Mark'k'oossa Mishiraachchuwaa 5

Yaa’iroosa Naattonne Yesuusa Mayuwaa Bochcheedda Mishiratto

21 Yesuusi simmiide, wonggiriyaan geliide, abbaa pinneeddawaappe guyyiyaan, c’ora Asay abbaa mataan Aakko yuuyyi aad’d’iide shiik’eeddino. 22 Yaa’iroosa giyaawe, Ayihuda woosa golliyaa kaappatuwaappe ittuu, Yesuusa be’eedda wode aakko yi Aa gediyaan kunddiide, 23 «Ta naatta harggaade hayk’k’anaw; iza pas’iide lo"o de’ana mala, yaade ne kushiyaa izi bolla wotsaarikkii» yaagiide Yesuusa minisiide woosseedda.

24 Yesuusi Yaa’iroosanna beedda; I biishshin c’ora Asay Aa kaalliidde metootseeddino.

25 Tammanne laa"u laytsaa ubbaa izi bollaappe suutsay goggiyaa itti mishiratta de’aw. 26 C’ora aakimatuu izo aakimishshinkka, iza pas’a kaa’ettaaddu; bare miishshaa ubbaa wurssinakka iziw haa iiteeddawaappe attin, ayinne izo maaddibeenna. 27 He mishiratta Yesuusabaa sisaade, asaa giddonna Yesuusappe guyyenna yaade, Aa mayuwaa bochchaaddu. 28 Ayaw gooppe iza, «Taani haray atto, Aa mayuwaa bochchooppekka pas’ana» yaagaade k’oppaaddu.

29 Iippe goggiyaa suutsay ellekka ek’k’i aggeedda; iza bare waayiyaappe pas’eeddawaa bare bollaan eraa aggaaddu. 30 Yesuusi bareppe wolk’k’ay kesseeddawaa bare huup’ew eriide, ellekka c’ora asaa giddon guyye simmiide, «Ta mayuwaa bochcheeddawe oonee?» yaageedda.

31 Yesuusa kaalliyaawanttu Aa, «Asay neena sugiyaa wode be’aadde, ‹Taana oonee bochcheeddawe?› yaagay?» geeddino.

32 Yesuusi hewaa oonee ootseeddenttonne be’anaw yuushshi aatsiide s’eelleedda; 33 shin mishiratta barew haneeddawaa eraade, yashshaa kokkoraadde yaade Yesuusa sintsan guufannaaddu; k’ay tumatetsaan haneeddawaa ubbaa aw odaaddu. 34 Yesuusi izo, «Ta naattee, neena ne ammanuu patseedda; saruwaan ba; ne waayiyaappenne pas’a» yaageedda.

35 Yesuusi biro hewaa giishshin, Ayihuda woosa golliyaa kaappuwaa soyippe kiitetteedda asatuu yiide, «Ne naatta hayk’k’adiggaaddu; simmi tamaarissiyaawaa ayaw daaburssay?» yaageeddino.

36 Shin Yesuusi unttunttu giyaawaa sisiide, Ayihuda woosa golliyaa kaappuwaa, «Ammano s’alalaa ammanappe attin, yayyoppa» yaageedda. 37 Yesuusi P’es’iroosappe, Yaak’oobappenne Yaak’ooba ishaa Yohaannisappe haray ooninne barena kaallenna mala diggeedda. 38 Unttunttu Ayihuda woosa golliyaa kaappuwaa soy gakkeedda wode, Yesuusi Asay loytsi yeekkiyaawaanne zilaaliyaawaa be’eedda. 39 Geliide asaa, «Ayaw loytsi yeekkiitee? Naatta gem"ishshaadduppe attin, hayk’k’abeykku» yaageedda.

40 Hewaappe guyye Asay Aa bolla miic’c’eedda; shin asaa ubbaa kare kessiide, naatti aawuwaanne aatto hewaan barenanna de’iyaa Aa kaalliyaawanttanne akkiide, naatta de’iyaasaa geleedda. 41 Yesuusi naatti kushiyaa oyk’k’iide, «S’aalitaa, k’uumii»*5:41 S’aalitaa, k’uumii: Ha k’aalatuu Aramaayike geetettiyaa k’aalaan Yesuusa wodiyaan Paalasttiine gaden haasayettiyaawaa. S’aalitaa giyaawenne k’uumi giyaawe amaaratsuwaa k’aalaa gidenna. Shin Giriikiyaa k’aalaa. yaageedda; hewaa biletsay, «Guutsa naattee, taani neena dendda gay» giyaawaa.

42 Naatta ellekka dendda ek’k’aade hamettaaddu; iza tammanne laa"u laytsaa naatto; hewe haniyaawaan Asay daro maalaletteedda. 43 Yesuusi hewaa unttunttu oossinne odenna mala, unttuntta minisi azaziide, «Iziw miyaabaa immite» yaageedda.