1 Hewaan shiik’eedda ubbatuukka ittippe denddiide, Yesuusa P’ilaas’oosakko afeeddino. 2 Unttunttukka, «Ha bitanii nu asaa baletsiide, Asay Roome biittaa kaatiyaa K’eesaraw giiraa immenna mala diggiide, k’ay, ‹Taani Kiristtoosa› yaagishin demmeeddo» yaagiide mootuwaa doommeeddino.

3 P’ilaas’oosikka Yesuusa, «Hawo, Ayihudatuwaa kaatii neenee?» yaagiide oochcheedda.

Yesuusi zaariide Aa, «Neeni ga de’aassa» yaageedda. 4 P’ilaas’oosi k’eesatuwaa kaappatoonne asaw odiidde, «Taani ha bitaniyaa bollan ayinne iita oosuwaa demmabeykke» yaageedda.

5 Gidoppe attin unttunttu, «Ha bitanii Galiilaappe doommiide, haray atto hawaa gakkanawukka, Yihudaa gadiyaa ubbaa bare timirttiyaan k’aatsiidde de’ee» yaagiide minisi odeeddino.

6 P’ilaas’oosikka hawaa sisiide, «I Galiilaa asee?» yaagiide eranaw oochcheedda. 7 P’ilaas’oosi Heroodise mooddiyaa gadiyaappe Yesuusi yeeddawaa ereedda wode, Heroodisekka k’ay he wodiyaan Yerusaalamen de’iyaa diraw, aakko Yesuusa yeddeedda.

8 Heroodise daro wodiyaappe doommiide Yesuusa be’anaw amotti de’iyaa diraw, Aa be’eedda wode daroppe nashetteedda. Yesuusa waariyaa siseeddawaa diraw, I ooratsabaa ootsishshin be’anaw hidootaan gam"eedda. 9 Heroodise Yesuusa darobaa oochcheedda; shin Yesuusi aw ayaanne zaaribeenna. 10 K’eesatuwaa kaappatuunne Muse higgiyaa tamaarissiyaawanttu hewaan ek’k’iide, Yesuusa loytsi mootiidde de’iino. 11 Heroodisenne Aa wotaadaratuu Yesuusa kad’iide, Aa bolla k’iliic’eeddino. Bonchchetteedda mayuwaa Aa mayzziide, P’ilaas’oosakko zaariide yeddeeddino. 12 Heroodisenne P’ilaas’oosi hawaappe kasenna morkkiyaan de’iino; shin he gallassi sigetteeddino.

13 P’ilaas’oosi k’eesatuwaa kaappatuwaa, ayissiyaawanttanne hara c’ora asaa ittippe s’eesiide, 14 Hawaadan yaageedda, « ‹Ha bitanii asaa makkalatetsaw dentsetsee›, yaagiide taakko aheeddita; taanikka hinttenttu sintsaan bidda s’eellaade, hinttenttu shiishsheedda mootuwaan itti balaanne Aa bollan demmabeykke. 15 K’ay Heroodisekka Aa bollan ayinne demmibeenna diraw, haa nuukko zaari yeddeedda; hinttenttu be’iyaawaadankka, ha bitanii Aa hayk’oo gatsiyaabaa ayinne ootsibeenna. 16 Hawaa diraw taani Aa muraade billana» yaageedda. 17 *

18 Asay ubbay ittippe gidiide, «Ha bitaniyaa yaa digga! Barbbaana giyaa Yesuusa nuw billa!» yaagiide c’abbotteeddino. 19 Barbbaan katamaan walassaa dentsiide, asaa wod’eedda diraw, k’ashetteeddawaa.

20 P’ilaas’oosi Yesuusa billanaw koyyiide, asaw laa’entsuwaa gujjiide haasayeedda. 21 Shin unttunttu, «Mask’k’aliyaa bolla misimaariyan d’ishaade kak’k’a! Kak’k’a!» yaagi waasseeddino.

22 P’ilaas’oosikka heezzentsuwaa unttuntta, «Ayaw? Ha bitanii ootseedda iita oosuu ayee? Taani Aa hayk’oo gatsiyaa naak’uwaa ayinne aappe demmabeykke; hawaa diraw, Aa muraade billa yeddana» yaageedda. 23 Shin unttunttu barenttu kooshshaa d’ok’k’u ootsiide, kak’ettanaadaan darii waasseeddino. Unttunttu waasuukka P’ilaas’oosa k’ofaa laammeedda. 24 Hawaa diraw, P’ilaas’oosikka unttunttu ooshay simmanaadan Yesuusa bollan pirddeedda. 25 Asaa makkalaw dentsetsiiddenne shemppuwaa wod’iide, k’ashetteedda bitaniyaa bilettanaadan unttunttu woosso diraw, he bitaniyaa billeedda. Shin Yesuusa barenttu sheniyaadan koyyowaa ootsana mala, aatsi immeedda.

26 Yesuusa oyk’k’i afiidde de’ishshin, Simoona geetettiyaa K’ereena bitanii heeraappe yiidde de’ishshin demmiide, mask’k’aliyaa toossiide Yesuusanna baana mala ootseeddino. 27 Daro c’ora asaynne yeekkiyaa mac’c’awanttu guyyenna kaalliino. 28 Yesuusi guyye simmiide unttunttoo, «Hinttenoo, Yerusaalame mac’c’awanttoo, hinttenttu huup’ewunne hinttenttu naanaw yeekkiteppe attin, taw yeekkoppite; 29 ‹Mantsa gideeddawanttunne yelibeenna uluu, d’antsibeenna d’antsay, anjjetteeddawantta› geetettiyaa wodii yaanawaa. 30 He wodiyaan, ‹Zoozatoo, nu bolla woddite; zukkullatuwaakka, nuuna k’osite› yaaganita.✝ 31 Simmi k’ayye mitsaan hawaadan hanooppe, mela mitsaan waananawee?» yaageedda.

32 Yesuusanna ittippe kak’k’etana mala, iita oosuwaa ootseedda hara laa"u asatuwaakka afeeddino. 33 K’eeraanew geetettiyaasaa gakkeedda wodiyaan, Yesuusa kak’k’eeddino. Iitaa ootsowanttakka, ittuwaa ushechchanna, yekkuwaa haddirssanna kak’k’eeddino.

34 Yesuusi, «Ta Aabboo, unttunttu barenttu ootsiyaawaa erenna diraw, unttunttu nagaraa atto ga» yaageedda.

Unttunttukka Aa mayuwaa saamaa yegettiide gishetti akkeeddino. 35 Asay ek’k’i s’eellishshin, gadiyaa mooddiyaawanttu, «Harantta ashshee; S’oossaan dooretteedda Kiristtoosi Aa gidooppe, ane bare huup’iyaa ashshennee?» yaagiide k’iliic’eeddino.

36 K’ay wotaadaratuukka shiik’iide k’iliic’eeddino; c’ammeedda woyniyaa eessaa aw ahi immiide, 37 «Hawo, neeni Ayihuda kaatiyaa gidooppe, ne huup’iyaa ashsha!» yaageeddino.

38 Huup’issannakka, «Hawe Ayihuda kaatiyaa» yaagiyaa s’aafuwaa s’aafeeddino. 39 Iitaa ootsiide kak’etteeddawanttuppe ittuu, boriiddinne toochchiidde, «Hawo neeni Kiristtoosa gidikkii? Ane Aa gidooppe, ne huup’iyaanne nuuna ashsha» yaageedda.

40 Yekkuu k’ay Aa, «Neeni hawaa malatiyaa pirddaa bolla de’aaddekka S’oossaw yayyikkii? 41 Nuuni kiitetteedda balaan muraa akkiidde de’eetto; nuw bessiyaa muraa bollan de’eetto; shin ha bitanii itti iitabaanne ootsibeenna» yaagi zaareedda.

42 I Yesuusa, «Neeni ne kawutetsaa wolk’k’aan yiyaa wode, taana k’oppa» yaageedda. 43 Yesuusikka, «Taani new tumuwaa oday, hachche taananna ittippe gannatiyaan de’anaassa» yaageedda.

44 He wode usuppun saate gidiyaa keena; hewaappe udduppu saatiyaa gakkanaw, biittaa ubbaa bollan d’uma gideedda. 45 Awaykka bare poo’uwaa diggeedda; geeshsha golliyaa gaaridduukka peed’ettiide laa"uwaa keseedda. 46 Yesuusikka daro d’ok’k’u geedda k’aalaan waassiide, «Ta Aabboo, taani ta shemppuwaa ne kushiyaan aatsa immay!» yaagi simmowaappe guyyiyaan I hayk’k’eedda.

47 S’eetuwaa kaappuu haneedda yewuwaa be’eedda wode, «Ha bitanii tumakka s’illo asaa» yaagiide S’oossaa galateedda. 48 Hawaa be’anaw ittisaa shiik’eedda Asay ubbay haneedda yewuwaa be’iide, barenttu tiraa bak’k’iidde simmeeddino. 49 Yesuusa eriyaa Asay ubbaynne Galiilaappe doommiide Aa kaalleedda mac’c’awanttu hawaa s’eelliide, haakuwaan ek’k’eeddino.

50 Ayihuda shanggatuwaa gideeddawanttuppe ittuu, Yooseefo geetettiyaa lo"anne s’illo bitanii de’ee. 51 Ha bitanii shanggatuwaa mak’k’uwaanne unttunttu oosuwaan ittippetetsaa ootsibeenna. S’oossaa kawutetsaa yuussaa hidootaan naagiidde de’ee. 52 Yooseefokka P’ilaas’oosakko biide, Yesuusa anhaa akkanaw woosseedda. 53 Akkanaadan geetettowaappe guyye, anhaa bollappe wotsiide, lo"o mooguwaa mayuwaan s’aas’iide, shuchchaappe wooc’ettiide med’etteedda, ooninne kase moogettibeenna ollaa giddon wotseedda. 54 Gallassaykka sambbataa mokkanaw giigiyaa gallassaa; sambbataykka gelana hanee.

55 Galiilaappe doommiide Yesuusanna ittippe yeedda mac’c’awanttu kaalliidde, duufuwaan Aa anhaa wootiide wotseeddinontto be’eeddino. 56 Unttunttu hawaappe soy simmiide, shittuwaanne okkiyaawaa anhaw giigisseeddino.

Higgiyaa maaraadan sambbata gallassi shemppeeddino.