Mateus 21

Yesuusi Wolk’k’aama Bonchchuwaan Yerusaalame Geleedda

1 Unttunttu Yerusaalame matiide, Debre Zayite geetettiyaa deriyaa lank’k’iyaan de’iyaa Beetefaage geetettiyaa k’eeri katamaa gakkeeddino; Yesuusi barena kaalliyaawanttuppe laa"uwaa sintsaw kiittiide, 2 unttuntta hawaadan yaageedda; «Hinttenttuppe sintsaan de’iyaa k’eeri katamaa biite; hewaan itti haratta k’ashuwaan de’ewunno izi maraanna hinttenttu bi simmo sankka demmanita; unttuntta billiide, taw akki yiite. 3 Ooninne hinttentta oochchooppe, ‹Goday hawantta koyyee› yaagite; ellekka I unttuntta yeddi agganawaa.»*21:3 Goday: Haratuwaa godaa guussaa. 4,5 Timbbitiyaa odiyaa nabii,

«S’iyoone katamaa asaw,

‹Be’a, ne kaatii ashikke gidiide,

hariyaa bolla, hare maraa bolla uttiide,

neekko yee› yaagite»

yaagiide haasayeeddawe polettana mala, hawe haaneedda.✝21:4-5 Zak. 9:9

6 Aa kaalliyaawanttu biide, Yesuusi barentta azazowaadan ootseeddino. 7 Harattonne hare maraa ahiide, barenttu mayuwaa unttunttu zokkiyaan wotseeddino; hewaappe simmina Yesuusi toggeedda. 8 He c’ora asaappe dariyaa baggay bare mayuwaa ogiyaan hiis’s’eedda; k’ay haranttu mitsaa haytsaa kar kariide, ogiyaan yeggeeddino. 9 Yesuusappe sintsanna hamettiyaa c’ora asaynne k’ay Aa geeduwaa kaalliyaa c’ora asay, barenttu kooshshaa d’ok’k’u ootsiide,

«Daawita na’ay galatetto!

Godaa suntsaan yiyaawe anjjetteeddawaa!

S’oossay galatetto!»

yaageedda.✝21:9 Maz. 118:25, 26

10 Yesuusi Yerusaalame katamaa geleedda wode, katamaan de’iyaa Asay ubbay, «Hawe oonee?» yaagiide shabbiretteeddino.

11 Asay, «Hawe Galiilaan de’iyaa Naazireete geetettiyaa katamaappe yeedda nabiyaa Yesuusa» yaageedda.