1 Wogaa gallassi guuran, biro daabidaabiyaawaan, Magdala geetettiyaa katamaappe yeedda Mayraama Yesuusi moogetteedda duufuwaakko baade shuchchay he gonggoluwaa doonaappe denddikichcheeddawaa be’aaddu. 2 Simooni P’es’iroosakkonne Yesuusi siik’iyaa yekko kaalliyaawaakko, iza wos’s’aadde baade, «Duufuwaappe Godaa afi diggeeddino; hak’an Aa wotseeddinonttonne nuuni erokko» yaagaaddu.

3 Hewaa diraw, P’es’iroosinne yekko kaalliyaawe aggiide, duufuwaakko beeddino. 4 Laa"uukka ittippe wos’s’eeddino; shin yekko kaalliyaawe P’es’iroosappe aad’d’i kasetiide, he duufuwaakko gakkeedda. 5 He kaalliyaawe hokkiide, mooguwaa afilaa be’eedda; shin giddo gelibeenna. 6 Simooni P’es’iroose Aa kaalli yiide, duufuwaa giddo geleedda. Yaatiide mooguwaa afilay hewan de’iyaawaa be’eedda; 7 k’ay Yesuusa huup’iyaan s’aas’etti utteedda afilay he s’aas’etteeddawaadankka dumma itti sa’aan de’iyaawaa be’eedda; he afilay dumma de’eeppe attin, mooguwaa afilaanna ittippe de’enna. 8 He wode, kasetiide gonggoluwaakko gakkeedda yekko kaalliyaawe geli be’iide ammaneedda. 9 Yesuusi hayk’uwaappe denddanaw bessiyaawaa odiyaa S’oossaa mas’aafaa unttunttu biro akeekibeykkino. 10 Hewaappe guyyiyaan, kaalliyaawanttu barenttu golle simmiide beeddino.

11 Shin Mayraama he duufuwaa doonaan ek’k’aade yeekkaadde hokkaade duufuwaa giddo s’eellaaddu. 12 Bootsa mayuwaa mayyeedda laa"u kiitanchchatuu Yesuusa anhay giseedda sa’aan ittuu huup’issanna ittuu gedissanna utteeddawantta be’aaddu. 13 Unttunttu izo, «Mishirattee, ayaw yeekkay?» yaagiide oochcheeddino.

Iza, «Asatuu ta Godaa afi diggeeddino; unttunttu hak’an wotseeddinonttonne taani erikke» yaagaaddu.

14 Hewaa geeddawaappe guyyiyaan, guyye simma s’eellaade, Yesuusi ek’k’eeddawaa be"aaddu. Shin I Yesuusa gideeddawaa akeekabeyikku. 15 Yesuusi izo, «Mishirattee, ayaw yeekkay? Oona koyyay?» yaagiide oochcheedda.

Mayraama atikilttiyaa naagiyaawaa gaade, «Godaw, neeni akkeeddawaa gidooppe, Aa hak’an wotsaaddintto, taw odaarikkii; taani Aa akkana» yaagaaddu.

16 Yesuusi izo, «Mayraamee» yaageedda.

Aa aakko simmaade, Ibraayiss’s’e k’aalaan «Rabunii» yaagaaddu; hewaa biletsay «Tamaarissiyaawoo» giyaawaa.

17 Yesuusi izo, «Taani biro Ta Aawuwaakko babeena diraw, Taana bochchoppa; shin Ta ishatuwaakko baade, ‹Taani Ta Aawuwaakkonne hinttenttu Aawuwaakko, Ta S’oossaakkonne hinttenttu S’oossaakko, pude bay geedda› gaade unttunttoo oda» yaageedda.

18 Magdala geetettiyaa katamaappe yeedda Mayraama Godaa be’eeddawaanne iziw I hewaa odeeddawaa baade kaalliyaawanttoo odaaddu.

19 He Wogaa gallassi omarssi, kaalliyaawanttu Ayihudatoo yayyeedda diraw, penggiyaa gorddiidde, shiik’i utti de’ishshin, Yesuusi yiide, unttunttu gidduwaan ek’k’iide, «Sarotetsay hinttenttoo gido» yaageedda. 20 Hewaa geeddawaappe guyyiyaan, bare kushiyaanne bare miyyiyaa unttuntta besseedda; kaalliyaawanttu Godaa be’eedda wode loytsi nashetteeddino. 21 Yesuusi laa’entsuwaa unttunttoo, «Sarotetsay hinttenttoo gido; Ta Aabbu Taana kiitteeddawaadan, Taanikka hinttentta kiittay» yaageedda. 22 Hewaa geeddawaappe guyyiyaan, unttunttu bolla ufu giide shemppeedda; k’ay, «Geeshsha Ayaanaa akkite. 23 Hinttenttu atto geedda asaa nagaray atto geetettanawaa; hinttenttu atto geenawanttu nagaray atto geetettenna» yaageedda.

24 Shin tammanne laa"u kaalliyaawanttuppe ittuu, Manttiyaa giyaa Toomaasi, Yesuusi yeedda wode unttunttunna baawa. 25 Hewaa diraw, yekko kaalliyaawanttu Toomaasaw, «Nuuni Godaa be’eeddo!» yaageeddino.

Shin Toomaasi unttunttoo, «Misimaariyan I c’adetteedda Aa kushiyan de’iyaa mallaa be’ennaaninne he mallaa ta birad’d’iyan bochchennan, k’ay ta kushiyaa Aa miyyiyaan yeedda be’ennaan taani ammanikke» yaageedda.

26 Saaminttaappe guyyiyaan, Yesuusa kaalliyaawanttu k’aykka gollen shiik’i utteeddino; Toomaasikka unttunttunna de’ee. Penggii k’ashetti utti de’ishshin, Yesuusi yiide, unttunttu gidduwaan ek’k’iide, «Sarotetsay hinttenttoo gido» yaageedda. 27 Hewaappe guyyiyaan, Yesuusi Toomaasa, «Ne kushiyaa haa ahaade, Ta kushiyaa be’a, k’ay ne kushiyaa haa ahaade, Ta miyyiyaan yeedda be’a, neeni ammaniyaawaa gidappe attin, ammanennawaa gidoppa!» yaageedda.

28 Toomaasi zaariide, «Ta Godaw, ta S’oossaw!» yaageedda.

29 Yesuusi, «Neeni Taana be’eedda diraw ammanaadda; be’ennaan ammaneeddawanttu anjjetteeddawantta» yaageedda.

30 Yesuusi ha mas’aafan s’aafettibeenna hara daro malaatatuwaa barena kaalliyaawanttu sintsan ootseedda. 31 Shin Yesuusi, I Kiristtoosa, S’oossaa Na’aa gidiyaawaa hinttenttu ammanana malanne, k’ay Aa ammaniide Aa suntsan de’uwaa hinttenttu demmana mala, hawe s’aafetteedda.