Doometsaa 45

Yooseefo Barena Bare Ishatoo Erisseedda

1 He wode Yooseefo he asaa ubbaa sintsaan genc’c’ana danddayibeenna; «Asaa ubbaa ta sintsaappe kessite» yaagiide waasseedda. Hewaa diraw Yooseefo barena bare ishatoo erisseedda wode, aanana ooninne baawa.✝45:1 Kit. 7:13 2 I bare k’aalaa d’ok’k’isiide, Gibs’etuu Aa sisana gakkanaw loytsi yeekkeedda. Kaatiyaa soo Asay he woriyaa siseedda.

3 Yooseefo bare ishatoo, «Taani Yooseefattee! Ta aawuu hanno gakkanaw pas’a de’iiyye?» yaagiide oochcheedda. Shin Aa ishatuu loytsi dagammeedda diraw, aw zaarana danddayibeykkino.