1 Goday bare hank’k’uwaan shaariyaappe garssana S’iyoono wooti wotseeddee! I Israa’eeliyaa puulaa saluwaappe duge sa’aa oleedda. I bare hank’k’uwaa gallassan bare Geeshsha Golliyaakka k’oppibeenna. 2 Goday Yihudaan de’iyaa keetsatuwaa ubbaa k’arettennaan d’ayisseedda. K’ay bare hank’k’uwaan he biittaa geessuwaa ubbaa koleedda. He kawutetsaanne Aa kaappotuwaa sa’aan duge wotsiide kawushshiseedda. 3 Bare suulliyaa hank’k’uwaan Israa’eeliyaa wolk’k’aa ubbaa mentsereetseedda. Morkkii Aa olanaw yiyaa wode, Goday bare ushechcha kushiyaa unttunttu bollappe diggeedda. Bare yuushshuwaan de’iyaawaa ubbaa miyaa lac’ottiyaa tamaadan, Yaak’ooba bolla ees’s’i keseedda. 4 Morkkiyaadan I bare wonddaafiyaa unttunttu bolla dafeedda. Uk’k’unniyaawanttuwaadan I bare ushechcha kushiyaa minisiide, s’eellina lo"iyaa asaa ubbaa wod’eedda. S’iyoone golletuwaa bolla bare hank’k’uwaa suuluwaa tamaadan gusseedda. 5 Goday morkkiyaadan haniide, Israa’eeliyaa d’ayisseedda. I kaatiyaa golletuwaanne geessotuwaa ubbaa koleedda. Yihudaa asaa bollan kayyuwaanne yeekuwaa gujjeedda.

6 I bare Geeshsha Golliyaa ataakilttiyaa giddon de’iyaa daasiyaadan, shod oleedda. Laytsaa giddon bonchchiyaa baalatuunne Sambbatatuu mule dogettanaadan, Med’inaa Goday ootseedda. Bare wolk’k’aama hank’k’uwaan kaatiyaanne k’eesiyaa kad’eedda. 7 Goday barew yarshshuwaa yarshshiyaa sa’aa is’s’eedda; bare Geeshsha Golliyaakka basheedda. Kaatiyaa golletuwaa gimbbiyaa morkkatuwaa kushiyan aatsiide immeedda. Asay laytsaa baalaa bonchchiidde waassiyaawaadan, morkketuu Med’inaa Godaa Golliyaan waasseeddino. 8 Med’inaa Goday S’iyoon gimbbiyaa kolanaw k’achcheeda; izo likkiyaa wodoruwaa mic’c’eedda; izo d’ayissennan de’iiddi, bare kushiyaa zaarenna. Hewaa diraw, gimbbiinne geessuu ittippe kunddanaadan ootseedda. 9 Yerusaalame penggiyaa sank’k’atuu biittan duge moogetteeddino; unttunttu kulbbotuwaakka I mentsereetsiide d’ayisseedda. I kaatiinne kaappatuu omoodettiide, kawutetsatuwaa giddo beeddino. Higgiyaa tamaarissiyaawekka baawa; Izi timbbitiyaa odiyaawanttookka Med’inaa Godaappe sas’ay yiyaawaa aggeeda. 10 S’iyoon c’imatuu c’o"u giide, biittan utti aggeeddino; barenttu huup’iyaan baanaa k’oliide, maak’aakka mayyeeddino. Yerusaalame wodorotuu sa’aw duge hokkeeddino.

11 Ta ayifii afos’s’i afos’s’iidde jolleedda; ta wozanaykka kayyuwaan shabbiretteedda. Ayaw gooppe, ta Asay d’ayeedda; guutsa naanatuunne yii’o naanatuu katamaa ogiyaan labbaniide kunddeeddino. 12 Unttunttu barenttu aayetuwaa, «K’umaa imma! Woynniyaa eessaa imma!» yaagiide waassiino. Katamaa ogiyaan deshettiide labbaniyaa asatuwaadan unttunttu labbanina, unttunttu aayetuwaa kiwuwaan unttunttu shemppuu kesee.

13 Neenoo, Yerusaalame, taani nebaa ay gaanaw danddayayitaa? Woy k’ay ne k’ohuwaa taani ayaana likkanaw danddayayitaa? Neenoo, dosetteedda S’iyoonee, k’ay taani neena woota mintsetsanaw danddayayitaa? Ne madutsay abbaa keeshshaa c’iimma. Yaatina, neena ooni patsanaw danddayii? 14 Ne timbbitiyaa odiyaawanttu new worddonne patsenna sas’aa be’eeddino; unttunttu neeni omoodoo beenna mala, ne nagaraa k’onc’c’issiide odibeykkino. Unttunttu baletsiyaa worddo sas’aa new be’eeddino.

15 Ne mataana aad’d’iyaa ubbay bare birad’d’iyaa ne bollan dukkee. K’ay, «Biittan sa’aan ubbaappe aad’d’aade lo"iyaa katamata hannii? Kumentsaa biittaw nashshechchaa geetetteedda katamata hannii?» yaagiide neena k’iliic’eeddino; barenttu huup’iyaakka k’aatsiino. 16 Ne morkketuu ubbay barenttu doonaa ne bolla dooyeeddino; k’iliic’iiddinne yiluwaan barenttu achchaa garc’c’iidde, «Nuuni izo d’ayisseeddo! Nuuni naageedda gallassaykka hawaa; ha"i gakkiide be’eedda!» yaagiino. 17 Med’inaa Goday bare halchcheeddawaa ootseedda; beni wode I awaayeedda bare k’aalaakka poleedda. Yerusaalamiw k’arettennaan izo koleedda. I morkkatuwaakka nashechcheedda; izo uk’k’unneeddawanttu wolk’k’aakka d’ok’k’u d’ok’k’u ootseedda.

18 Neenoo, S’iyoonee, Godaakko ne dirssaa gimbbii waasso! Ne afotsayikka k’ammanne gallassi shaafaadan goggo! Neeni neena shemppissoppa; ne ayifiyawukka shemppuwaa immoppa! 19 Dendda; k’amma denddaade waassa. Godaa sintsan ne wozanaa haatsaadan gussa. Ogiyaa doonaan ubbaan koshatiide, labbaneedda ne naanatuwaa shemppoo ne kushiyaa aakko pude dentsaade woossa!

20 Abeet Med’inaa Godaw, be’a! Neeni O bolla kase hawaadan ootsaaddintto, ane k’oppa. Aayetuu barenttu kiwuwaan ishalissiide dichcheedda barenttu naanatuwaa miino gay? K’ay k’eesatuu nne nabetuu Godaa Geeshsha Golliyaa giddon hayk’k’ino gay?

21 C’imaynne naanay katamaa giddo ogiyaa baanan giseedda; ta wodorotuunne ta wodallatuu mashshaan wureeddino. Neeni ne hank’k’uwaa gallassi unttuntta wod’aadda; unttunttoo k’arettennaan unttuntta siifaadda.

22 Gibiraa gallassaw asaa s’eesiyaawaadan, neeni taana dagantsiyaawantta ubba saappe s’eesaadda. Med’inaa Godaa hank’k’uwaa gallassan kessi akki pas’a atteedawe ittuunne baawa. Taani ta kiwuwaan ishalissaade dichcheedda naanatuwaa ubbaa morkkii wod’i d’ayisseedda.