Mark'k'oossa Mishiraachchuwaa 5

Yesuusi Iita Ayyaanay Oyk’k’eedda Bitaniyaa Patseedda

1 Yesuusinne Aa kaalliyaawanttu abbaappe hefintsaw pinniide, Gerggesenoona geetettiyaa gadiyaa gakkeeddino. 2 Asaa moogiyaa duufuu de’iyaasaappe iita ayyaanay de’iyaa itti bitanii kesiide, Yesuusi wonggiriyaappe keseedda wode, Yesuusanna gaketteedda. 3 Bitanii he duufuu de’iyaa saan ak’i peeshiide, yaan de’ee; Aa ooninne haray atto, santsalataan k’achchanawukka danddaybbeenna. 4 Ayaw gooppe, I daro wode uk’k’unaaninne santsalataan k’ashettiide de’ee; shin santsalataa duseretseedda; uk’k’unnaakka mentsereetseedda; Aa s’oonanaw danddayeeddawe ooninne baawa. 5 I ubbaa wode gallassinne k’amma, he duufuu de’iyaasaaninne deriyaa bolla waassee; bare bollaakka shuchchaan gaaree.

6 Yesuusa haakuwaan be’eedda wode, aakko wos’s’i yiide aw goyinneedda. 7 He bitanii bare kooshshaa d’ok’k’u ootsiide, «Ubbaappe Bolla S’oossaa Na’aw, Yesuusaa, neenanne taana ayee gatsii? Taana murenna mala, taani neena S’oossaa suntsan woossay» yaageedda. 8 I hewaa ayaw geeddee gooppe, Yesuusi Aa, «Laa ha iita ayyaanaw, ha bitaniyaappe kesa» yaageeddawaassa.

9 Yesuusi Aa, «Ne suntsay oonee?» yaagiide oochcheedda.

I, «Nuuni c’ora gidiyaa diraw, ta suntsay Leegiyoona» yaageedda. 10 Iita ayyaanatuwaa he gadiyaappe kessi yeddenna mala, Yesuusa minisiide woosseedda.

11 He deriyaa bollan c’ora guduntsaa wudii heemettee; 12 iita ayyaanatuu Yesuusa, «Nuuna hini guduntsaa wudiyaakko yeddaarikkii; unttunttun biide gelana» yaagiide woossina, 13 Yesuusi, «Biite» yaageedda. Iita ayyaanatuu bitaniyaappe kesiide, guduntsatuwaan geleeddino; laa"u sha"a gidiyaa guduntsaa wudii kakaa huup’iyaanna kajjottiidde, abbaan geliide, mitetti aggeedda.

14 Guduntsaa wudiyaa heemmiyaawanttu bak’atiide, haneeddawaa katamaaninne katamaappe gas’aa gadiyaan odeeddino; hewaa be’anaw Asay yeedda. 15 Asay Yesuusakko yiide, c’ora iita ayyaanatuu beni oyk’k’eedda bitanii bare wozanay simmina, mayuwaa mayyiide, hewaan utteeddawaa be’iide, ubbay yayyeedda. 16 Hewaa be’eedda asatuu iita ayyaanatuu oyk’k’eedda bitanii haneeddawaanne k’ay guduntsaa wudiyaabaa he asaw odeeddino. 17 Hewaa diraw, Asay barenttu gadiyaappe Yesuusi baana mala, woosaa doommeedda.

18 Yesuusi wonggiriyaan gelishshin, iita ayyaanatuu oyk’k’eedda bitanii Yesuusanna de’ana mala, Yesuusa woosseedda. 19 Shin Yesuusi is’s’iide Aa, «Ne soy simmaade, Goday new ay mala wolk’k’aamabaa ootseeddenttonne k’ay I new ay mala keekentto ne soy asaw oda» yaageedda. 20 Bitanii biide, Tammu Katamaa*5:20 Tammu Katamaa: Hawanttu itti c’ita gideedda katamatuu Sammaariyaappenne Galiilaa gadiyaa away doliyaa baggana de’iyaawantta gidiide, hewanttun de’iyaa asatuwaa eeshshaykka Giriike asatuwaa de’uwaa ogiyaa kaalliyaawaa bessee. giyaa saan yuuyyiide, Yesuusi barew ay mala wolk’k’aamabaa ootseeddentto, oduwaa doommeedda; I odeeddawaa siseedda Asay ubbay maalaletteedda.