Marcos 6

22 Heroodiyaadi naatta imatsaa mokkiyaasaa gela duraadde, Heroodisanne Aa imatsatuwaa nashechchaaddu; Hewaappe guyye kaatii naattiw, «Neena lo"eeddawaa ayaa gidooppenne taana oochcha; taani new immana» yaageedda. 23 K’ay iziw darii c’aak’k’iide, «Neeni oochcheeddawaa ayaa gidooppekka, taani new immana; haray atto, ta kawutetsaappe bagga gidooppekka, taani new immana» yaageedda.

24 Naatta kare kesaade bare daayo, «Ayaa imma goo?» yaagaade oochchaaddu.

I daaya, «S’ammak’iyaa Yohaannisa huup’iyaa imma ga» yaagaaddu.

25 Naatta ellekka kaatiyaakko baade Aa, «S’ammak’iyaa Yohaannisa huup’iyaa woc’iitiyaan wotsaade, neeni ha"i taw immanaadan koyyay» yaagaaddu.

26 Hewaappe guyye kaatii darii k’aretteedda; shin bare c’aak’uwaa dirawunne bare imatsatuwaa diraw iziw c’aak’k’eedda c’aak’uwaa kolanaw koyyibeenna. 27 Hewaa diraw, ellekka naagiyaawaa kiittiide, Yohaannisa huup’iyaa ahana mala azazeedda; naagiyaawe k’asho golle biide, Yohaannisa k’ood’iyaa muuc’eedda. 28 He muuc’eeddawaa woc’iitiyaan wotsi ahiide, naattiw immeedda; naatta k’ay bare aattiw immaaddu.