38 Hewaappe guyyiyaan, Armmaatiyaasa geetettiyaa katamaappe yeedda Yooseefo Yesuusa anhaa akkiide afanaw P’ilaas’oosa woosseedda; Yooseefo Ayihudatoo yayyeedda diraw, Asay erennaan Yesuusa kaalliyaawaa.
Yooseefo woossina P’ilaas’oosi, «Afa» yaageedda. Hewaa diraw, Yooseefo biide, Yesuusa anhaa afeedda. 39 K’ay Nik’oodimoosi hewaappe kase Yesuusakko k’amma yeeddawe, kawaraannanne godare uutsaanna walaketteedda oytamanne ichcheshu kiilo giraame gidiyaawaa keena shittuwaa oyk’k’i akkiide, Yooseefonna yeedda. 40 He laa"u asatuu Yesuusa anhaa akkiide, Ayihudatuu anhaa s’aas’iyaa wogaadan, shittuwaanna gatsiide, mooguwaa afilaan s’aas’eeddino. 41 Yesuusi mask’k’aliyaa bolla misimaariyan d’ishettiide suletteedda sa’aan daro atikilttiyaa sa’ay de’ee; he atikilttiyaa sa’aa giddon shuchchaa wooc’i kesseedda biro ooninne moogettibeenna ooratsa duufuu de’ee. 42 He duufuu matan de’iyaa dirawunne k’ay Ayihudatuu Sambbataw giigettiyaa gallassaa gidiyaa diraw, Yesuusa yaan wotseeddino.