Lucas 7

Yesuusi S’eetuwaa Kaappuwaa K’oomaa Patseedda

1 Yesuusikka hawaa ubbaa asaa sintsan haasay wurssowaappe guyyiyaan hini K’ifirinaahooma beedda. 2 Hewankka itti s’eetuwaa kaappuu de’ee. I daroppe dosiyaa Aa k’oomay harggiide hayyanaw mateedda. 3 Ikka Yesuusabaa siseedda wode, bare k’oomaa woossiide patsana mala Yihudaa c’imatuwaa hini aakko kiitteedda.

4 Unttunttukka Yesuusakko yiide, «Ha bitanii, Neeni Aa maaddanaadan daroppe koyyeedda; 5 gaasuukka nu asaa I daroppe dosiide Ayihudatuwaa woossiyaa golliyaa kees’issowekka Aa» yaagiide daroppe woosseeddino.

6 Yesuusikka unttunttunna ittippe beedda. Ikka hini golliyaa heeraa gakkeedda wode s’eetuwaa kaappuu bare laggetsatuwaa barekko s’eesiide, «Ta Godaw, daaburoppa; ayaw gooppe, neena ta golliyaa kaaraappe garssa baggana gelissanaw taw bessena. 7 Hawaa diraw ne sintsaan ek’k’anawukka haray atto bessiyaawaa gidikke. Shin neeni k’aalaa s’alalaa oda; ta k’oomaykka pas’anawaa. 8 Taani taappe bollanna maatay de’iyaawanttoo eeno gaade de’iyaa asaa. Taappe garssannakka taani kiitissiyaa wotaadaratuu de’iino. Ittuwaa, ‹Ba› yaagiyaa wode, bee; haraakka k’ay, ‹Haaya› gooppe yee. Ta k’oomaykka, hawaa ‹Ootsa› giyaa wode azazettee; ootsee» yaageedda.

9 Yesuusikka hawaa sisiide Aa yewuwaan maalaletteedda; guyye simmiide Aa kaalliyaa daro asaa, «Taani hinttenttoo tumuwaa gay; taani hawaa mala ammanuwaa haray atto, Israa’eeliyaa garssankka be’abeykke» yaageedda. 10 Kase kiitetteedda asatuukka s’eetuwaa kaappuwaa golle guyye simmiyaa wode, Aa k’oomay pas’owaa be’eeddino.