Maatoossa Mishiraachchuwaa 14

Yesuusi Abbaa Bollanna Hamettiidde Beedda

22 Yesuusi c’ora asaa moyzziidde, barena kaalliyaawantta wonggiriyaan geliide, bareppe sintsatiide, abbaappe hefintsa pinnana mala azazeedda. 23 Asaa moyzziide, S’oossaa woossanaw deriyaa huup’iyaa barekka keseedda; sa’ay k’ammi digginakka hewaan barekka de’ee. 24 Shin wonggirii he wode, abbaa bollan de’ishshin, sintsa baggana c’arkkuu c’arkkiyaa diraw, beetay wonggiriyaa yaanne haanne sugee.

25 Bayira kuttuu waassi simmina, Yesuusi abbaa bolla hamettiidde, unttunttukko yeedda. 26 Aa kaalliyaawanttu abbaa bolla I hamettishshin be’i dagammiide, «Hawe moyttilliyaa gidennee!» gi yayyiide waasseeddino.

27 Shin Yesuusi ellekka unttuntta, «Ayinne baawa; taanattee; yayyoppite!» yaageedda.

28 P’es’iroosi zaariide Aa, «Ta Godaw, hawe neena gidooppe, taani haatsaa bollanna neekko baana mala, taana azazaarikkii» yaageedda.

29 Yesuusi P’es’iroosa, «Haaya!» yaageedda.

P’es’iroosi wonggiriyaappe wod’d’iide, haatsaa bollanna hamettiidde, Yesuusakko buussaa doommeedda. 30 Shin c’arkkuwaa wolk’k’aa be’iide, yayyeedda; haatsay barena mituwaa doommeedda wode, bare kooshshaa d’ok’k’u ootsiide, «Ta Godaw taana ashshaarikkii!» yaagi waasseedda.

31 He man''iyaan Yesuusi bare kushiyaa yeddi P’es’iroosa oyk’k’iide, «Laa ha ammanuu laafeeddawoo! Ayaw sid’aaddii?» yaageedda.

32 Unttunttu laa"uu wonggiriyaan geleedda wode, c’arkkuu woppu geedda. 33 Wonggiriyaa giddon de’iyaa Aa kaalliyaawanttu Yesuusa, «Neeni S’oossaa Na’aa gideeddawe tuma» yaagiide aw goyinneeddino.