João 3

3 Yesuusi zaariide, «Taani new tumuwaa oday; Asay laa’entsuwaa yelettana d’ayooppe, S’oossaa kawutetsaa be’anaw danddayenna» yaageedda.

4 Nik’oodimoosi, «C’ima Asay waaniide laa’entsuwaa yelettanaw danddayii? Bare daay uluwaa simmi geliide, laa’entsuwaa yelettanaw Asay danddayii?» yaageedda.

5 Yesuusi zaariide, «Taani new tumuwaa oday; Asay haatsaappenne Geeshsha Ayyaanaappe yelettana d’ayooppe, S’oossaa kawutetsaa gelanaw danddayenna. 6 Asay ashuwaan asaappe yelettee; shin Asay ayyaanaan Geeshsha Ayyaanaappe yelettee; 7 ‹Hinttenttu laa’entsuwaa yelettanaw bessee› gaade taani odeedda diraw, maalalettoppa. 8 C’arkkuu bare koyyeeddasaa c’arkkee. Neeni Aa kooshunchchaa sisaasa; shin I hak’appe yintto woy hak’a bintto erakka. Geeshsha Ayyaanaappe yeletteedda ubbay hewaa mala» yaageedda.