Marcos 12

Woynniyaa Turaa Tokkiyaa Oosanchchatuwaa Leemisuwaa

1 Yesuusi unttunttoo oduwaa leemisuwaan yaagiide doommeedda; «Itti bitanii woyniyaa giyaa turaa tokkiide, dirssaa yuushshi aatsiide direedda; k’ay he woyniyaa gumi"iyaa ollaakka bookkeedda; hewaa naagiyaa asaw naagiyaasaa kees’s’eedda; hewaappe guyyiyaan, kotsaa ootsiyaa asaw immiide, hara gade beedda.✝12:1 Isa. 5:1-2 2 Woynniyaa ayfiyaa mas’iyaa wodii gakkina, barena gakkiyaawaa akkiide yaana mala, itti k’oomaa bare kotsaawatuwaakko kiitteedda. 3 Kotsaa ootsiyaawanttu Aa k’oomaa oyk’k’i wad’d’iide, kushe mela yeddeeddino. 4 Laa’entsuwaa hara k’oomaa unttunttukko kiitteedda; unttunttu he k’oomaa huup’iyaa p’alk’k’iide pokkissi yeddeeddino. 5 Woynniyaa turaa goday k’aykka hara k’oomaa kiitteedda; he k’oomaa wod’eeddino; k’ay hara c’oratuwaakka hewaadan ootseeddino; ittuwaa ittuwaa wad’d’iide, haratuwaa wod’eeddino.

6 «Woynniyaa turaa godaw kiittanaw ubbaappe wurssetsaan I darii siik’iyaa Aa na’aa s’alalay atteedda; I, ‹Unttunttu ta na’aa bonchchennaan aggikkino› giide, bare na’aa unttunttukko kiitteedda.

7 «Shin kotsaa ootsiyaawanttu barenttu giddon, ‹Laattanawe hawaa; biide Aa wod’oytte; aw de’iyaawe nuwaa gidana!› yaageeddino. 8 Na’aa oyk’k’i wod’iide, Aa anhaa woyniyaa turaa giddoppe gas’aa kessi oleeddino.

9 «Simmi woyniyaa turaa goday wootanee? Yiide he kotsaawatuwaa wod’i wurssiide, woyniyaa turaa kotsaa ootsiyaa hara asaw immanawaa.

10,11 « ‹Gimbbiyaawanttu kad’i is’s’eedda shuchchay

godaa s’ap’uwaa minisiyaa,

ubbaappe aad’d’iyaa shuchchaa gideedda.

Hawe Goday ootseeddawaa;

k’ay nuunakka maalalissiyaawaa›

yaagiyaawaa S’oossaa mas’aafaappe nabbabi beykkitee?»

yaageedda.✝12:10-11 Maz. 118:22-23

12 K’eesatuwaa kaappatuu, higgiyaa tamaarissiyaawanttunne c’imatuu Yesuusi he leemisuwaa barenttun leemiseeddawaa ereedda diraw, Aa oyk’k’anaw koyyeeddino; shin asaw yayyiide, bashi beeddino.

Giiraa Giiranee Agganee Giyaa Ooshaa

13 K’ay Aa haasayaappe balaa demmana mala, Parisaawatuwaappenne Heroodisa baggatuwaappe*12:13 Heroodisa baggatuwaa: Hawantta guussay he wode de’iyaa kawutetsaa polottikaa baggana kase wogga Heroodisanne Aa na’aa Herood Anttip’aasa baggatuwaanne unttuntta kaalliyaa asatuwaa. amareedawanttu aakko kiittina yiide, 14 «Tamaarissiyaawoo, neeni tumuwaa haasayiyaawaanne asaappe asaa shaakkennawaa nuuni ereetto; ayaw gooppe, neeni asaa dummayakka; k’ay S’oossaa ogiyaa tumatetsaan tamaarissaa. Nuuni Roomaa Kaatiyaa K’eesaarew giiraa giiriyaawe wogeeyye woga gidennee? Giiraa giiraneeyee digganee?» yaageeddino.

15 Shin unttunttu lo"a malatiyaa iita asaa gideeddawaa Yesuusi eriide, «Taana ayaw paac’c’iitee? Itti santtimiyaa haa taakko ahite; taani ane be’ana» yaageedda. 16 Unttunttu aw aheeddino; «Ha malaynne suntsay oowee?» yaagiide unttuntta oochcheedda.

Unttunttu, «K’eesaarewaa» yaageeddino.

17 Yesuusi zaariide unttuntta, «Yaatooppe, K’eesaarewaa K’eesaarew, S’oossaawaa S’oossaw immite» yaagina unttunttu aabaa maalaletteeddino.

Hayk’uwaappe Dendduwaa Ooshaa

18 Hayk’k’eedda Asay denddenna giyaa Saduk’aawanatuwaappe itti itti asatuu Yesuusakko yiide, hawaadan yaagiide, Aa oochcheeddino; 19 «Tamaarissiyaawoo, Muse nuw higgiyaa s’aafiidde, ‹Machchatto akkeedda Asay na’aa yelennaan hayk’k’ooppe, he hayk’k’eeddawaa ishay Aa machchatto laattiide, bare ishaw na’aa yelanaw bessee› yaagiyaawaa s’aafeedda.✝12:19 Zar. 25:5 20 Itti wode laappu ishatuu de’iyaawanttuppe bayiray machchatto akkiide, na’aa yelennaan hayk’k’eedda. 21 Laa’entsiyaa ishay izo akkeedda; ikka na’aa yelennaan hayk’k’eedda; heezzentsiyaawekka hewaadan haneedda. 22 Laappunatuukka izo akkiide, na’aa yelennaan hayk’k’eeddino; ubbaappe guyyiyaan, k’ay he mishiratta hayk’k’aaddu. 23 Yaatina, hayk’k’eedda Asay hayk’uwaappe denddiyaa wode, iza unttunttuppe hak’awoo machche gidanee? Ayaw gooppe, laappunatuukka izo akkeeddino».

24 Yesuusi zaariide unttuntta, «Hinttenttu balettiyaawe, S’oossaa Mas’aafatuwaanne Aa wolk’k’aa erenna diraassa! 25 Ayaw gooppe, hayk’k’eedda Asay hayk’uwaappe denddiyaa wode, saluwaan de’iyaa kiitanchchatuwaa mala gidanaappe attin, attuma asaynne akkena; mac’c’a asaynne gelenna. 26 Shin hayk’k’eeddawanttu dendduwaabaa gidooppe, Muse mas’aafan s’aafetteedda s’aragay miyaa buuraabaa odiyaa sa’aan, S’oossay Musa, ‹Taani Abraahaame S’oossaa, Yisaak’a S’oossaa, Yaak’ooba S’oossaa› gidiyaawaa ubbakka nabbabi beykkitee?✝12:26 Kes. 3:6 27 I pas’a de’iyaawanttu S’oossaa gidiyaawaappe attin, hayk’k’eeddawanttu S’oossaa gidenna; hintte darssi baleeddita» yaageedda.

Ubbaappe Aad’d’iyaa Azazuwaa

28 Higgiyaa tamaarissiyaawanttuppe ittuu unttunttu palumettiyaawaa shiik’iide siseedda; k’ay Yesuusi unttunttoo lo"o zaareeddawaa sisiide, «Azazuwaa ubbaappe aad’d’iyaa azazuu hak’awee?» yaagiide Yesuusa oochcheedda.

29 Yesuusi zaariide, Aa «Azazuwaa ubbaappe aad’d’iyaa azazuwaa, ‹Israa’eeliyaa Asay sisite, Goday nu S’oossay itti Godaa.✝12:29 Zar. 6:4-5 30 Hinttenttu Godaa hintte S’oossaa hintte kumentsaa wozanaappe, hintte kumentsaa shemppuwaappe, hintte kumentsaa k’ofaappe, hintte kumentsaa wolk’k’aappe siik’ite› yaagee. 31 K’ay azazuwaa ubbaappe aad’d’iyaa laa’entso azazuu hawaa; ‹Neeni ne shooruwaa ne huup’iyaadan siik’a› giyaawaa; hawanttuppe aad’d’iyaa hara azazuu baawa» yaageedda.✝12:31 Wog. 19:18

32 Higgiyaa tamaarissiyaawe Yesuusa yaageedda; «Tamaarissiyaawoo, tumuwaa gaadda; neeni ‹S’oossay itti S’oossaa s’alala. Aappe attin, haray baawa› geeddawe tuma.✝12:32 Zar. 4:35 33 S’oossaa kumentsaa wozanaappe, kumentsaa k’ofaappenne kumentsaa wolk’k’aappe dosiyaawenne k’ay bare shooruwaakka bare huup’iyaadan siik’iyaawe, guuddiyaa yarshshuwaappenne hara yarshshuwaa ubbaappe aad’d’ee» yaageedda.✝12:33 Hos. 6:6

34 Yesuusi higgiyaa tamaarissiyaawaa zaaruu aad’d’o eranchcha asaa zaaruwaa gideeddawaa be’iide, «Neeni S’oossaa kawutetsaappe haakkabeykka» yaageedda; hewaappe guyyiyaan, Yesuusa harabaa oochchanaw ooninne s’alibeenna.

«Yesuusi O Na’ee» Yaagiyaa Ooshaa

35 Yesuusi Geeshsha Golliyaan tamaarissiidde, «Higgiyaa tamaarissiyaawanttu Kiristtoosa wooti Daawite na’aa giinoo? 36 Daawite barena Geeshsha Ayyaanay haasayissina,

« ‹Goday ta Godaa, «Taani ne morkkatuwaa,

neeni yed’d’a ek’k’iyaabaa ootsana gakkanaw,

hawaan taappe ushechcha baggana, bonchchettaade utta» geedda›

yaageedda.✝12:36 Maz. 110:1 37 Daawite bare huup’ew Kiristtoosa, ‹Godaa› giide s’eesooppe, yaatina, Kiristtoosi waaniide, Daawite na’aa gidii?» yaageedda.

C’ora Asay Yesuusi giyaawaa nashechchaan siseedda.

Yesuusi, «Muse Higgiyaa Tamaarissiyaawanttuppe Naagettite» Yaageedda

38 Yesuusi tamaarissiidde, «Higgiyaa tamaarissiyaawanttuppe naagettite; unttunttu adussa mayuwaa mayyiide yuuyyiyaawaanne geyaa heerankka Asay unttuntta bonchchiidde sarotiyaawaa dosiino. 39 Unttunttu Ayihuda woosa golletuwaan darii lo"iyaa oydiyaa dosiino; k’ay Asay barentta imatsatetsaan mokkiyaasankka bonchcho sa’aa dosiino. 40 Unttunttu am"etuu golliyaa bonk’k’iidde, barenttoo lo"a malatanaw S’oossaa woosaa adussiino; unttunttu ubbaappe aad’d’iyaa muraa akkanawantta» yaageedda.

Am"atti Mis’uwaataa

41 Yesuusi Geeshsha Golliyaan imotaa yeggiyaa saas’iniyaa matan uttiide, Asay bare miishshaa he saas’iniyaan yeggiyaawaa be’eedda; c’ora dure Asay daro miishshaa he saas’iniyaan yeggeeddino. 42 Itti hiyyeesaa am"atta yaade, itti santtimiyaan laamettiyaa laa"u sembberatuwaa he saas’iniyaan yeggaaddu. 43 Yesuusi barena kaalliyaawantta s’eesiide, «Taani hinttenttoo tumuwaa gay; imotaa saas’iniyaan yeggeedda asaa ubbaappe ha hiyyeesaa am"atta darissaade yeggaaddu. 44 Ayaw gooppe, haratuu ubbay barenttoo palaheedda miishshaappe yeggeeddino; shin iza bare pac’aappe, barew de’iyaa de’uwaa mulekka imma aggaaddu» yaageedda.