1 Koyro c’aak’k’oo S’oossaw goyinniyaa wogaynne Asay ootseedda Geeshsha Gollii de’ee. 2 Ayaw gooppe, koyro Dunkkaanii ek’k’eedda; Aa gidduwaan muk’aaddaa wotsiyaawe, s’arap’p’eezaynne Godaa sintsan wotsiyaa ukitsay de’ee; he sa’ay Geeshsha sa’aa giide s’eeseettee.✝ 3 Laa’entso gaaridduwaa guyye baggana Ubbaappe Aad’d’iyaa Geeshsha Sa’aa geetettiyaa Dunkkaanii de’ee.✝ 4 Aa gidduwaan is’aanaa c’uwayanaw work’k’aappe ootseedda saas’iniinne ubba saanna work’k’aan sheeshsheedda K’aalaa c’aak’uwaa Taabootay de’ee. He K’aalaa c’aak’uwaa Taabootan mannay de’iyaa work’k’aa s’aaruu, Aaroona s’am"ay aac’eeddawenne k’ay Muse higgii s’aafetteedda laa"u masetteedda shuchchatuu de’iino.✝ 5 He k’aalaa c’aak’uwaa Taabootaappe bolla baggana atto giyaa sa’aa k’um"iyaa barenttu k’efiyaan gentsiyaa bonchcho kiruubetuu de’iino; shin ha ubbabaa ha"i wurssi odanaw danddayokko.✝

6 Hewe hewaadan giigi de’ishshin, k’eesatuu ubbaa wode, barenttu oosuwaa ootsanaw koyro Dunkkaaniyaa geliino.✝ 7 Shin k’eesatuwaa ubbatuwaa kaappuwaa s’alalay laa’entso Dunkkaaniyaa laytsaappe itti gede geliidde bare dirawunne erennaan Asay ootseedda nagaraa diraw, S’oossaw yarshshiyaa suutsaa akkiide gelee.✝ 8 Koyro Dunkkaanii ek’k’ide’ishshin, ubbaappe aad’d’iyaa geeshsha sa’aa afiyaa ogii biro dooyettibeennawaa Geeshsha Ayyaanay hewan erissee.

9 He Dunkkaanii ha wodew leemisuwaa; hewaa giyaawe S’oossaw immiyaa imuunne yarshshuu goyinniyaawaa suure wozanaa balay baynnawaa ootsanaw danddaykkino. 10 Hewanttu muussaabaa, ushshaabaanne dumma dumma meechchaabaa odiyaa kare bagga wogatuwaa; unttunttu ooras’s’iyaa wodii gakkanaw oosettiyaa wogatuwaa.

11 Shin Kiristtoosi hawaan de’iyaa lo"obaw k’eesatuwaa ubbatuwaa kaappuwaa gidiide yi diggeedda. I geliide ootsiyaa Dunkkaanii ubbaappe aad’d’iyaawaanne balay baynnawaa; k’ay he Dunkkaaniyaa Asay ootsibeenna; ha med’etteedda sa’aabaakka gidenna. 12 Kiristtoosi Ubbaappe Aad’d’iyaa Geeshsha sa’aa geliyaa wode, deeshshaa suutsaanne galo maraa suutsaa oyk’k’iide gelibeenna; shin bare suutsaa oyk’k’iide, nuw med’inaa atotetsaa immiide, laa’etsennaan itti gede geleedda. 13 Tuneedda asaa bolla korumaa suutsaanne deeshshaa suutsaa c’ac’c’afiide, guudetteedda ussatti bidintsaa k’olina, he uraa tunatetsaappe geeshshanaw danddayooppe,✝ 14 Med’inaa Geeshsha Ayaanaa baggana balay baynna yarshshuwaadan, S’oossaw barena immeedda Kiristtoosa suutsay, nuuni de’uwaa S’oossaw ootsana mala, kase nu hayk’k’eedda oosuwaappe nu suure wozanaa wooti geeshshanddeeshsha!

15 Hewaa diraw, S’oossay s’eeseeddawanttu I immana geedda med’inaa anjjuwaa laattana mala, Kiristtoosi ooratsa c’aak’k’oo gaannateedda; hewe hanana danddayiyaawe, Asay koyro c’aak’uwaappe garssan de’iidde ootseedda balaa ayiletetsaappe kessiyaa hayk’uu de’iyaa diraassa.

16 Ayaw gooppe, hayk’k’iyaa uray woyteeddawe de’ooppe, he uray hayk’k’owe erettanaw koshshee. 17 Ayaw gooppe, woyteedda uray hayk’k’eedda wode, I woyteeddawe poletteedda; he woyteeddawe pas’a de’ishshin, ayinne polettenna.

18 Haray atto, koyro c’aak’uukka suutsay baynnaan injjetibeennawe hawaassa. 19,20 Ayaw gooppe, higgiyan de’iyaa azazuwaa ubbaa Muse asaa ubbaw odeedda; hewaappe guyyiyaan, galo maraa suutsaanne deeshshaa suutsaa, haatsaanna, zo’o dorssaa isikiyaannanne hisoop’p’iyaa giyaa mitsaa bonc’c’iyaanna ittippe akkiide, «Hawe hinttentta S’oossay azazeedda c’aak’uwaa suutsaa» yaagiide, higgiyaa mas’aafaa bollanne asaa ubbaa bolla c’ac’c’afeedda.✝ 21 Hewaadankka, Dunkkaaniyaa bollanne ootsiyaa miishshaa ubbaa bolla suutsaa Muse c’ac’c’afeedda.✝ 22 Higgii giyaawaadan, tumukka amareedawaappe attin, ubbabaykka suutsan geeyyee; suutsay gukkana d’ayooppe, atotetsay baawa.

23 Hewaa diraw, saluwaan de’iyaawantta malatiyaawanttu he yarshshuwaan geeyyanaw koshshee; shin saluwaan de’iyaawanttukka barenttu huup’ew geeyyanaw aad’d’iyaa yarshshuwaa unttuntta koshshee.

24 Ayaw gooppe, Kiristtoosi tumu geeshsha san leemisettiyaa Asay ootseedda geeshsha sa’aa gelibeenna; shin I ha"i nu gishshataw S’oossaa sintsan beettanaw yaa saluwaa geleedda. 25 K’eesatuwaa ubbatuwaa kaappuu laytsaan laytsaan bare suutsaa gidennawaa oyk’k’iide, Geeshsha sa’aa geliyaawaadan, Kiristtoosi barena ubbaade yarshshanaw gelibeenna. 26 Hewaa gidintto, Kiristtoosi sa’ay med’ettoodeppe doommiide daro gede waayettanaw koshshee; shin ha"i wodiyaa wurssetsaan nagaraa d’ayissanaw barena yarshshiide, laa’etsennaan itti gede beetteedda.

27 Asay ubbay itti gede hayk’k’anaw bessee; hewaappe guyyiyaan S’oossay asaa pirddana. 28 Hewaadankka, k’ay Kiristtoosi daro asaa nagaraa d’ayissanaw itti gede yarshshetteedda; k’ay I barena loytsi naagiyaawantta ashshanaw beettanaappe attin, laa’entso nagaraa tookkanaw beettena.✝