1 Israa’eeliyaa asaw yayyeedda gaasuwaan Yaarikko katamaa dirssaa penggetuu gorddettiide naagettiino; katamaa gelanawunne katamaappe kesanaw danddayiyaa ooninne baawa. 2 Med’ina Goday Iyyaasa, «S’eella, taani Yaarikko katamaa Aa kaatiyaanna Aa mino olanchchatuwaakka ne kushiyan aatsaade immaad. 3 Neeninne ne olanchchatuu salppiide, usuppun gallassay gakkanaw hachche hachche katamaa dirssaa itti gede yuuyyi aad’d’ite. 4 K’ay laappun k’eesatuu dorssatuwaa kac’iyaappe kesseedda laappun malakatatuwaa oyk’k’iide, S’oossaa K’aalaa c’aak’uwa Taabootaa sintsanna hamettino. Laappuntsa gallassi k’eesatuu malakatatuwaa punnishin, olanchchatuu salppiide, ittippe katamaa laappu gede yuuyyi aad’d’ite. 5 Hewaappe guyyiyaan malkkatatuwaa punuwaa goochchiide punniyaawaa sisiyaa wode, ellekka Asay ubbay bare k’aalaa d’ok’k’u ootsiide waasso. Yaatooppe katamaa dirssaa gimbbii kunddina Asay ubbay sintsaw lawuhu giide gelana» yaageedda.

6 Neewe na’ay Iyyaasu k’eesetuwaa s’eegiide, «Med’ina Godaa K’aalaa c’aak’uwa Taabootaa tookkite; hintteppe laappun k’eesatuu laappun malakatatuwaa oyk’k’iide, K’aalaa c’aak’uwa Taabootaappe sintsaw aad’d’iide hamettino» yaageedda. 7 Asaa, «Sintsaw biite; katamaa yuuyyi aad’d’ite; olaw giigeeddawanttukka Med’ina Godaa K’aalaa c’aak’uwa Taabootaa sintsan hamettino» yaagiide azazeedda.

8 Iyyaasu asaw haasayeeddawaadan, laappun k’eesatuu laappun malakatatuwaa Med’ina Godaa sintsan oyk’k’iide, punniidde hametteeddino; k’ay Med’ina Godaa K’aalaa c’aak’uwa Taabootay unttuntta kaalleedda. 9 Olaw giigeeddawanttu malakatatuwaa punniyaa k’eesatuwaa sintsan biyaa wode, guyyenna naagiyaa olanchchatuu K’aalaa c’aak’uwa Taabootaa guyyenna kaalleeddino. He wodiyaa ubbaan malakatatuu punettiino. 10 Shin Iyyaasu asaa, «Taani hinttentta, ‹Waassite!› gaana gallassay gakkanaw, ola waasuwaa waassoppite; hinttenttu k’aalay sisettoppo; itti k’aalakka k’aattoppite. Gidin he wode waassite!» yaagiide azazeedda. 11 Yaatiide Med’ina Godaa K’aalaa c’aak’uwa Taabootay tookettiide, he katamaa itti gede yuuyyi aad’d’anaadan ootseedda. Hewaappe guyyiyaan Asay bare dunkkaaneedda sa’aa simmiide, k’ammaa yaan ak’eeda.

12 Wonttetsa gallassi Iyyaasu guuriide denddeedda; k’eesatuukka Med’ina Godaa K’aalaa c’aak’uwa Taabootaa tookkeeddino. 13 Laappun malakatatuwaa oyk’k’iide laappun k’eesatuu sintsaw aad’d’iide, malakatatuwaa punniidde Med’ina Godaa K’aalaa c’aak’uwa Taabootaa sintsan hametteeddino. Olaw giigeeddawanttu hinttuttuppe sintsanna hametteeddino; guyyenna naagiyaa olanchchatuukka Med’ina Godaa K’aalaa c’aak’uwa Taabootaa guyyenna kaalleeddino. He wodiyaa ubbaan malakatatuu punettiino. 14 Laa"entso gallassi katamaa itti gede yuuyyi aad’d’iide, barenttu dunkkaaneedda sa’aa simmeeddino. Usuppun gallassaa gakkanaw hewaadan haneeddino.

15 Laappuntsa gallassi s’alk’k’ii doliyaa wode denddiide, kasewaadan katamaa laappu gede yuuyyi yuuyyi aad’d’eedino. Katamaa unttunttu laappu gede yuuyyi yuuyyi aad’d’eedawe he gallassi s’alalaana. 16 Laappuntsa yuushshan, k’eesatuu malakatatuwaa punniyaa wode, Iyyaasu asaa, «Med’ina Goday katamaa hinttenttoo aatsiide immeedda diraw, waassite! 17 Katamaynne katamaa giddon de’iyaabay ubbay Med’ina Godaw shek’etowaa gidiide, d’ayanaw besse. Nuuni gadiyaa geeddanaw kiitteedda asatuwaa k’osaade ashsheeda diraw, sharmus’iyaa Ra’aabanne I son izina ittippe de’iyaa asaa s’alalay attanawaa. 18 Shin hinttenttu shek’k’a gideeddabaappe ayaanne akkenaadan hinttenttu huup’iyaw naagettite. Shek’k’a gideeddabaappe hinttenttu akkooppe, Israa’eelatuu dunkkaaneedda sa’aa bayiyaa sa’aa ootsanita; yaatiide he sa’aw metuwaa ahanita. 19 Biraynne work’k’ay ubbay, k’ay nahaasiyaappenne birataappe med’etteedda miishshatuu ubbay Med’ina Godaw geeyeeddawaa gidino. Unttunttu Med’ina Godaa miishshaa minjjiyaa sa’aan de’ino» yaageedda.

20 Hewaa diraw malakatatuu punettina Asay waasseedda. Malakatatu punuwaan Asay bare k’aalaa d’ok’k’u ootsiide waasseedda; ellekka katamaa dirssaa gimbbii kunddi aggeeda! Hewaappe guyyiyaan Asay ubbay sintsaw lawuhu gi gelinne katamaa oyk’k’i aggeeda.✝6:20 Ibr. 11:30 21 Kataman shemppuwaanna pas’a de’eeddawaa ubbaa, mac’c’awaa attumawaa, naanatuwaa c’imaa, miizzaa, dorssaanne hariyaa ubbaa k’ara mashshaan wurssi wod’eedda.

22 Iyyaasu biittaa geeddanaw kiitetteedda laa"u asatuwaa, «Sharmus’atti Ra’aabi soo biide kase hinttenttu iziw c’aak’k’eeddawaadan, izonne iziw de’iyaawaa ubbaa gas’aa kessite» yaageedda. 23 Biittaa geeddeedda wodallatuu biide, Ra’aabo, I aawuwaa, I daayo, I ishatuwaanne iziw de’iyaawaa ubbaa gas’aa kesseeddino. Israa’eeliyaa Asay dunkkaaneedda sa’aappe gas’ana wotseeddino. 24 Hewaappe guyyiyaan katamaanne Aa giddon de’iyaawaa ubbaa taman s’uuggeeddino; shin biraanne work’k’aa k’ay nahaasiyaappenne birataappe med’etteedda miishshatuwaa Med’ina Godaa miishshaa minjjiyaa sa’aan wotseeddino. 25 Shin Iyyaasu sharmus’atto Ra’aabo I aawuwaa soo asaananne iziw de’iyaa ubbabaanna hayk’k’uwaappe ashsheeda. Ayaw gooppe, Iyyaasu Yaarikko katamaa geeddanaw kiitteedda asatuwaa iza kase k’osaade ashshaadu. Izi zaratuu hachche gakkanaw Israa’eeliyaa biittan de’iino.✝6:25 Ibr. 11:31

26 He wode Iyyaasu:

«Denddiide ha Yaarikko katamaa

zaaretsi kees’s’iyaa uray,

Med’ina Godaa sintsan,

shek’etteeddawaa gido.✝6:26 1 Kat. 16:34

Biro baasuwaa baasiya wode,

Aa bayira na’ay hayk’k’o.

Penggiyaa essiyaa wode,

Aa wurssetsa teefa na’ay hayk’k’o»

yaagiide shek’k’eedda.

27 Med’ina Goday Iyyaasunna gideedda; Iyyaasu waarii biittaa ubbaa gakkeedda.