1 Yesuusi hini Iyyarkko katamaa geliide, hewaanna aad’d’i de’ee. 2 Suntsay Zakkiyoosa geetettiyaa itti dure bitanii hewaan de’ee. Ikka k’aras’iyaawanttoo kaappuwaa. 3 Zakkiyoosi Yesuusa geetettiyaawe hak’awentto be’anaw koyyishshin k’antsa gideeddawaa diraw, asaa c’oratetsaappe denddowaan be’anaw danddayibeenna. 4 Yesuusi he ogiyaanna aad’d’iyaa diraw, sintsaw aad’d’iide itti boo’iyaa bolla keseedda.

5 Yesuusi he sa’aa gakkiide, d’ok’k’u gi pude s’eelliide, «Zakkiyoosa, hachche ne gollen peeshanaw bessiyaa diraw elle wod’d’a» yaageedda. 6 Ikka elleelli boo’iyaappe wod’d’iide, nashechchaan Yesuusa mokkeedda. 7 Hewaan de’iyaa asaa ubbay hawaa be’iide, «Hawe nagaranchchaa gollen geliide imatsaa gidiide shoobettana hanee» giide ubbatuukka zuuzuntsaa doommeeddino.

8 Zakkiyoosikka k’ay ek’k’iide Godaa, «Godaw, simmi taw de’iyaawaa ubbaappe bagga hiyyesatoo immana; ooppennekka wordduwaan akkeeddawaa gidooppe, oyddu dakkuwaa udaade zaarana» yaageedda.

9 Yesuusikka Zakkiyoosaw odiidde, «Neenikka Abraahaamo sheeshshaa gidiyaa diraw, hachche atotetsay ha golle asaw yeedda. 10 Ayaw gooppe, Asaa Na’ay bayeeddawaa koyyanawunne ashshanaw yeedda» yaageedda.✝

11 Asay hawaa sisiide de’ishshin Yesuusi, hini Yerusaalame s’eetuwaa dirawunne unttunttoo S’oossaa kawutetsay ha"ikka k’onc’c’iyaawaa malato diraw leemisuwaa odeedda.✝ 12 Hawaadan yaagi doommeedda; «Itti wolk’k’aama bitanii barew kawutetsaa bonchchuwaa akkiide simmanaw, hini haako gadiyaa beedda. 13 Bare k’oomatuwaa giddoppe tammuwaa s’eesiide, unttunttoo tammu miinaa* geetettiyaa miishshaa immowaashshin, ‹Taani simmaade yaana gakkanaw, ha miishshaan zal"ishshite› yaageedda.

14 «Shin Aa gadiyaa Asay Aa is’s’o diraw, ‹Ha bitanii nu bolla kaatetanaadan nuuni koyyokko› yaagiide, guyyenna I de’iyaasaa asaa kiitteeddino. 15 Gidoppe attin, ha bitanii kaate gidiide hini bare gade simmeedda. He k’oomatuu huup’iyaan huup’iyaan I immo miishshaan zal"iide ay keena wod’iseeddinontto eranaw s’eesisseedda.

16 «Koyro k’oomay shiik’iide, ‹Godaw, neeni taw immeedda tammu miinaa wod’iyaa tammuwaa demmaad› yaageedda. 17 Aa Goday Aa, ‹Hayyanaashsho! Neeni lo"o k’oomaa; neeni guutsa yewuwaan ammanetteedawaa gidaade beetto diraw, tammu katamatuwaa bollan maatay new imetteedda› yaageedda.

18 «Laa’entsiyaawekka shiik’iide, ‹Godaw, neeni taw immeedda ichcheshu miinaa geetettiyaa miishshay ichcheshuwaa wod’d’eedda› yaageedda. 19 Aa Godaykka Aa, ‹New ichcheshu katamatuwaa bollan maatay imetteedda› yaageedda. 20 Hara heezzentsiyaa k’oomay shiik’iide, ‹Godaw, c’urk’k’aan s’aas’a wotseedda ne miishshaa hawaa be’a. 21 Ayaw gooppe, neeni wotsabeennasaappe akkiyaawaa; zerabeennawaa k’oyc’iyaa mek’etsi baynna asaa gidiyaa diraw, new yayaad› yaageedda.

22 «Godaykka, ‹Ha iita k’oomay; neeni haasayo k’aalaan ne bolla taani pirddana. Wotsabeennawaa akkiyaawaa, zerabeennawaa k’oyc’iyaa mek’etsi baynna asaa gidiyaawaa erooppe, 23 taani yaade ta miishshaa wod’iyaanna akkana mala, ayaw wod’isiyaawanttoo immabeykkii?› yaageedda.

24 «Godaykka, hewaan ek’k’owantta, ‹Ha miishshaa aappe wotsi akkiide tammu miinay de’iyaawoo immite› yaageedda. 25 Unttunttukka, ‹Godaw, aw tammu miinay de’ee› yaageeddino.

26 «Ikka, ‹Taani hinttenttoo odiyaawe, de’iyaawoo ubbaw gujettanawaa; baynnawaappe k’ay he de’iyaawekka aketanawaa.✝ 27 Yewuwaan k’ay taani unttunttu bollan kawutennaadan koyyeedda ta morkkatuwaa taakko ahiide ta sintsaan shukkite› geedda» yaageedda.

28 Yesuusi hawaa goowaappe kaala hini Yerusaalame kesanaw barena kaalliyaawanttuppe sintsatiide beedda. 29 Debre Zayite geetettiyaa deriyaa matan de’iyaa hini Beetefaagen Biitaaniyaa geetettiyaa heeraa katamatuwaakko shiik’eedda wode barena kaalliyaawanttuppe laa"atuwaa, 30 «Hinttenttuppe sintsan de’iyaa k’eeri katamatuwaa biite; yaa hinttenttu geliyaa wode, ooninne biro uttibeenna hare maray k’ashetti utteeddawaa demmanita; Aa billiide haa akki yiite. 31 Ooninne hinttentta, ‹Hawaa ayaw billiitee?› giide oochchooppe, ‹I bare godaw* koshshiyaa diraassa› yaagite» yaageedda.

32 Kiitetteeddawanttukka biide, Yesuusi unttunttoo odowaadan hanina demmeeddino. 33 Unttunttu hare maraa billiyaa wode be’iide hariyaa Goday, «Hare maraa ayaw billiitee?» yaageedda. 34 Unttunttukka, «Godaw hawe koshshee» yaagiide, 35 hare maraa Yesuusakko aheeddino; barenttu mayuwaa Aa bollan wotsiide Yesuusa hariyaa togisseeddino. 36 Asaykka Yesuusi biyaa ogiyaa bolla barenttu mayuwaa hiis’s’eeddino.*

37 I Debre Zayite geetettiyaa deriyaa dugetsaa afiyaa ogiyaa mateedda wode, daro c’ora gideedda Aa kaalliyaawanttu be’eedda S’oossay ootseedda malaataw ubbaw nashettiide, barenttu kooshshaa d’ok’k’u ootsiide,

38 «Godaa suntsaan yiyaa kaatii,

anjjetteeddawaa;

saluwaan sarotay gido.

K’ay killi d’ok’k’a saluwaan de’iyaa,

S’oossay bonchchetto»

yaageeddino.✝

39 Asaa garssan de’iyaa itti itti Parisaawatuu Yesuusa, «Tamaarissiyaawoo, neena kaalliyaawantta c’o"u ootsaarikkii» yaageeddino. 40 Ikka zaariide, «Taani hinttenttoo oday, unttunttu c’o"u gooppe, shuchchaykka waassanawaa» yaageedda. 41 Yesuusi Yerusaalame mateedda wode, katamato be’iide, yeekkiidde, 42 «Ne sarotaw gidiyaawaa neeni hachche eraaddintto lo"a; shin ha"i hewe ne ayfiyaappe geemmeedda. 43 Ayaw gooppe, ne bolla yaana wodii de’ee; he wode neena is’s’iyaawanttu ne yuushshuwaan dirssaa diriide, yaappenne haappenne dooddiide, neena un"etsiyaa wodii yaanawaa. 44 Neenanne ne dirssaa garssan de’iyaa ne asaa mentsereetsana. S’oossay neena be’anaw yeedda wodiyaa neeni erabeenna diraw, neena is’s’iyaawanttu shuchchaa ubbaa ittuwaa ittuwaa bollappe dentsiide laalanawaa» yaageedda.

45 Hawaappe kaala Yesuusi geeshsha golliyaa geliide, zal"iyaawantta hewaappe kesseedda. 46 Yesuusi zaariide, « ‹Ta gollii S’oossaa woossiyaa golliyaa gidanawaa› geetettiide S’oossaa k’aalaan s’aafetteedda. Shin hinttenttu Aa paannuwaa gonggoluwaa ootseeddita» yaageedda.✝ 47 Yesuusi ubbaa wode geeshsha golliyaan tamaarissi de’ishshin, k’eesatuwaa kaappatuu, Muse higgiyaa tamaarissiyaawanttunne asaa ayissiyaawanttu Aa wod’anaw koyyiino.✝ 48 Shin Asay ubbay Aa haasayaappe ittuunne attenaan sisi utto diraw, Aa wod’iyaa ogiyaa unttunttu d’ayeeddino.