Gênesis 6

Asaa Iitatetsaa

1 Aasi sa’aa bollan dareedda wode, unttunttoo mac’c’a naanay yeletteeddino;✝6:1-4 Yob. 1:6; 2:1 2 «Saluwaa Med’etatuwaa»*6:2 Saluwaa Med’etatuwaa: S’oossaa naanatuwaa; s’oossatuwaa naanatuwaa. geetettiyaawanttu ha asaa mac’c’a naanay malaa lo"a gidiyaawaa be’eeddino; yaatiide unttunttuppe barenttoo dooreeddawantta akkeeddino. 3 Med’inaa Goday, «Ta Ayyaanay asan med’inaw de’enna; ayaw gooppe, Asay hayk’k’iyaawaa; Aa laytsatuukka itti s’eetanne laatama gidana» yaageedda. 4 He wodenne hewaappe guyye Saluwaa med’etatuu asaa mac’c’a naanaa akkina, naanay yeletteedda wode, wogga adussa asatuu sa’aa bollan de’eeddino. Unttunttune beni wode olaw minanne eretteedda asaa.

5 Med’inaa Goday he wode sa’aa bollan de’iyaa asaa iitatetsay dareeddawaanne unttunttu wozanay k’oppiyaabay ubbay ubbaa wodekka iita s’alala gideeddawaa be’eedda;✝6:5-8 Mat. 24:37; Luk'. 17:26; 1 P’es'. 3:20 6 Med’inaa Goday asaa ha sa’aa bollan med’d’eeddawoo kayyotteedda; bare wozanaan loytsi seeletteedda. 7 Hewaa diraw Med’inaa Goday, «Taani med’d’eedda asaa ha sa’aa bollappe mule d’ayssana; asaa, mehiyaa, do’aa, biittaana gooshettiyaa med’etatuwaanne saluwaa kafotuwaa d’ayssana; ayaw gooppe, taani unttuntta med’d’eeddawoo kayyottaad» yaageedda. 8 Shin Nohe Med’inaa Godaa sintsan nashetteedda.

Noha

9 Nohe haneeddabay hawaappe kaalliide s’aafetteedda. Nohe s’illo asaa; I bare wodiyaan de’eedda asaa giddon suure asaa; Nohe S’oossanna hametteedda.