddanaago S’oossay galatetto! I bare kiitanchchaa kiittiide, barenan ammanetteeda bare k’oomatuwaa ashsheeda. Unttunttu kaatiyaa azazuwaa is’s’eeddino; barenttu S’oossaappe attina, hara s’oossaw ootsanaappenne goyinnanaappe hayk’k’anawaa doseeddino. 29 Hewaa diraw, Shidiraak’a, Mishaak’anne Abddanaago S’oossaa toochchiide haasayiyaa ay asikka, woy ay kawutetsaykka, woy dumma dumma k’aalan haasayiyaa ay zariikka k’ans’s’ettananne mus’ettana mala, unttunttu golliikka laalettiide, pituu oletiyaa sa’aa gidana mala, taani awaayaad. Ayaw gooppe, hara ay s’oossinne hawaadan ootsiide, asaa ashshenna» yaageedda.

30 Hewaappe guyyiyaan, kaatii Shidiraak’a, Mishaak’anne Abddanaaga Baabloone gadiyaan d’ok’k’u d’ok’k’u ootsiide suntseedda.